Iranek su-etena urratzea leporatu dio AEBri, eraso egin baitio ontzi bati Ormuzen

Irango Gobernuak salatu duenez, AEBk Omango itsasoan ontzi komertzial baten aurka egindako erasoa bi herrialdeen artean indarrean dagoen su-etenaren urraketa zuzena izan da, eta areagotu egin du Ormuzko itsasarte estrategikoaren inguruko tentsioa.

Khatam al-Anbiyako Kuartel Nagusi Zentralareno bozeramaileak adierazi du AEBko indarrek itsasontziaren nabigazio sistema erabili ezinda utzi zutela, tirokatuta. Ontzia, Txinatik Iranera zihoan edukiontzi itsasontzi bat, Oman itsasoan geldiarazi zuten, eta Teheranek dio su-eten akordioa urratu egin duela.

Horren aurrean, Iranek ziurtatu du droneekin erasoak egin dituela AEBko ontzi militarren aurka, baina ez du xehetasunik eman ekintza horiei buruz.

Washingtondik, Donald Trump presidenteak gertaeren bertsio erabat desberdina eman du, eta azpimarratu du Irani ezarritako itsas blokeoa betetzeko neurria besterik ez dela izan. Azaldu zuenez, ontzia (Touska izenekoa) neurriak urratzen saiatu zen eta horregatik geldiarazi zuten, behin eta berriz ohartarazpenak egin ostean.

Trumpek ziurtatu du AEBko Itsas Armadak sei orduz egin zizkiola ohartarazpenak, baina jaramonik egin ez zuenez, itsasontziaren nabigazio sistema indargabetzeko erasoa egin zutela. Gainera, agintariak jakinarazi du AEBko Altxorrak praktika desegokiengatik zigortutako itsasontzietako bat dela, eta militarren zaintzapean dagoela.

Islamabaden aurreikusita dagoen negoziazio-errondaren atarian gertatu da erasoa. AEBk parte hartuko duela baieztatu badu ere, Iranek jarrera anbiguoa du eta itsas blokeoa bertan behera uztea jartzen du mahaian esertzeko baldintza gisa.

Testuinguru horretan, Mohamad Baqer Qalibaf Irango Parlamentuko presidenteak argi utzi du Teheran ez dela Washingtonekin fido. "Ez dugu konfiantzarik. Edozein momentutan gerra gogortu egin daiteke", ohartarazi du.

Qalibafek AEBri leporatzen dio negoziazio prozesua "engainu" bidez hasi duela, eta horrek agerian uzten duela Washingtonek fede txarrez jokatzen duela. 

Ormuzko itsasartea oraindik blokeatuta dagoela —bide horretatik munduko petrolioaren % 20 inguru igarotzen da— eta bi herrialdeak elkarri mokoka ari zaizkiola, diplomaziarako tartea estutzen ari dela dirudi.