Abian da Urkullu eta Mercedeseko zuzendaritzaren arteko bilera, 1.200 milioiko inbertsioa lotzen saiatzeko
Mercedes-Benz enpresak Gasteizen duen plantako zuzendaritzak eta langileen-batzordeak negoziazioei berrekin eta biharamunean, Iñigo Urkullu lehendakaria multinazionalaren zuzendaritza nagusiarekin batzartuko da gaur goizean Stuttgarten, Alemanian.
Konpainia alemaniarrak ekainaren hasieran Gasteizko lantegirako iragarritako 1.200 milioi euroko inbertsioa lotzea da bileraren helburu nagusia, eta, hori lortzeko, Euskadik inbertsiorako duen "erakargarritasuna" azaltzen ahaleginduko da Urkullu. Hala ziurtatu zuen atzo Bingen Zupiria Eusko Jaurlaritzako eledunak. Horren hitzetan, bilera honek ez du zerikusirik lan-gatazkarekin, eta batzarra joan den martxoaren 1etik adostuta dagoela ziurtatu zuen.
Jaurlaritzako iturrien arabera, Mercedes-Benzeko arduradunekin harreman "iraunkorra" dute, multinazionalak Euskadin duen jardueraren jarraipen zuzena egiteko.
Halaber, Radio Euskadin atzo egindako elkarrizketan, Arantxa Tapia Garapen Ekonomiko, Jasangarritasun eta Ingurumen sailburuak jarrerak malgutzea eskatu zien sindikatuei eta Gasteizko Mercedes plantako zuzendaritzari. "Albiste ona da mahaia berriz biltzea. Ulertzen dugu konplexua dela, baina bi aldeek jarrerak malgutu behar dituzte akordio batera iritsi ahal izateko", esan zuen.
Enpresa-batzordea, zatituta
Lan-hitzarmena berritzeko negoziazioei berrekin zieten atzo Gasteizko Mercedes-Benzeko arduradunek eta sindikatuek, langileak mobilizazio bete-betean direla. Zuzendaritzak zenbait proposamen jarri zituen mahai gainean, baina eskaintzak ez zituen langileak asebete. Halere, UGT, CCOO, PIM eta Ekintza sindikatuek osatzen duten gehiengoak uste du "aurrerapausoak" badaudela, eta bertan behera utzi dituzte gaurko deituta zuten lanuztea negoziatzen jarraitzeko. Aldiz, ELA, LAB eta ESK sindikatuek proposamena euren eskarietatik oso urruti dagoela iritzi diote, eta uste dute mobilizazioei eustea ezinbestekoa dela presionatzen jarraitzeko. Azken bloke horrek gaurko deituta zuen lanuzteari eutsi egin dio.
Besteak beste, 2022an soldatak % 5 igotzea eta 750 euroko hamabosgarren ordainketa eskaini dizkio enpresak lan-batzordeari, baina asteko seigarren gaua mantenduta.
Bihar, osteguna, berriro bilduko dira sindikatuak eta zuzendaritza.
Zure interesekoa izan daiteke
ELA eta LAB, etxebizitzaren aldeko greba orokorrerako bidean
LAB etxebizitzaren inguruko greba orokorraren alde agertu da, eta beste sindikatuekin batera prestatzen ari dela esan du
Ekonomia % 2,2 haziko da Euskadin aurten eta % 1,9 datorren urtean
Argindarraren prezioa 200 euro/MWh-tik gorakoa izango da asteartean, 2022tik lehen aldiz
CC. OO.k eta UGTk greba orokorra deitu dute udazkenerako
Osakidetzak LEPa egingo du 2027an, estaldura zaileko plazak betetzeko, eta erizaintzakoak ere jasoko ditu
Bilboko metroaren Errekalde eta Matiko arteko linea egiteko lanek sei urte iraungo dute
Milaka lagun kalera atera dira berriro etxebizitza ez dela negozioa aldarrikatzeko
Eusko Jaurlaritzak ia sei milioi euro bideratuko ditu lehen sektorera lehortearen eta kostera txarraren ondorioak konpentsatzeko
