Kongresuak indargabe utzi du alokairuen kontratuak luzatzeko dekretua, PP, Vox eta Junts alderdien botoekin

Aurreikusitakoa bete da. PP, Vox eta Junts alderdiek euren botoak batu dituzte gaur Diputatuen Kongresuan, alokairuen kontratuen luzapena ahalbidetzen zuen dekretua bertan behera uzteko. Koalizio Gobernuaren ekimena zen, Sumarrek sustatutakoa, bereziki. 

UPN alderdi nafarrak ere kontra bozkatu du, eta EAJ abstenitu egin da. Gainerako taldeek, EH Bilduk tartean, aldeko boza eman dute. Hala, orotara, 166 diputatuk bozkatu dute alde, 177k aurka egin dute, eta 6 abstenitu egin dira. 

Aurten iraungitzen diren kontratuak (martxoaren 21etik abenduaren 31ra) bi urtez luzatzea eta errenta urtean gehienez ere % 2 igotzea jasotzen zuen arauak. Martxoaren 20tik zegoen indarrean, egun horretan onartu baitzuen Ministroen Kontseiluak. Gaurtik, baliogabe geratu da.

Bozketaren ondoren, Kongresuko pasilloetan egindako adierazpenetan, Pablo Bustinduy Espainiako Gobernuko Eskubide Sozialen ministroak iragarri du "behar den guztietan" eramango duela Gobernuak dekretua berriro Kongresura. 

Sumarreko kideak hitz eman du harik eta dekretua "errealitate bihurtu arte" lanean jarraituko dutela. Haren hitzetan, eskuineko taldeek “alderdikeriaz” jokatu dute, herritarren interesak kontuan hartu gabe. "Garesti ordainduko dute", esan du. 

Bere aldetik, Daniel Perez PPko diputatuak gogor salatu du gaurko saioan Isabel Rodriguez Etxebizitza ministroa egon ez izana, dekretua defendatzen. Buruzagi popularrak uste du Sumarren "exijentzien aurrean" PSOEk amore eman duela dekretu honekin, "boterean egun bat gehiago jarraitzeagatik". 

Eztabaida bizia

Gaurko saioak agerian utzi du, beste behin, etxebizitza politiketan jarrerak zein urrunduta dauden eskuinaren eta ezkerraren artean; erakunde publikoek merkatuan esku hartzea defendatzen dute batzuek, eta eredu liberala, besteek.

Bere hitzartzean, Osckar Matute EH Bilduren eledunak Kongresuan defendatu du merkatuan esku hartzea ezinbestekoa dela, espekulazioaren aurreran, maizterrak babesteko. Kritikatu du eskuineko alderdien jarrera, "milaka herritar" bazterrean uzteagatik, eta EAJri leporatu dio "aitzakiak" erabiltzea, dekretuari iskin egin eta ez bustitzeko. 

Bestelako azalpenak eman ditu Maribel Vaquero EAJko diputatuak, bere taldearen jarrera justifikatzeko: abstenitu egin dira, dekretua ez omen delako behar bezala negoziatu. Ordezkari jeltzalearen iritzian, etxebizitzaren krisiari erantzuteko "akordio baten faltan",  lege dekretuen "gehiegizko erabilera" egiten ari da Espainiako Gobernua. 

Diputatu kataluniarren arteko ika-mika ere bizia izan da. Gabrel Rufian ERCko diputatuak Juntsen jarrera zein izan den azaltzeko, 50 euroko billetea atera du, eta honakoa esan du: "Hau da zuek PP eta Voxekin partekatzen duzuen bandera, hiru miloi herritar izorratzeko".  Alderdiaren "interesen arabera" jardutea egotzi dio Carles Puigdemonten alderdiari. 

Aurretik, Marta Madrenas Juntseko ordezkariak "propagandatzat" jo du alokairuen inguruko dekretua.  "Juridikoki akats asko" dituelako bozkatu dutela aurka azaldu du.