Gaur abiatuko da Kataluniako buruzagi independentisten aurkako epaiketa historikoa
Urriaren 1eko erreferenduma antolatu eta Kataluniaren independentzia aldarrikatu zuten buruzagi independentisten aurkako epaiketa gaur, otsailak 12, abiatuko da Auzitegi Gorenean.
Fiskaltzak 7 eta 25 urte urte arteko kartzela zigorrak eskatu ditu akusatuentzat, matxinada eta desobedientzia delituengatik eta dirua bidegabe erabiltzearren. Abokatutzak, baina, 7 eta 12 urtera murriztu du zigorra, matxinada beharrean albaramendua leporatu dielako.
12 buruzagi independentista eseriko dira akusatuen aulkian: Oriol Junqueras presidenteorde ohia, Carme Forcadell Parlamentuko presidente ohia, Raul Romeva, Jordi Turull, Joaquim Forn, Dolors Bassa, Meritxel Borras, Carles Mundo eta Santi Vila kontseilari ohiak, Jordi Sanchez ANCren buruzagi ohia eta Jordi Cuixart Omnium Culturaleko presidentea.
Aurretiazko izapideekin hasiko da epaiketa. Prozesu horrek hiru egun iraun lezake, eta, beraz, aste osoa beteko luke, epaiketa asteartetik ostegunera soilik egingo dutelako, goizeko eta arratsaldeko saioetan banatuta. Horrekin, presoen joan-etorriak saihestu nahi dituzte.
Horrenbestez, litekeena da 12 auzipetuen galdeketak otsaileko hirugarren astean hastea; Oriol Junquerasena izango da lehena.
Otsailaren 1etik Madrilgo bi kartzelatan daude buruzagi independentistak: bi emakumezkoak, Alcala Mecon, eta 10 gizonezkoak, Soto del Realen.
Quim Torra Kataluniako presidentea eta bere taldeko bi kontseilari epaiketaren lehen saioan egotea baimendu du Auzitegi Gorenak. Alabaina, errefusatu egin du Estatuko zein nazioarteko begiraleak epaiketa egingo duten aretora sartzeko zenbait abokatuk egindako eskaera, telebista bidez eta auzitegiaren webgunearen bitartez saioak oso-osorik emango dituztela argudiatuta.
Horrez gain, Gorenak argitu du akusatu bakoitzak bi akreditazio izango dituela senitartekoak edota lagunak epaiketara eraman ditzaten, eta epaiketan bi itzultzaile egongo direla jakinarazi du.
12 auzipetuak
Hauek dira 12 auzipetuak eta Estatuko Abokatuak eta Fiskaltzak haien aurka eskatu dituzten zigorrak:
ORIOL JUNQUERAS
Fiskaltza: 25 urteko kartzela-zigorra, matxinada eta diru publikoa bidegabe erabiltzea egotzita.
Estatuko Abokatua: 12 urteko kartzela-zigorra, sedizio eta diru publikoa bidegabe erabiltzea egotzita.
Kataluniako Gobernuko presidenteorde eta Ekonomia eta Ogasun kontseilari ohia, 2017ko azaroan 2tik dago espetxean.
CARME FORCADELL
Fiskaltza: 17 urteko kartzela-zigorra, matxinada egotzita.
Estatuko Abokatua: 10 urteko kartzela-zigorra, sedizioa egotzita.
Kataluniako Asanblada Nazionaleko (ANC) buruzagia izan zen lehenengo eta Parlamentuko presidentea gero. 2017ko azaroaren 9an kartzelan sartu zuten, baina biharamunean aske geratu zen 150.000 euroko bermea ordainduta. 2018ko martxoan berriro eraman zuten preso, eta harrezkero espetxean dago.
JORDI SANCHEZ ETA JORDI CUIXART
Fiskaltza: 17 urteko kartzela-zigorra, matxinada egotzita.
Estatuko Abokatua: 8 urteko kartzela-zigorra, sedizioa egotzita.
'Jordiak' dira espetxean denbora gehien daramaten auzipetuak. 2017ko urriaren 16an kartzelatu zituzten.
JOAQUIM FORN
Fiskaltza: 16 urteko kartzela-zigorra, matxinada eta diru publikoa bidegabe erabiltzea egotzita.
Estatuko Abokatua: 11 urte eta sei hilabeteko kartzela-zigorra, sedizioa eta diru publikoa bidegabe erabiltzea egotzita.
Junqueras bezala, Kataluniako Gobernuko Barne kontseilari kargugabetua 2017ko azaroaren 2tik dago espetxean.
JORDI TURULL
Fiskaltza: 16 urteko kartzela-zigorra, matxinada eta diru publikoa bidegabe erabiltzea egotzita.
Estatuko Abokatua: 11 urte eta sei hilabeteko kartzela-zigorra, sedizioa eta diru publikoa bidegabe erabiltzea egotzita.
Gobernuko Presidentetza kontseilaria 2017ko azaroaren 2an espetxeratu zuten; abenduaren 4an aske geratu zen, bermea ordainduta, baina 2018ko martxoan berriro eraman zuten preso.
JOSEP RULL
Fiskaltza: 16 urteko kartzela-zigorra, matxinada eta diru publikoa bidegabe erabiltzea egotzita.
Estatuko Abokatua: 11 urte eta sei hilabeteko kartzela-zigorra, sedizioa eta diru publikoa bidegabe erabiltzea egotzita.
Kataluniako Lurralde kontseilaria ere 2017ko azaroan kartzelatu zuten eta handik hilabetera aske geratu zen. Alabaina, 2018ko martxoan berriro kartzelatu zuten.
RAUL ROMEVA
Fiskaltza: 16 urteko kartzela-zigorra, matxinada eta diru publikoa bidegabe erabiltzea egotzita.
Estatuko Abokatua: 11 urte eta sei hilabeteko kartzela-zigorra, sedizioa eta diru publikoa bidegabe erabiltzea egotzita.
Harreman Instituzionalen eta Kanpo Gaietarako kontseilaria izan zen. 2018ko martxotik dago preso.
DOLORS BASSA
Fiskaltza: 16 urteko kartzela-zigorra, matxinada eta diru publikoa bidegabe erabiltzea egotzita.
Estatuko Abokatua: 11 urte eta sei hilabeteko kartzela-zigorra, sedizioa eta diru publikoa bidegabe erabiltzea egotzita.
Bassak Lan eta Gizarte Gaietarako Kontseilaritza zuzendu zuen. 2018ko martxotik dago preso.
SANTIAGO VILA, CARLES MUNDO ETA MERITXELL BORRAS
Fiskaltza eta Estatuko Abokatua: 7 urteko kartzela-zigorrak eskatzen dituzte, desobedientzia delitua eta diru publikoa bidegabe erabiltzea egotzita.
Aske dauden auzipetu bakarrak dira. Vilak gau bat igaro zuen espetxean, bermea ordaindu eta aske geratu zen arte; Mundo eta Borras, ostera, ia hilabete egon ziren preso, 2017ko abendura arte.
170 komunikabide, 600 kazetari
Ikusmin handia piztu du epaiketa honek nazioartean. 170 komunikabidetako 600 kazetari baino gehiago akreditatu dira, prozesu osoa bertatik bertara jarraitzeko. Hori dela eta, aurrekaririk gabeko antolaketa behar izan da, aretoak eta azpiegiturak prestatzeko.
Carlos Lesmes Auzitegi Goreneko presidentearen hitzetan, "antolaketa oso konplexua" izan da, halako epaiketa handiak hartzeko ez dagoelako prestatuta eraikina, azpiegiturei dagokienez.
M-11ko atentatuen epaiketak bakarrik eragin du antzeko ikusmina Auzitegi Gorenean.
Urkullu, 'Proces' auzian lekuko
Mariano Rajoy Espainiako Gobernuko presidente ohia eta Soraya Saenz de Santamaria presidenteorde ohia izango dira 'proces' auziko lekuko nagusiak. Roger Torrent Kataluniako presidentea, Artur Mas presidente ohia, Cristobal Montoro ministro ohia eta Iñigo Urkullu lehendakaria ere lekuko izango dira epaiketan.
Carles Puigdemont eta Marta Rovira ERCko idazkari nagusiak, berriz, auzipetuta daudenez, ez dira lekuko izango. Ezta Felipe VI. erregea ere, legeak jasotzen duenez salbuetsita baitago.
Zure interesekoa izan daiteke
Eusko Legebiltzarrak lan eskaintza publikoetan euskararen babesa indartzeko erreforma onartu du, EH Bilduren abstentzioarekin
Euskal Enplegu Publikoaren Legearen aldaketak, EAJk bultzatua, hizkuntza eskakizunen segurtasun juridikoa indartu nahi du. Testua aurrera atera da EAJren babesarekin eta EH Bilduren abstentzioarekin, eta PSEk, Eusko Jaurlaritzako EAJren bazkideak, kontrako botoa eman du.
Polizia gehiegikerien legea erreformatzeko eskatu du Egiari Zor elkarteak, biktima bakar bat ere "baztertuta" gera ez dadin
Epez kanpo izapidetzeagatik ezetsi zituzten 500 onarpen-eskaera helarazi dizkio fundazioak Eusko Jaurlaritzari.
Hitz gogorrak izan dituzte Feijook eta Patxi Lopezek Kongresuan
PPko buruak PSOEren bozeramailearen aita aipatu du oholtzan, eta hark erantzun dio alderdiaren sortzailea "torturatu eta erbesteratu zuen diktadurako gobernuaren" parte zela.
Begoña Gomezek pasaportea eman du epaitegian, epaileak eskatuta
Epaileak kautelazko neurri gisa kendu dio, bere aurkako ahozko epaiketa ireki baitu, lau delitu posiblerengatik, negozioetako ustelkeria barne.
EAJk eta EH Bilduk akordioa lortu dute enplegu publikoaren legearen erreforma aurrera ateratzeko
EH Bilduk abstentzioa emango du bihar, osteguna, Legebiltzarrean. Modu horretara, EAJk bultzatutako legearen aldaketa onartzea ahalbidetuko du. Horrez gainera, hiru urteko epean, legearen aplikazioari eta eraginkortasunari jarraipen bateratua egitea ere adostu dute bi taldeek.
Feijook hauteskundeak deitzeko eskatu dio beste behin Sanchezi: "Zu zara ustelen arteko lotura politikoa"
Euren agerraldietan, EH Bildu eta EAJ kritiko agertu dira Espainiako Gobernuarekin, eta legealdiari zentzua emateko eskatu diote Pedro Sanchez presidenteari.
Sanchezen esanetan, ustelak ezin dira zigorgabe geratu, "edonor izanda ere"
Espainiako Gobernuko presidenteak errespetua agertu du asteazken honetan Auzitegi Gorenak Jose Luis Abalos ministro ohiaren aurka emandako epaiari, eta ziurtatu du "inoiz ez" zuela izan Gobernuko eta alderdiko zenbait kideri eragiten dieten praktika ustelen berri, eta jakin izan balu, ez lituzkeela onartuko.
Moncloak azpimarratu du batzuek "huts egin" diotela Sanchezi eta ez duela dimisioa eman beharrik
Astelehen honetan, Alberto Nuñez Feijoo PPko buruzagiak Espainiako Gobernuko presidentearen dimisioa eskatu zuen berriro ere, Auzitegi Gorenak Abalosi 24 urteko kartzela-zigorra ezarri ostean.
Froga batzuen abal judiziala egiaztatzen ez bada, kasua baliogabea izatea planteatu du Zapaterok
Espainiako Gobernuko presidente ohiak hainbat idatzi igorri dizkio epaileari, Plus Ultra airelinearen erreskatearen inguruko eraginen trafikoko sare baten ustezko buruzagi moduan ikertu gisa deklaratu ostean.
Pradales: "Asko dago egiteko; bide orriak euskal agendan sakontzea dakar"
Lehendakariak agintaldiaren lehen erdiaren balantzea egin du Ajuria Enean, ekitaldi instituzional batean. Bere hitzaldian, Euskadin lantzen den egonkortasuna nabarmendu du, "oso ezegonkorra" den testuinguru globalean aurrerapena, ongizatea eta autogobernua bermatzeko faktore erabakigarri gisa.