Kongresuak bertan behera utzi du 'itzalaldien aurkako' dekretua

Pedro Sanchezen gobernuak sistema elektrikoa indartzeko eta itzalaldiak saihesteko prestatutako dekretua ez da aurrera atera, neurriak ez duelako behar besteko babesa lortu astearte arratsaldean Kongresuan egin duten bozketan. 

Podemosek, Juntsek eta BNGk, Espainiako Gobernuaren inbestidurarako hiru kidek, kontrako botoa eman dute. Horiez gain, PPko eta VOXeko diputatuek ere ezezko botoa eman dute, baita Sumar koalizioko Jorge Pueyo diputatua ere. 

Bestalde, ERCk, EAJk, EH Bilduk eta Kanariar Koalizioak baiezkoa eman dute. Jose Luis Abalos ministro sozialista ohiak ere, Talde Mistoaren baitan, alde bozkatu du, eta azken emaitza 183 boto izan dira aurka, 165 alde eta abstentziorik ez.

Bozketari ekin aurretik, Idoia Sagastizabalek iragarri du EAJk baiezkoa emango diola neurri horri, eta azpimarratu du adi egongo direla Espainiako Gobernuaren energia arloko konpromisoen bilakaerari, hala nola industria lehenetsiko duen plangintza elektriko bati eta energia garraiatzeko sareetan inbertitzeko gehieneko mugak handitzeari.

"Zilegi izan daiteke gobernu bat agintetik kentzen saiatzeko dekretu bat bertan behera uzten saiatzea, baina horrela ez da Espainiako Gobernua edo oligopolioa kaltetzen, herritarrak baizik", salatu du Mikel Otero EH Bilduko kideak.

ERCko Teresa Jordak aurreratu du haren taldeak neurria babestuko duela, "xalotasun izpirik gabe, baina sistema elektrikoa babesteko, trantsizio energetikoa bizkortzeko eta geldikeriaren egiturazko kolapsoa saihesteko jardutea ezinbestekoa dela sinetsita".

Talde mistoaren baitan, Compromisek eta Kanariar Koalizioak dekretua  babestu dute. Bigarren alderdi horren kasuan, Cristina Valido diputatuak ekimen sorta hori aurrera ateratzeko deia egin die diputatuei.

Podemos, Junts, BNG, PP eta VOX, neurriaren kontra

PPk adierazi dutenez, ez daude ados testuan itzalaldiari egiten zaion aipamenarekin, eta kritikatu dute apirilaren 28an Espainia 24 orduz elektrizitaterik gabe geratu ondoren ez dela dimisio edo kargugabetze bakar bat ere izan.

Testuak jasotzen dituen beste gai batzuei dagokienez, PPk uste du edukia osatu gabe dagoela. Horregatik, Alberto Nuñez Feijooren alderdiak aurreratu du lege proposamen bat aurkeztuko duela Kongresuan, autonomia erkidegoekin koordinatuta, energia arloko inbertsioak bermatzeko.

"Ez dugu babesten koherentziagatik, ardura politikoagatik eta egiarekiko errespetuagatik", adierazi du Guillermo Mariscal diputatu popularrak. Espainian eta Portugalen izandako gertakaria "Gobernu honen hondamendi kudeaketaren emaitza zuzena izan zen", gaineratu du.

Juntsek berriro adierazi du haserre dagoela Espainiako Gobernuaren "noraezarekin", eta Pedro Sanchez presidenteari eskatu dio erreakzionatzeko, uste baitu legegintzaldiak ezin duela horrela jarraitu.

Miriam Nogueras Juntseko bozeramaileak ez du beren-beregi aurreratu aurka bozkatuko duen ala ez, baina oso kritiko agertu da Kataluniako agenda "geldirik" duelako eta talde parlamentarioak "muturrera" eramaten dituelako testu legegile bat aurkezten duen bakoitzean.

Bestalde, Ione Belarra Podemoseko idazkari nagusiak adierazi du dekretuak ez duela neurri garrantzitsurik jasotzen itzalaldi berri bat saihesteko, eta antzeko gertaera bat berriro gertatzeko aukerak "berberak" direla, dekretua onartuta egon ala ez.

Antzeko adierazpenak egin ditu BNGk ere. Nestor Rego diputatuak argudiatu duenez, testuarekin botere handiagoa ematen zaie enpresa elektriko handiei, eta trantsizio energetikoaren eredu "jasanezin eta oligopolioaren zerbitzura" sakontzen du.

Azkenik, Jose Maria Figaredo Voxek Kongresuan duen bozeramaile ekonomikoak adierazi du Espainiako Gobernuak erantzukizun zuzena izan zuela itzalaldian, eta dekretuarekin bilatzen zuena konpainia elektrikoen isiltasuna erostea zela.