Sanchezek Afrikara bidaia hasi du migrazioaren gaia aztertzeko

Pedro Sanchezek Afrikara bidaia hasi du asteartean. Mauritania, Gambia eta Senegal bisitatuko ditu, herrialde horien garapenarekiko konpromisoa berretsi eta migrazio irregularraren aurrean lankidetza areagotzeko.

Izan ere, migratzaileen iritsiera etengabea izaten ari da azken asteetan eta udazken beroa aurreikusten da gai honetan. Gauzak horrela, bidaia honekin Sanchezek adierazi nahi du migratzaileen jatorrizko lurraldeak eta bidean pasatzen dituztenak ez daudela bakarrik.

Gobernuko iturrien arabera, bira osatzen duten herrialdeekiko lankidetza ona da. Hala ere, azpimarratu dute beti dela posible hobetzen jarraitzea, "Sahelen ezegonkortasunean kezka berezia sortzen duen arazo baten aurrean". Indartzea aurreikusten den alderdietako bat migrazio zirkularra da. Horren bidez, jatorrizko herrialdeetan dauden pertsonak kontratatzen dira Espainian aldi baterako lan egiteko, eta, lan hori amaitutakoan, beren herrialdera itzultzen dira.

Izan ere, migratzaileen iritsiera etengabea izan da azken asteetan, bereziki Kanaria Uharteetan eta Ceutan.

Ceutan, batez beste, 700 saiakera egin dira egunero, modu irregularrean, abuztuaren 22tik. Egun bakar batean 1.500 saiakera izatera ere iritsi ziren. Horietako asko igerian iristen saiatzen dira, Tarajaleko kai-muturra inguratuz.

Juan Jesus Vivas (PP) hiri autonomoko presidenteak "Estatuaren eta erkidegoen babesa" eskatu du. Segurtasun indarrek baliabide gehiago behar dituztela ere jakinarazi du. Era berean, Cristina Perez Gobernuko ordezkariak onartu du adingabeentzako zentroak "hiriaren gaitasunaren oso gainetik" daudela.

Kanaria Uharteetara ere etengabea da migratzaileak dakartzaten ontzien iritsiera; astelehenean bi iritsi ziren Hierrora, 136 eta 51 pertsonarekin, hurrenez hurren. Abuztuaren 15era arte 22.304 pertsonaren iritsiera erregistratu du Artxipelagoko Gobernuak, 2023ko aldi berean baino % 126,1 gehiago. Gainera, bakarrik etorritako 5.200 adingabe migratzaile inguru ditu tutoretzapean.

Egoera horren aurrean, Fernando Clavijo (CC) presidenteak inplikazio handiagoa eskatu dio Europar Batasunari, artxipelagoak bizi duen migrazio-egoerari konponbidea aurkitzeko, eta Ursula von der Leyen Europako Batzordeko presidentea gonbidatu du, egoera eta haren aurrean nola lan egiten duten bertatik bertara ikusi dezan.

Bitartean, Madrilen, PP eta PSOE ez dira ados jartzen inmigrazio kontuetan, eta elkarri leporatzen diote Atzerritarren Legearen erreforma blokeatuta izatea.

Borja Semper Alderdi Popularreko bozeramaileak lege hori erreformatzeko Gobernuarekin akordioa lortzeko aukera urrundu du eta ekintzarik eza leporatu dio Sanchezi. Presidenteen Konferentzia deitzea, migrazio-larrialdia deklaratzea edo adingabe migratzaileak hartzen dituzten autonomiei baliabideak ematea dira gai honetan dituen hiru eskakizun nagusiak. Era berean, Sanchezek Kongresuko osoko bilkuran agerraldia egitea nahi du, hartuko dituen neurriak azaltzeko.

Bestalde, PSOEk PPri egotzi dio erreforma bertan behera gelditu izana bere kontrako botoarekin, eta Alberto Nuñez Feijoo buruzagiari eskatu dio argi uzteko bat egiten duen ala ez Voxek eta Luis 'Alvise' Perezek inmigrazioaren alorrean duten jarrerarekin.