Eusko Jaurlaritzak 13.108 milioi euroko Aurrekontua aurkeztu du "susperraldi ekonomikoa" bultzatzeko
Gobernu Kontseiluak 13.108 milioi euroko aurrekontu proiektua onartu du 2022rako. % 6ko igoera izan du 2021ekoarekin alderatuta eta Euskadiren bultzada ekonomikoa du ardatz, inbertsio publikoa oinarri hartuta. Jaurlaritzak bere historian izan duen aurrekontu proiekturik handiena da,lehen aldiz 13.000 milioi euroko langa gainditu baitu.
Gobernu bileraren ostean emandako prentsaurrekoan, Pedro Azpiazu Jaurlaritzako Ekonomia eta Ogasun sailburuak azaldu duenez, "Aurrekontua Euskadiren susperraldirako prestatu dute eta inbertsio publikora bideratuko da".
Halaber, Europar Batasunak arau fiskalak bertan behera uztea dakarren "aurrekaririk gabeko aukera" aprobetxatzeko deia egin du sailburuak, 2022an defizitaren eta zorraren helburuak ezabatzeari dagokionez.
Horrela, datorren urtean 1.605 milioi euro bideratuko dituzte inbertsioetara, 2021ean baino % 50 gehiago, eta horietatik 165 milioi foru aldundiekin batera egingo den erakundeen arteko inbertsio planera zuzenduko dira. Gainera, I+Gren aldeko "apustu sendoa eta argia" egin dute, eta 588 milioi bideratu dituzte horretara, 2021ean baino ia % 10 gehiago.
Covid funtsa 543 milioitik 349 milioira jaitsiko da 2021ean. Hezkuntza eta Osasunerako zuzkidurak bere horretan jarraitu du, baina gainerako 194 milioi euroak, "zorraren amortizaziora bideratu zitezkeenak, gastu ahalmena handitzera pasatu dira Jaurlaritzaren erabakiz", 888 milioi euroraino, % 7,6 gehiago, Azpiazuren hitzetan.
Sailburuaren arabera, Aurrekontuaren helburua Euskadiko susperraldi ekonomikoa eta pandemian zehar galdutako enpleguak berreskuratzea da. "Erronka handia da eta erantzukizun handia dugu", esan du.
Aurrekontu proiektua Eusko Legebiltzarrera eramango dute ostiral honetan eta datorren astean sailburuek agerraldia egingo dute euren sailetako partida nagusiak azaltzeko. Ondoren, oposizioko taldeekin bilduko da sailburua. Aurrekontuak abenduaren 23an onartuko direla aurreikusten da.
Sailen araberako banaketa
Osasun Sailarentzat izango da aurrekontuen zati handiena, 4.352 milioi (% 4 baino gehiago). Osakidetzari bideratuko zaio gehiena, 3.333 milioi euro, hau da, 116 milioi gehiago. Farmaziako gastua egonkor mantendu da eta txertoena 19 milioira igo da (5 milioi gehiago).
Hezkuntza Sailak 3.235 milioi izango ditu (% 4,1). 41 milioi inbertsioetarako eta 61 milioi langile- eta funtzionamendu-gastuetarako (1.738 milioi) bideratuko dira, pandemiak martxan jarritako neurriei eutsi baitzaie. Hiru urtera arteko hezkuntzarentzat 30 milioi izango dira, Haurreskolak Partzuergoarentzat 60 milioi eta EHUrentzat 356 milioi.
Lan eta Enpleguak 936 milioi euro izango ditu (% 0,8 gutxiago), eta % 3ko igoera aurreikusten du diru-sarrerak bermatzeko errentan eta % 10ekoa etxebizitzarako prestazio osagarrietan; Ekonomiaren Garapen, Jasangarritasun eta Ingurumen Sailak, berriz, 777 milioi izango ditu (% 18,8 gehiago).
Aurrekontuetan igoerak izango dituzte industria-garapenak (41 milioi gehiago), teknologiak (19 milioi gehiago), eraldaketa digitalak (10 milioi gehiago), nekazaritzak (8,6 milioi gehiago) eta ingurumenak (7,7 milioi gehiago). Gainera, SPRI, Sprilur eta Parke Teknologikoen inbertsioen aurrekontua 58 milioiraino igo da, hau da, 40 milioi gehiago.
Segurtasunerako 725,1 milioi (% 4,8 gehiago) gorde dira eta Lurralde Plangintza, Etxebizitza eta Garraioetarako 564,4 milioi; hau da, % 4ko igoera izan dute. Hortik kanpo geratzen dira "Euskal Y"rako eta Hegoaldeko Trenbide Saihesbiderako 56,4 milioiak. Sail honetan, Trenbideko Garraioaren Azpiegitura eta Kudeaketa Programa nabarmentzen da, 40 milioi gehiago jasoko baititu. Gainera, Etxebizitzak 10 milioi euro gehiago izango ditu.
Berdintasun, Justizia eta Gizarte Politiketako Sailak 528,6 milioi euro izango ditu, % 14,5 gehiago. Emakundek 7,4 milioiko aurrekontua izango du, eta Garapenerako Lankidetzaren Agentziak 50,2koa. Gainera, 42,5 milioi bideratuko dira gizarte larrialdietarako laguntzetarako eta pobrezia energetikoaren aurkako laguntzetarako, eta Euskadira eskualdatu berri diren kartzelen kudeaketak 70 milioi eskuratuko ditu.
Kultura eta Hizkuntza Politika Saileko 322 milioietatik (% 11,2 gehiago) 161 milioi EITBrentzat dira (12,6 milioi euro gehiago) eta 46 HABErentzat; Gobernantza Publiko eta Autogobernu Sailak, berriz, 139,2 milioi euroko aurrekontua izango du (% 7,5 gehiago).
Ekonomia eta Ogasun Sailak 128,6 milioi izango ditu (% 42,7 gehiago), horietatik 50 Finkatuz Funtsarentzat izango dira; eta Turismo, Merkataritza eta Kontsumo Sailak 52,1 milioi izango ditu (% 10,2 gehiago).
Amaitzeko, Lehendakaritzak 35,5 milioi euroko partida izango du (% 9,6 gehiago), eta horietatik 1,1 Parisen Euskadiren ordezkaritza bat irekitzeko izango dira.
Albiste gehiago ekonomia
Nekazaritzako zenbait lan aldi baterako debekatu dituzte Nafarroan, sute arriskuaren aurrean
Horrela, Nafarroako lurralde osoan, debekatuta egongo da lurzoru urbanizaezinean nekazaritzako, basogintzako eta beste edozein motatako jarduerak egitea, baldin eta sua, makinak edo ekipoak erabiltzen badituzte eta horien funtzionamenduak baso-suteak sor baditzake leherketen, txinparten edo deskarga elektrikoen bidez.

Etxebizitzen salerosketa-kopurua % 29 igo zen ekainean Euskadin
2.314 da eragiketen zenbatekoa. Interes-tasek behera egin dute, eta horrek finantzaketa merkatzea eragin du.
Euskadiko etxebizitza berrien prezioa, maximo historikoetan: 3.450 euro metro koadroko
Nafarroa aurretik (% 6,4) dago etxebizitza berrien prezioaren urtebeteko igoerari erreparatuta. Hiriburuei banan-banan begiratuta, batez besteko preziorik altuena Donostian dago, gero, Bilbon, eta azkenik, Gasteizen.
Iazko datuekin alderatuta, 3.074 langabe gutxiago zenbatu dira Euskadin uztailean, eta 78.743 kontratu sinatu dira
Ekainean baino 1.600 langabe gehiago daude, 104.991 guztira. Nafarroan duela urtebete baino 801 langabe gutxiago zenbatu dira, eta Espainiako Estatuan, oro har, 1.357 langabe gutxiago daude, eta 21.865.503 kotizatzailera iritsi dira. Kotizatzaile-kopuruaren gaineko datua maximo historikoa da.
Kutxabank, Espainiako bankurik kaudimendunena Europako Banku Zentralaren arabera
Erakundeak aise gainditzen du Europako batezbestekoa erresistentzia-testetan, eta Espainiako finantza-sektoreko kapital- eta palanka-adierazle nagusien buru da.
Ardo-ekoizleek AEBko muga-zergen eragin handiaz ohartarazi dute: "Ardoa % 50 garestituko da"
Mariasun Saenz de Samaniegok (Ostatu) Europako ardoaren garestitzeaz ohartarazi du, eta merkatu berriak bilatzeko deia egin du, Estatu Batuetan salmentak galduko direlako.
BBVAk 5.447 milioi euro irabazi ditu ekainera arte, % 9,1 gehiago, Espainian eta Mexikon izandako negozioari esker
Entitateak merkatuaren aurreikuspenak gainditzeaz gain, datozen urteetarako aurreikuspenak hobetu ditu, Sabadell erosteko eskaintza publikoaren harpidetza irekitzeko atzerako kontaketa bete-betean murgilduta dagoela. Hala ere, erakundeak ez du baieztatzen abiaraziko dutenik eta atzera egiteko aukera zabalik uzten du.
Bruselak baieztatu du ardoak AEBn % 15eko muga-zerga izango duela ostiraletik aurrera
Arabako Errioxarentzat, Ameriketako Estatu Batuak oso garrantzitsuak dira, bigarren merkatua baita bolumenari dagokionez eta lehena balioari dagokionez. Horregatik, Amaia Barredo Nekazaritza sailburuak "bide diplomatikoa eta negoziazioa azken minutura arte agortzea" eskatu du, ardoa salbuespena izan dadin.
ArcelorMittalen mozkinak % 80 handitu dira mundu mailan, 2.268 milioi euroraino
Sestaon, Basaurin, Legution, Agurainen, Olaberrian, Bergaran, Berriobeitin, Legasan eta Lesakan fabrikak dituen taldeak 2025eko bigarren hiruhilekoari dagokion txostena argitaratu du.
Gorenak arrazoia eman dio Bizkaiko Ogasunari BEZaren auzian, eta Euskadik 700 milioi euro berreskuratuko ditu
Gorenak eman berri du Coca-Cola enpresaren BEZa dela eta Foru Ogasunak eta Estatukoak zuten desadostasunari buruzko epaia. Horrelako kasuetan BEZa nork bildu behar duen zegoen auzibidean, eta ebatzi du Bizkaiak egin behar duela.