Indarkeriak ez duela lekurik gazteei transmititzeko beharra nabarmendu du Pradales lehendakariak

Terrorismoaren "garai ilunak" eta Poliziaren indarkeria ezagutu ez dituzten gazteei mezu garbia eman nahi izan die Imanol Pradales lehendakariak. "Indarkeriak ez du lekurik gure gizartean eta sufrimendu amaigabea baino ez du eragiten", azpimarratu du.

Memoriaren Egunaren harira Gogora Institutuak antolatutako ekitaldian, gazteak eta indarkeria hizpide izan ditu lehendakariak. Horren esanetan, garrantzitsua da gazteak indarkeria alboratzearen garrantziaz jabetzea: "Demokrazia eta giza eskubideak ez daude bermatuta, eta iraganetik ikasi behar dugu akatsak ez errepikatzeko". 

"Euskadin azken hilabeteetan gertatutako batzuk errepasatzea nahikoa da egiaztatzeko oraindik ere bide luzea eta atzera egiteko arriskua dagoela", ohartarazi du Pradales lehendakariak. "Muturreko jarreren eta populismoen aurrean, eta indarkeriara jo gabe, demokraziak baliabideak" badituela uste du lehendakariak. 

Testuinguru horretan, lehendakariak beharrezkotzat jotzen du balio demokratikoak indartzea eta indarkeriaren eragina gogoraraztea, baita bakea defendatzeko "adorea" izan zutenena ere. 

Iragana aldatzerik ez badago ere posible da indarkeria pairatu dutenen "sufrimendua arintzea" edo "ez areagotzea", jarraitu du lehendakariak: "Gure esku dago bizikidetzaren oinarriak finkatzea, indarkeriari zilegitasuna kentzea eta biktima guztiak aitortzea".

Horretarako ezinbestekoa da, lehendakariaren esanetan, "memoria egunero elikatzea" eta ariketa hori "zintzoa eta eraikitzailea" izatea, "indarkeria mota guztiek eragindako mina bidegabea dela epelkeriarik gabe onartzea". 

Maria Jesus San Jose Justizia eta Giza Eskubideen sailburuak, bere aldetik, indarkeriaren biktimak "ahanzturaren biktima" izan ez daitezen lan egitea defendatu du. 

Ekitaldian terrorismoaren (ETA, GAL eta eskuin muturreko taldeen) eta Poliziaren indarkeriaren 50 biktima baino gehiago izan dira, eta horietako hiruk (Maixabel Lasa, Amelia Machimbarrena eta Ixone Fernandez) Ainhoa Zugasti Eusko Jaurlaritzako Giza Eskubideen eta Biktimen Arretarako zuzendariak zuzendutako solasaldian parte hartu dute.

Eusko Legebiltzarra

Bestalde, Eusko Legebiltzarrean EAJko, EH Bilduko, PSE-EEko eta Sumarreko legebiltzarkideek lore-eskaintza egin dute biktimei eskainitako "Gauerdiko Iparrorratza" eskulturaren aurrean. PPk eta Voxek ez dute parte hartu, horrelako ekintzek biktima mota eta indarkeria mota desberdinak "nahasten" dituztela argudiatuta.

Etxerat

Ekitaldi instituzional horren aurretik, Etxerat ETAko presoen senideen elkarteak deitutako elkarretaratzea egin da Ganberaren atarian. "Dispertsio- eta urrunketa-politikek eragindako sudrimendua eta zigor erantsiak" salatu dituzte, eta "espetxeetara egindako bidaietan hil ziren 16 euskal presoen senide eta hurbilekoen memoria kolektiboa" zabaltzeko beharra azpimarratu dute.

"Borondatea eskatzen diegu arduradun politiko zein alderdiei, memoria osoaren eta bizikidetzaren eraikuntzaren logikan urratsak ematen jarraitu ahal izateko. Borondatea eskatzen diegu esku artean dituzten erremintak erabil ditzaten sufrimendua eragiten jarraitzen duen 16 biktima hauen aitortza instituzionala irits dadin", esan du Naroa Hernandez Etxeraten eledunak. 

EH Bilduko ordezkariak izan dira elkarretaratzean.

Alderdi Popularra

PPk, berriz, ekitaldi propioa antolatu du Gasteizen, terrorismoaren biktimen monumentuan. Lore-eskaintza eta minutu bateko isilunea egin dute bertan. 

Javier de Andres Alderdi Popularrak EAEn duen presidenteak hartu du hitza, eta esan du ezin direla indarkeriak "nahastu". "Terrorismoa babestu" zutenei "aitortza etikoa exijitzea" eskatu du.

Bilkura bateratua, Donostian

Donostian, aldiz, udal talde denek hartu dute parte biktimen omenezko ekitaldian, baita PPk ere. 

Jon Insausti alkatea buru zela, EAJko, PSE-EEko, EH Bilduko, Elkarrekin Podemoseko eta PPko udal ordezkariak izan dira Alderdi Ederren, terrorismoaren biktimen monolitoan, egin den lore-eskaintzan.

Bilboko Udala

Era berean Bilboko Udalak ere, Bakerako eta Elkarbizitzarako Bilboko Foroarekin elkarlanean, "terrorismoaren eta indarkeria politikoaren biktima guztiak" izan ditu gogoan. 

Aurten, lekuz aldatu dute ekitaldia, eta Atalase ekultura-multzoa dagoen tokian egin dute, Guggenheim Museoaren eta Euskadi plazaren artean. Juan Mari Aburto alkateak eta Elixabete Etxanobe Bizkaiko ahaldun nagusiak, eta bi erakundeotan ordezkaritza politikoa duten talde guztiek hartu dute parte, PPk izan ezik, agenda arazoak direla eta.