Lehendakaria AEBn da jada, "aliantza berriak" bilatzeko

Imanol Pradales lehendakaria AEBra iritsi da jada. Lau egunez, Washingtonen eta New Yorken egongo da, eta bilerak egingo ditu AEBko biltzarkideekin eta senatariekin, Solomon R. Guggenheim Fundazioarekin, euskal komunitateekin, sektore aeroespazialeko eta BTIko euskal enpresa-talde batekin, eta baita IBM hub kuantikoarekin ere, Donald Trump presidentearen politikek Euskadiko ekonomiari eta enpresei nola eragin diezaieketen jakiteko, besteak beste.

Pradalesek AEBra egingo duen lehen bidaia ofiziala astelehen arratsaldean hasiko da, Washingtongo euskal komunitateari egingo dion harrerarekin. Asteartean, sektore aeroespazialeko eta BTIko euskal enpresa talde batekin bilduko da, AEBko industria aeroespazialaren eta euskal ekosistema aeronautikoaren esperientziak eta ezagutzak trukatzeko.

Eguerdi aldera, 2016an Kapitolioko Bakearen parkean landatutako Gernikako Arbolaren kimua bisitatuko du, eta, ondoren, George Washington Unibertsitateko School of Media & Public Affairs-en egingo den topaketa batean parte hartuko du irakasle eta ikasleekin.

"Demokrazia, harreman transatlantikoak eta multilateralismoa: nazioarteko eszenatoki berriaren ikuspegi europarra" lelopean, mahaiak AEBren eta Europaren arteko harremanen fase berri bati nola ekin aztertuko du. Gaurkotasun geopolitikoa, harreman transatlantikoa, segurtasuna, merkataritza eta muga-zergen politika izango dira mahai-inguruaren ardatz, baita AEBn demokrazia eta erakundeak indartzeko balio dezaketen esperientziak ere.

Bilera demokratekin eta errepublikanoekin

Asteartean, halaber, John Garamendi Alderdi Demokrataren biltzarkidearekin bilduko da. Garamendi euskal jatorrikoa da, eta AEBko euskal lobbyaren gizon boteretsuenetako bat, Euskadiren eta Estatu Batuen arteko administrazioen eta enpresen arteko topaketak bideratzeko duen eraginagatik.

Ondoren, Senatuan Idaho estatua ordezkatzen duen James E. Risch Alderdi Errepublikanoaren senatariarekin bilduko da; Senatuko kide kontserbadoreenetakotzat jotzen omen dute. Boisen bizi den euskal komunitatearen berri du Rsichek. 

AEBko bi agintari horiekin Donald Trumpek Etxe Zurira itzuli zenetik abian jarritako politika berriaz arituko da lehendakaria, eta politika horrek Euskadiko ekonomiari eta enpresei nola eragin diezaiekeen galdetuko die zuzenean.

Asteazkenean New Yorkera

Asteazkenera begira, lehendakaria New Yorkera joango da, eta Solomon R. Guggenheim Fundazioaren arduradun nagusiekin bilduko da. Bilera horretan, Ibone Bengoetxea lehen lehendakariorde eta Kultura eta Hizkuntza Politikako sailburua eta Elixabete Etxanobe Bizkaiko ahaldun nagusia ere izango dira.

Topaketa horretan, museoaren etorkizuneko erronken gainean hitz egingo dute, hala nola bilduma propioa bultzatzea, museoaren nazioarteko dimentsioa indartzea eta "Euskadiko ekosistema kulturala garatzeko funtsezko" palanka izaten jarraitzea, besteak beste.

Egun honetan bertan, Imanol Pradalesek harrera egingo dio New Yorkeko euskal komunitateari. Euskal jatorriko pertsona ugari dago New Yorken, askok bertan osatu dituzte familiak, eta bigarren eta hirugarren belaunaldiko oinordekoak dituzte; beste batzuk, berriz, iritsi berriak dira. Horietako hainbatekin bilduko da lehendakaria. 

Bidaia ostegunean amaituko da. Lehendakariak IBM enpresa bisitatuko du, Eider Mendoza Gipuzkoako ahaldun nagusiarekin batera. Gaur egun, IBM BasQ estrategia abiarazteko euskal erakundeen aliatuetako bat da. BasQ ekimena Eusko Jaurlaritzako Zientzia, Unibertsitate eta Berrikuntza Sailak zuzentzen du, Arabako, Bizkaiko eta Gipuzkoako foru aldundiekin batera, eta Euskadi munduko hub kuantiko nagusien artean kokatzea du xede.