GHFk hegoaldean bakarrik banatu du janaria, Gazako biztanleriaren gehiengoa ezer gabe utzita

Ameriketako Estatu Batuek eta Israelek bultzatutako Fundazio Humanitarioak (GHF, ingelesez) baieztatu du elikagaiak banatzeko eremuetako bat bakarrik egon dela martxan gaur Gaza hegoaldean. Begi-bistakoa denez, hori ez da nahikoa goseak dauden 2,1 milioi pertsonaren beharrak asetzeko.

Laguntza banatzeko gune bakarra Tel al Sultan auzoan, Rafah hegoaldean, zabalik aurkitu dute Gazako herritarrek ordubetez. Dozenaka mila palestinar joan dira banaketa eremura, asko eguzkia atera aurretik zeuden bertan zain, eta ezer jaso gabe joan dira, bertako iturriek jakitera eman dutenez.

Al Bureij (erdialdean) kanpalekuan ere ez dute elikagairik banatu, aldez aurretik iragarritakoaren kontra. Gainera, osasun-iturrien arabera, gutxienez 20 pertsona zauritu dituzte Israelgo droneen erasoek bertara zihoazenean, itxita zegoela jakin gabe.

Era berean, ostegunean Netzarim korridoretik gertu lanean hasi zen zentroa, zibilentzat arriskutsua den eta Gaza hirian (iparraldean) bildutako biztanleei janaria banatu beharko liekeen eremu militarra, ere itxita egon da gaur.

GHFk gaur zabaldu duen ohar baten arabera, 2,1 milioi janari errazio baino gehiago banatu ditu lau egunetan, baina horrekin Gazako biztanle bakoitzak 96 orduan otordu bakarra egingo luke. GHF fundazioaren finantziazio iturria ez dago batere argi, eta ia erakunde humanitario guztiak eta NBE laguntza humanitarioa banatzeko mekanismo horren aurka daude.

NBEren eta MSFren salaketak eta kritikak

Nazio Batuen Erakundeak salatu duenez, Israelek "Kerem Shalom mugako pasabidetik Gazako aldean deskargatu dituzten ia 600 kamioien laguntza" banatzeko saiakera "guztiak" galarazi ditu azken hiru egunetan.

Stephane Dujarric NBEko idazkari nagusiaren bozeramailearen hitzetan, Israelgo agintariek Gazako Zerrendan sartzen uzten duten laguntza "ur tanta bat baino ez da Zerrenda osoko biztanleek gosez hiltzeko arriskua duten une honetan".

Bozeramaileak banaketa mekanismo "militarizatu" berria kritikatu du, "ez dituelako Gazako herritarren beharrak asetzen". "Arriskuan jartzen ditu eta printzipio humanitarioen aurka doa", erantsi du.

Ildo beretik, Mugarik Gabeko Medikuak (MSF) elkarteak egindako salaketaren arabera, GHFren elikagaiak banatzeko plan berria "oso gaizki" hasi da, eta herritarrak indarrez lekualdatzeko helburuarekin laguntza banatzea "garbiketa etnikoaren estrategia zabalago baten parte" da.

Goseak lapurretak areagotu ditu

Israelek ia hiru hilabetez erabateko blokeoa inposatu ondoren orain laguntza apurren bat sartzen bada ere, etsipena nagusi da Gazako herritarren artean, eta gero eta gehiago dira helmugara iritsi baino lehen laguntza humanitarioa garraiatzen duten kamioiak erasotzera doazenak, banaketaz arduratzen diren agentzietako beharginen esanetan.

"Egun batzuetan kamioi guzti-guztiei egin diete eraso. Duela pare bat egun, 30etik 30 lapurtu zituztela uste dut. Batzuetan ez diote bati ere erasotzen. Baina oraintxe bertan erasotuen portzentajea oso handia da", adierazi du Olga Cherevko NBEren Giza Gaietarako Koordinaziorako Bulegoko bozeramaileak.