'Preso politikoak' eta 'erbestea' esamoldeak erabiltzea debekatu diote TV3i

Bartzelonako Hauteskunde-batzordeak TV3eko eta Catalunya Radioko albistegiei 'preso politikoak', 'erbestea' eta 'errepresioari epaiketa' esamoldeak erabiltzea debekatu die ostegun honetan, alderdi zehatz batzuen hizkuntzaren parte direla iritzita.

Hauteskunde-batzordearen ebazpenaren arabera, esamoldeen erabilpena "aniztasun politiko eta sozialaren aurkakoa da, baita berdintasun, proportzionaltasun eta neutraltasun informatiboaren kontrakoa ere". Batzordearen hitzetan, printzipio horiek komunikabide publikoen jarduera gidatu behar dute hauteskunde garaian.

Corporacio Catalana de Mitjans Audiovisuals (CCMA) kudeatutako komunikabide publikoek “indarrean dagoen legeditik at dauden praktika informatiboak saihestu behar dituzte, hauteskunde garaiko neutraltasun informatiboari kalterik ez egiteko”, Hauteskunde-batzordeak azaldu duenez.

Era berean, Auzitegi Gorenean buruzagi independentisten aurka egiten ari diren prozesuari erreferentzia egiteko, ‘errepresioari epaiketa” hitzak erabili behar ez direla uste du Batzordeak. "Zuzenbidezko Estatuaren arauen araberako epaiketa" dela erantsi du.

Ciudadanosek eraman zuen gaia Hauteskunde-batzordera, baita martxoaren 16an, Madrilen presoen alde egindako manifestazioaren emankizuna ere.

Zentzu horretan, CCMMA zigortzeko espedientea abiatzea eskatu du Hauteskunde-batzordeak, manifestazioaren estalduran aniztasun politikoa eta neutraltasun informatiboa urratzea leporatuta.

Quim Torra Generalitateko presidenteak TV3i babesa adierazi dio, eta Hauteskunde-batzordeari “inpartzialtasun eza” egotzi dio.

“Batzordearen inpartzialtasun ezak komunikabide publikoen edukiak erabakitzera eraman du hauteskunde kanpainatik at. Zentsuraren banderarekin lotsagabe azaltzen da estatu autoritarioa”, deitoratu du Torrak Twitter sare sozialean.

Azkenik, adierazpen eta informazio askatasunari babesa adierazi dio Generalitateko presidenteak.

L'absència d'imparcialitat de la Junta Electoral els porta a dictar els continguts dels mitjans públics fora de campanya electoral. Un estat autoritari que s’exhibeix amb tot l’impudor de la censura com a bandera. Tot el suport a TV3 i a la llibertat d'expressió i d'informació! https://t.co/L0TABeMJLN

— Quim Torra i Pla (@QuimTorraiPla) 28 de marzo de 2019