EBko hainbat estatukide duda-mudan daude, euskara, katalana eta galiziera ofizial egiteko eztabaidan

Ziurgabetasuna nagusitu da azken orduetan Europar Batasuneko (EB) Gai Orokorren Kontseiluaren baitan. EBko estatukideek gaur dute bozkatzekoa euskararen, katalanaren eta galegoaren ofizialtasuna desblokeatzeko eta erakundeetan erabilgarri izateko ekimena. Dena dela, EBko estatukide batzuek, tartean Finlandiak, Suediak, Austriak eta Kroaziak, "zalantza legalak" agertu dituzte. Ifrentzuan, Danimarkak eta Esloveniak iragarri dute ez dutela kontrako botorik emango.

Dena dela, eztabaida gai-zerrendan dago eta eguerdirako espero da bozketa egitea. Proposamena aho batez, kontrako botorik gabe, onartu behar dute Gai Orokorren Kontseiluan. Hala ere, abstentzioak egonez gero, ekimena ez litzateke atzera botako. 

"Auzia ez dago argi, espero dut gaur bozkatu beharrik ez izatea", esan du Joakim Strand Finlandiako Europako Gaietako ministroak kontseilura heltzean. Stranden arabera, EBko Kontseiluko zerbitzu juridikoek azaldutako "zalantza juridikoak seriotasunez aztertu behar dira".

Ildo beretik mintzatu da Jessica Rosencrantz Suediako ministroa ere: "Suedia eta beste herrialde batzuek errezeloak agertu ditugu, ebaluazio juridikoari eta kostuei dagokienez".

Claudia Plakolm Austriako ministroak ere, berdin: "Oraindik kontu juridikoak eta kostuen ingurukoak ditugu mahai gainean".

Andreja Metelko-Zgombic Kroaziako Europarako Estatu idazkariak uste du eztabaida nola garatzen den ikusi arte itxaron behar dela. "Espainiako Gobernuak gaian egin dituen eginahalak aintzat hartzen ditugu. Gaia oso serioa da eta legezko inplikazioak ditu. Oso ondo aztertu behar da", nabarmendu du. 

"Lehen aldiz erabakiko da Gai Orokorren Kontseiluko mailan zerbait. Ikusiko dugu zein bilakaera duen, eta, bileraren ondotik, erantzungo dizuet", adierazi die kazetariei Janos Boka Hungariako Europako gaietako ministroak.

Frantzia eta Zipre, ulerkorrago

"Adostasunak" gai honetan duen garrantzia azpimarratu du Benjamin Haddad Frantziako Europarako Estatu idazkariak. "Gure lagun espainiarrekin lanean ari gara, eta errespetatzen dut eurentzat oso garrantzitsua izatea", aitortu du.

Marilena Raouna Zipreko Europako Gaietarako ministro ordeak gogorarazi duenez, "sistematikoki babestu" dute Espainiako Gobernua eta jakin badakite "Espainiarentzat zein garrantzitsua den". Nolanahi ere, azpimarratu du "estatukide guztiak ados egon" behar direla eta bermatu behar dela erabakiak ez duela "aurrekaririk ezartzen". 

Danimarkak eta Esloveniak ez dute kontra bozkatuko

Kontrara, Danimarkak aurreratu du ez duela kontra bozkatuko. Marie Bjerre Europako gaietarako ministro sozialdemokratak argudiatu duenez, "oso auzi garrantzitsua da Espainiarentzat".

Marko Stucin Esloveniako Europako gaietarako Estatu idazkariak ere gauza bera azaldu du. "Zalantzak, arazo juridiko eta finantza arlokoak daude. Zaila da jakitea zer gertatuko den". 

Espainiako Gobernuak asteak daramatza Europako kideekin hitz egiten, euren errezeloei aurre egiteko asmoz. Italiak eta Baltikoko estatuek azaldu dituzte zalantza gehien, eta horiek konbentzitzea da gakoa. 

Onartuko balitz, Europako hizkuntza ofizialak 27 lirateke aurrerantzean (gaur egun, 24 dira) eta euskara, katalana eta galegoa EBko erakunde guztietan erabiltzeko eta lanerako hizkuntzak lirateke.

Araudiaren arabera, hizkuntzok erabilgarri egiteko kostua Europar Batasunaren aurrekontuarekin finantzatu behar da. Nolanahi ere, Espainiako Gobernuak proposatu du kostua bere gain hartzea. Sanchezen gobernuak ez du horren aurrekontu zehatzik eman, baina Bruselak 2023ko abenduan egindako azterlan baten arabera, urtean 132 milioi euro inguru izan lirateke (gaelikoaren esperientzian oinarrituta egin zituzten kalkuluak).

Ziurgabetasuna nagusitu da azken orduetan Europar Batasuneko (EB) Gai Orokorren Kontseiluaren baitan. EBko estatukideek gaur dute bozkatzekoa euskararen, katalanaren eta galegoaren ofizialtasuna desblokeatzeko eta erakundeetan erabilgarri izateko ekimena. Dena dela, EBko estatukide batzuek, tartean Finlandiak, Suediak, Austriak eta Kroaziak, "zalantza legalak" agertu dituzte. Ifrentzuan, Danimarkak eta Esloveniak iragarri dute ez dutela kontrako botorik emango.

Dena dela, eztabaida gai-zerrendan dago eta eguerdirako espero da bozketa egitea. Proposamena aho batez, kontrako botorik gabe, onartu behar dute Gai Orokorren Kontseiluan. Hala ere, abstentzioak egonez gero, ekimena ez litzateke atzera botako. 

"Auzia ez dago argi, espero dut gaur bozkatu beharrik ez izatea", esan du Joakim Strand Finlandiako Europako Gaietako ministroak kontseilura heltzean. Stranden arabera, EBko Kontseiluko zerbitzu juridikoek azaldutako "zalantza juridikoak seriotasunez aztertu behar dira".

Ildo beretik mintzatu da Jessica Rosencrantz Suediako ministroa ere: "Suedia eta beste herrialde batzuek errezeloak agertu ditugu, ebaluazio juridikoari eta kostuei dagokienez".

Claudia Plakolm Austriako ministroak ere, berdin: "Oraindik kontu juridikoak eta kostuen ingurukoak ditugu mahai gainean".

Andreja Metelko-Zgombic Kroaziako Europarako Estatu idazkariak uste du eztabaida nola garatzen den ikusi arte itxaron behar dela. "Espainiako Gobernuak gaian egin dituen eginahalak aintzat hartzen ditugu. Gaia oso serioa da eta legezko inplikazioak ditu. Oso ondo aztertu behar da", nabarmendu du. 

"Lehen aldiz erabakiko da Gai Orokorren Kontseiluko mailan zerbait. Ikusiko dugu zein bilakaera duen, eta, bileraren ondotik, erantzungo dizuet", adierazi die kazetariei Janos Boka Hungariako Europako gaietako ministroak.

Frantzia eta Zipre, ulerkorrago

"Adostasunak" gai honetan duen garrantzia azpimarratu du Benjamin Haddad Frantziako Europarako Estatu idazkariak. "Gure lagun espainiarrekin lanean ari gara, eta errespetatzen dut eurentzat oso garrantzitsua izatea", aitortu du.

Marilena Raouna Zipreko Europako Gaietarako ministro ordeak gogorarazi duenez, "sistematikoki babestu" dute Espainiako Gobernua eta jakin badakite "Espainiarentzat zein garrantzitsua den". Nolanahi ere, azpimarratu du "estatukide guztiak ados egon" behar direla eta bermatu behar dela erabakiak ez duela "aurrekaririk ezartzen". 

Danimarkak eta Esloveniak ez dute kontra bozkatuko

Kontrara, Danimarkak aurreratu du ez duela kontra bozkatuko. Marie Bjerre Europako gaietarako ministro sozialdemokratak argudiatu duenez, "oso auzi garrantzitsua da Espainiarentzat".

Marko Stucin Esloveniako Europako gaietarako Estatu idazkariak ere gauza bera azaldu du. "Zalantzak, arazo juridiko eta finantza arlokoak daude. Zaila da jakitea zer gertatuko den". 

Espainiako Gobernuak asteak daramatza Europako kideekin hitz egiten, euren errezeloei aurre egiteko asmoz. Italiak eta Baltikoko estatuek azaldu dituzte zalantza gehien, eta horiek konbentzitzea da gakoa. 

Onartuko balitz, Europako hizkuntza ofizialak 27 lirateke aurrerantzean (gaur egun, 24 dira) eta euskara, katalana eta galegoa EBko erakunde guztietan erabiltzeko eta lanerako hizkuntzak lirateke.

Araudiaren arabera, hizkuntzok erabilgarri egiteko kostua Europar Batasunaren aurrekontuarekin finantzatu behar da. Nolanahi ere, Espainiako Gobernuak proposatu du kostua bere gain hartzea. Sanchezen gobernuak ez du horren aurrekontu zehatzik eman, baina Bruselak 2023ko abenduan egindako azterlan baten arabera, urtean 132 milioi euro inguru izan lirateke (gaelikoaren esperientzian oinarrituta egin zituzten kalkuluak).