Euria eta tenperaturaren jaitsiera ekarriko dituen fronte batekin hasiko dugu azaroa

Azken orduetan izandako eguraldi atsegina aldatu egingo da hilabete berria hastearekin batera. Azaroarekin batera, fronte bat helduko da gurera. Euria egingo du eta tenperaturak jaitsi egingo dira.

Ostiralean ostegunean baino hodei gehiago izango dugu. Erdi-mailako hodeiak, goi-hodeiak eta ostarteak tartekatuko dira. Hodeitza mendebaldean pilatuko da batik bat, eta ez da baztertzen tanta batzuk egitea goizean; arratsaldean, euria egiteko probabilitatea handiagoa izango da, eta zaparrada mardulagoren bat egin dezake. Hego-mendebaldeko haizea ibiliko da, eta gogor joko du, bolada oso gogorrekin haizeguneetan, bereziki egunaren amaieran eta mendebaldean. Tenperaturan ez da gorabehera handirik izango.

Larunbatean, fronte batek eragingo digu. Goizean, hego-mendebaldeko haizea harro ibiliko da, eta ia ez du euririk egingo. Arratsaldean, ordea, haizeak mendebal ipar-mendebaldera egingo du, eta euria egingo du. Euria, gehienbat, mendebaldean egingo du, eta zaparrada mardulagoak bota ditzake. Tenperatura maximoak jaitsi egingo dira, bereziki arratsaldean; haizea ipar-mendebaldetik finkatuko da eta freskatu egingo du.

Igandean, giro freskoagoa izango dugu. Tenperaturak behera egingo du: maximoak 14-16 ºC ingurukoak izango dira barnealdean eta 17-18 ºC ingurukoak kostaldean. Zerua oso hodeitsu egongo da, eta zaparradak botako ditu, sarriago ipar partean eta goizean. Arratsaldean, atertzera egingo du, eta ostarteak irekiko dira gauean. Mendebal ipar-mendebaldeko haizea ibiliko da, bolada gogorrekin kostaldean.