Israel eta Libanoren arteko 10 eguneko su-etena iragarri du Trumpek

Donald Trump AEBko presidenteak iragarri duenez, Israelek eta Libanok 10 eguneko su-etena adostu dute, eta gaur gauerdian sartuko da indarrean.

"Elkarrizketa bikainak izan berri ditut Libanoko Joseph Aoun presidente errespetatuarekin eta Israelgo Bibi Netanyahu lehen ministroarekin. Bi buruzagi horiek adostu dutenez, euren herrialdeen artean BAKEA lortzeko, 10 eguneko su-etena hasiko dute formalki, 5:00etan. EST (23:00etan Euskal Herrian)", idatzi du Trumpek Truth Social sare sozialean.

Bigarren mezu batean iragarri duenez, Netanyahu eta Aoun Etxe Zurira gonbidatuko ditu "1983tik egingo diren Israelen eta Libanoren arteko lehen elkarrizketa esanguratsuetarako". Oraingoz, ez du bilera horretarako data zehatzik eskaini, baina aurreratu du, "balitekeela", lau edo bost egunen buruan izan daitekeela.

Nawaf Salam Libanoko lehen ministroak txalotu egin du iragarpena, eta gatazka hasi zenetik, duela sei aste baino gehiago, gobernuak egindako eskaera "giltzarria" izan dela gogoratu du.

Ordu batzuk lehenago, Libanoko presidenteak defendatu du Israelekin balizko su-etena ahalbidetzeko "funtsezkoa" izango dela Libano hegoaldean dauden Israelen tropek atzera egitea, hango armadak mugaren kontrola berreskuratu ahal izateko.

Bestalde, Hassan Fadlallah Hezbolako ordezkariak adierazi du Iranek Beiruten duen enbaxadoreak eman diola su-etenaren berri. Ildo horretan, talde xiitak ohartarazi du su-etenak ez diela "mugitzeko askatasuna" eman behar Libanoko hegoaldean dauden Israelgo indarrei.

Azken asteetan, Israelek ohartarazi zuen mugako zerrenda osoa epe luzera kontrolatzeko asmoa zuela, eta horretarako tropak mantenduko zituela Libano hegoaldean. Hala, Hizbulak ohartarazi du su-etena “gertakariak nola gertatzen diren kontuan hartuta” zehaztuko dela.

Benjamin Netanyahu Israelgo lehen ministroak bideo batean adierazi duenez, Israelgo Armadak 10 kilometroko sakonera duen eremu bat okupatuta mantenduko du Libanoko hegoaldean, su-etenak irauten duen bitartean.

"10 kilometroko sakonerako segurtasun-eremua, askoz ere indartsuagoa, kontrolagarriagoa eta lehen genuena baino askoz ere sendoagoa. Hemen gaude eta ez gara joango", esan du.

Su-etena luza liteke

AEBko Gobernuak argitaratutako dokumentu batean adierazten da israeldarrek "bidezko defentsa" egiteko eskubidea dutela su-etenak irauten duen bitartean, eta bake elkarrizketek aurrera egiten badute, tregoa hori luzatu egin daitekeela.

Su-etena, Israelen aldetik "borondate oneko keinutzat" jotzen dena, hamarkadaz hamarkada etsaituta dauden bi nazioen arteko "segurtasun eta bake akordio iraunkorra" lortzeko negoziazioak ahalbidetzera bideratuta dago.

Akordioaren arabera, menia indarrean sartzen denetik aurrera, Libanok "neurri esanguratsuak" hartuko ditu Hizbulak eta Libanoko gainerako talde armatu ez-estatalek eta matxinoek "Israelgo helburuen aurkako erasoak egitea saihesteko.

Era berean, Israelgo indarrek konpromisoa hartu dute "Libanoko lurraldean, lurretik, airetik eta itsasotik, helburu libanoarren aurkako eraso-operazio militarrik ez egiteko, helburu zibilak, militarrak eta estatuaren beste helburu batzuk barne".

Israelen eta Libanoren arteko tentsioak Ameriketako Estatu Batuen eta Iranen arteko bi asteko su-eten hauskorra kolokan jartzeko mehatxua egin du. Tregoa hori hilaren 22an amaituko da, Pakistanen bake-elkarrizketei berriro ekitea espero den bitartean.