Lucarten erosketa 35 kaleratzerekin onartu du CELen enpresa-batzordeak

CELeko enpresa-batzordeak, konkurtsoko administrazioak eta Lucart multinazionalak Italiako taldea paper-ekoizlean sartzea adostu dute gaur. Akordioak 35 langile kaleratzea ekarriko du, horietako 31 adosturik eta 4 ez.

Konkurtsoko administrazioak hala ezarrita, Lucart Italiako taldearekin akordioa sinatzeko epea gaur bukatzen zen. CEL erosteko eskaintza bakarra Italiako konpainiak aurkeztu zuen hartzekodunen konkurtsoko markoan. CELek Enkarterrin (Bizkaia) eta Artziniegan (Araba) lantegiak ditu.

Akordiorik gabe enpresaren likidazioa eta kontratu guztien deuseztatzea zen aukera bakarra.

Azken negoziazioa

Enpresa-batzordeko iturriek azaldu dutenez, baja ez boluntarioak 5etik 4ra murriztea lortu dute azken negoziazioan, kaleratzeen kalte-ordaina hobetu dute eta soldata murrizketa jasan dituzten langileak kontuan izango dituzte etorkizuneko kontratazioetan.

31 baja boluntario horietatik, 10 langilek erretiroa hartuko dute, eta beste 21 beharginek lan-poltsa bat osatuko dute etorkizuneko kontratazioetarako.

Soldaten jaitsiera

Kaleratzeez gain, CELeko beharginek lan-erregulazio espediente berri bati aurre egin beharko diote akordioarekin. Soldatek % 20ko jaitsiera izango dute, % 8 80 langileren kasuan, eta % 50 zuzendari bakarraren nominan.

Zentzu horretan, konkurtsoko administratzaileak soldaten jaitsiera “bultzatu” duela kritikatu du CELeko enpresa-batzordeak. Oro har, Eusko Jaurlaritzak (akzioduna) eta Bizkaiko Foru Aldundiak lan gatazkan izan duten jokabidea salatu du langileen ordezkaritzak.