Giro grisa, freskoa eta bustia udari agur esateko

Udako eguraldiak azkena eman du. Larunbat arratsaldeko lehen orduan eguraldi aldaketa iritsi da Euskal Herriko bazter gehienetara. Goizeko eguzkia eta tenperatura beroak atzean utzi, eta prezipitazioak eta termometroen jaitsiera nabarmena heldu dira. 

Igandean, eguraldiak udazkeneko itxurarekin jarraituko du. Maximoak asko jaitsiko dira, eta 15 eta 20 ºC artean geratuko dira; minimoak, berriz, bezperan baino hiruzpalau gradu baxuagoak izango dira. Zerua estalita egongo da eta zaparradak espero dira, isurialde atlantikoan sarriago, ekaitzarekin batera. Barnealdean, ipar-haizea ibiliko da, kostaldean mendebaldekoa edo ipar-mendebaldekoa, bolada oso gogor batzuekin egunaren bigarren partean, bereziki gauean.

Datorren asteari dagokionez, eguraldiak berdintsu jarraituko du lehen egunetan, eta, ondorioz, komeni izango da euritakoa eskura izatea.

Astelehenean, euri gutxiago egingo du hegoaldean. Iparraldean, zerua hodeitsu egongo da eta zaparradak egingo ditu, batez ere kostaldean. Hegoaldean, aldiz, ostarteak zabalagoak izango dira eta giro eguzkitsua izango da hego-ekialdean; ateri eutsiko dio leku gehienetan, edo euri gutxi egingo du.

Mendebaldeko haizea ibiliko da, kostaldean indartsu goizean, eta ipar-mendebaldekoa nagusituko da arratsaldean. Tenperaturan ez da aldaketa handirik izango, baina minimoak baxuagoak izango dira.

Asteartean, haizeak ipar ipar-ekialdetik joko du eta euri gutxiago egingo du. Zerua aurreko egunetan baino garbiago egongo da, baina, hala ere, hodeiak agertuko dira tarteka eta zaparrada txikiak egingo ditu, batez ere egunaren lehenengo partean eta iparraldean. Tenperaturan ez da aldaketa handirik espero; eguzkitsuago egongo denez, zenbait lekutan tenperatura maximoak apur bat igo daitezke.

Asteazkenetik aurrera, atertzera eta epeltzera joko du, eta hori izango da hurrengo egunetarako joera.