Euskadik 8.664 kontratazio mugagabe erregistratu ditu 2022ko lehen hilabetean

Euskal Autonomia Erkidegoak (EAE) 8.664 kontratazio mugagabe erregistratu ditu 2022ko lehen hilabetean. Joan den hilean sinatutako kontratu guztietatik, 8.664 mugagabeak izan ziren, aurreko hilean baino 1.862 gehiago (% 27,37) eta 2021eko urtarrilean baino 3.391 gehiago (% +64,31).

Bestalde, ohi bezala, langabezia igo egin da urtarrilean: 1.099 langabe gehiago daude enplegu-zerbitzu publikoen bulegoetan izena emanda urtarrilean, abenduarekin alderatuta (% 0,96 gehiago); beraz, guztira 115.944 langabe daude. Kopuru hori, ordea, 2021eko urtarrilean baino 14.786 langabe gutxiago dira (% -11,31), Eusko Jaurlaritzako Lan eta Enplegu Sailaren eta Lan eta Gizarte Ekonomia Ministerioaren datuen arabera.

Langabeziak gora egin du 2021eko lehen hilabetean emakumeen artean (1.494 langabe gehiago), eta behera egin du gizonen artean (395 langabe gutxiago). Urte arteko aldakuntzan, langabeziaren jaitsiera gizonen (-7.582) eta emakumeen (-7.204) artean gertatu da.

Lurraldez lurralde aztertuta, langabezia % 0,63 hazi da Araban, abenduan baino 122 langabe gehiagorekin, eta 19.536 langabe daude. Gipuzkoan igoera % 1,01ekoa izan da, 310 langabe gehiagorekin eta 30.863 langabe  daude. Bizkaian % 1,03 egin du gora (667 langabe gehiago) eta 65.545 langabe daude.

Iazko datuekin alderatuta, langabeziak % 11,90 egin du behera Araban, % 11,76 Gipuzkoan eta % 10,92 Bizkaian.

Hileko bilakaeran, Euskal Autonomia Erkidegoan langabeziak Estatuko batez bestekoa (% 0,55) baino lau hamarren gehiago egin du gora; urte arteko jaitsiera, berriz, Estatuko batez bestekoa ( % 21,22) baino hamar puntu txikiagoa da, eta txikiena erkidego guztien ehunekoei dagokienez.

Eusko Jaurlaritzak ohar batean jakitera eman duenez, langabeziaren igoera "albiste txarra da beti, lan bila ari diren eta aurkitzen ez duten pertsonez ari garelako. Eta gaur egun duela hilabete baino pertsona gehiago daude langabezian".

Hala ere, historikoki gertatzen den zerbait dela aipatu dute, "bai urte onetan, bai urte txarretan". Ildo horretan, urtarrilean, "Gabonetan eskari handienari erantzuteko egindako kontratuei amaiera ematen zaie", azaldu dute. Izan ere, igoera hori zerbitzuen sektorean gertatzen da, eta industrian eta eraikuntzan, berriz, langabeziak behera egiten du.

"Hiru lurraldeetan gertatzen da hori. Ondorioz, kaltetuenak emakumeak dira, langabezian dauden pertsona berri gehienak", adierazi dute. Beraz, igoera hori aldi baterako kontratuekin zuzenean lotuta dagoela azpimarratu dute.

Datu txar hori gorabehera, "gaur egun, pandemia piztu aurretik baino pertsona gutxiago daude langabezian, eta duela urtebete baino gutxiago. Baina lan-esparru bat behar dugu, aldi baterako kontratuak eta kontratu prekarioak murriztuko dituena eta kaleratzea azken aukeratzat hartuko duena", esan dute.

Nafarroan 2.764 kontratu mugagabe daude, % 32,76 gehiago

Urtarrilean 791 langabe gehiago (% 2,47) izan dira Nafarroan, 32.817 pertsonara iritsi arte. Hala ere, urte arteko datuei erreparatuz gero, langabeziak behera egin du Foru Erkidegoan, 2021eko urtarrilarekin alderatuta: 8.908 langabe gutxiago (% 21,35).

Jarduera-sektoreka, langabeziak gora egin du urtarrilean nekazaritzan (11), industrian (73) eta zerbitzuetan (749), eta behera eraikuntzan (41) eta aurreko enplegurik gabeko kolektiboan (1).

Sexuen arabera, 13.446 langabe gizonezkoak dira eta 19.371 emakumezkoak; horietatik 3.007 25 urtetik beherakoak dira, eta 29.810, adin horretatik gorakoak.

Ministerioaren datuen arabera, urtarrilean Nafarroan sinatutako kontratuak % 3,26 hazi ziren, 29.777 guztira, aurreko hilean baino 940 gehiago eta 2021eko urtarrilean baino 5.506 gehiago, hau da, urtebetean % 22,69 gehiago.

Sinatutako 29.777 kontratuetatik 2.764 mugagabeak izan ziren, abenduan baino % 32,76 gehiago eta duela urtebete baino % 75,83 gehiago.