Konstituzioko laugarren xedapena indargabetzea eskatu du UPNk, "independentismoa hazten ari baita une honetan"

Nafarroa eta Euskal Autonomia Erkidegoa batzeko aukerari atea zabaltzen dion Espainiako Konstituzioaren laugarren xedapen iragankorra indargabetzeko ekimena aurkeztu du astearte honetan UPNk Diputatuen Kongresuan. 

Iruñean egindako agerraldi batean, Cristina Ibarrola UPNren presidenteak esan du xedapen hori "mehatxu bat" dela Nafarroarako. Haren hitzetan, "abertzaleak gustura" izan zitezen Konstituzioan txertatu zuten “mekanismoa” da. "Nafarren gehiengo zabal batek Nafarroa erkidego bereizi bat izatea nahi du Espainiako nazioaren barruan, eta ez beste ezer", zehaztu du. Hori esanda,  jarrera horrekin bat egiten duten alderdiei babesa eskatu die. "Euren burua foruzaletzat duten alderdiei eskatzen diegu Nafarroa foralaren alde egin dezatela".

Hain zuzen, Formenterako irlak Senatuan eserleku bat lortzeko zabalduko den erreforma baliatuta eman du pausoa alderdi erregionalistak. Balear Uharteek eraman dute gaia Kongresura, lege proposamen baten bidez, eta UPNk proposamenari aurkeztutako zuzenketa batean eskatu du laugarren xedapena baliogabetzea. Lehendabiziko pausoa Kongresuko Mahaiak ekimena tramitera onartzea izango da. 

Ibarrolak aitortu du ez dutela inorekin hitz egin gai honetaz, babesa lortzeko. Nolanahi ere, zenbait alderdik ekimenarekin bat ez egitea "harrigarria" izango litzatekeela esan du. 

Esan du UPNren aspaldiko nahia dela artikulu hori indargabetzea, Konstituzioa erreformatuta, eta ekimena orain aukezteko premia "euskal independentismoa" izaten ari den bilakaerak ekarri duela aipatu du. "Euskal independentismoa hazten ari baita", aukera "historikoa" ikusten dute gaia Kongresura eramateko. "EH Bildu eta Otegi erabakiak hartzen" eta "Gobernuak baldintzatzen" ari direla adierazi du.

“Uste dugu Nafarroak ateak itxi behar dizkiola amets independentistei (...), herritarrak engainatzen ari dira foruak subiranotasunarekin eta independentismoarekin nahastuz".