Gutxienez 20 pertsona hil dira, tartean bost kazetari, Israelek Gazako Nasser ospitaleari egindako erasoan

Gutxienez 20 pertsona —tartean, 5 kazetari— hil dira astelehen honetan Israelek Nasser ospitalearen (Gaza hegoaldean) kontra egindako erasoan, osasun zentro horren eta Gazako Osasun Ministerioaren azken datuen arabera.

Gainera, gutxienez Defentsa Zibileko erreskatatzaile bat, Imad Abdul Hakim al-Shaer suhiltzailea, hil da erasoan, eta zazpi pertsona gehiago zauritu dira.

Hossam Al Masri, Reuters albiste agentziarako independente gisa lan egiten zuena; Mohamed Salama, Al Jazeera telebista kateko kameraria; Mariam Abu Daqqa, nazioarteko albiste agentzietarako eta telebistetarako independente gisa lan egiten zuena; Moaz Abu Taha AEBko NBC telebista kateko kazetaria; eta Ahmed Abu Aziz Red Quds Feed eta beste hedabide batzuetakoa, dira hildako kazetariak.

Halaber, Israelgo Armadak seigarren kazetari bat hil du Al Mayasi inguruan, Gazako hegoaldean. "Hildako kazetaria Hasan Douhan da, ’Al Hayat`egunkarirako lan egiten zuena", azaldu du Gazako Gobernuaren Komunikabide Bulegoak ohar batean.

Azken datuen arabera, Israelek gutxienez 246 kazetari hil ditu 2023ko urrian erasoaldia hasi zuenetik.

Reutersek dio, gainera, beste argazkilari bat, Hatem Khaled, zauritu dela.

"Lehen erasoaren helburua Nasser Osasun Zentroko laugarren solairua izan da, eta bigarrena, zaurituak eta hildakoak erreskatatzera joan diren anbulantziak", Gazako Osasun Ministerioak jakitera eman duenez.

Israelgo Armadak deitoratu egin du "behar ez zen pertsonei egindako edozein kalte".

"FDIk (Israelgo Defentsa Indarrak) deitoratu egiten du behar ez zen pertsonei egindako edozein kalte, eta ez du kazetarien kontrako erasorik egin. FDI gatazkan esku hartzen ez duten pertsonei ahal den kalte txikiena egiten saiatzen da", zehaztu du komunikatu batean, eta gehitu ikerketa abiatuko duela.

Hamas talde islamistak, berriz, Israelek "genozidioan gora" egin duela esan du, eta nazioarteko komunitateari neurri "sendoak" eta "azkarrak" eskatu dizkio "mendeko krimen handiena" amaitzeko.

"Netanyahuk eta bere Gobernu terroristak nazioarteko zuzenbidearekiko eta itun humanitarioekiko mespretxua erakutsi dute berriro, nazioarteko komunitateari eta NBEri desafio eginez, mediku zibil konplexu bati nahita eraso egiteagatik eta nazioarteko zuzenbide humanitarioak babestutako taldeak hiltzeagatik", adierazi du Hamasek.

Hamasek gerra-krimentzat eta sarraski "lazgarritzat" jo ditu lau informatzaileen heriotzak, eta Israelek kazetariak beldurtu nahi dituela uste du, "egia" konta ez dezaten.

Nazioarteko hedabideek zuzenekoetarako erabiltzen zuten

Israelen droneek erasotako puntua, sute-eskailera bateko azken eskailera-burua, nazioarteko hedabideetako kazetariek erabiltzen zuten zuzeneko emankizunak egiteko, EFE agentziak kazetarien lankideak aipatuta jakitera eman duenez.

Kazetariak bertara joaten ziren Khan Junis herriaren ekialdeko ikuspegi ona izateko eta Interneteko eta argindar konexioa onak zirelako bertan.

Nasser ospitalea "eremu gorritzat" jo du Israelek, eta, beraz, Gazako leku arriskutsuenetako bat da kazetarientzat.

Eraildako kazetariak kanpin-dendetan bizi ziren, eta elkarrekin egoten ziren segurtasun handiagoz lan egiteko.

Mugarik Gabeko Kazetariak elkarteak Israelen "inpunitatea amaitzea" eskatu du. "Noraino iritsiko da Israelgo Armada Gazako informazioa ezabatzeko? Noiz arte egingo diote entzungor nazioarteko zuzenbide humanitarioari?", esan du Thibaut Bruttin elkartearen zuzendari nagusiak.

NBEko Segurtasun Kontseilua "premiaz biltzea" eskatu du, "kazetarien aurkako krimenen zigorgabetasunari amaiera emateko, kazetari palestinarrak babesteko eta kazetari guztiei zerrendarako sarbidea irekitzeko".

Abuztuaren 10ean, Israelek beste sei kazetari hil zituen Al-Shifa ospitalearen ondoan bizi ziren dendaren aurka egindako beste eraso batean, horietako bost Al Jazeerako langileak ziren.

Maiatzean, Mugarik Gabeko Kazetariek Nazioarteko Zigor Gorteari eskatu zioten kazetari palestinarrak biktima gisa agertzeko, eta ez soilik lekuko gisa, Gazako Zerrendaren aurkako erasoaldian Israelek gerra krimenak egin dituen ala ez argitzeko.