Irailean 3.367 langabe gutxiago zenbatu dituzte EAEn, eta 205 gehiago, Nafarroan

Bi hilabetez jarraian gora egin ostean, langabeziak behera egin du Euskal Autonomia Erkidegoan (EAE) irailean; aitzitik, Nafarroan hirugarrenez jarraian igo egin da.

Langabezia tasa % 3,02 jaitsi da (3.367 langabe gutxiago) EAEn abuztuarekin alderatuta, eta, guztira, 107.996 pertsona daude langabe gisa erregistratuta Lanbiden, gaur goizean Eusko Jaurlaritzako Lan eta Enplegu Sailak eta Espainiako Lan eta Gizarte Ekonomia Ministerioak zabaldutako datuen arabera.

Nafarroako enplegu zerbitzuaren bulegoetan, berriz, 205 pertsona gehiago zeuden izena emanda irailean (% 0,70), eta, guztira, 29.612 dira lanik gabe daudenak, Espainiako Lan eta Gizarte Ekonomia Ministerioaren arabera.

Urte arteko datuei erreparatuta ere, langabeziak gora egin du bai EAEn eta baita Nafarroan ere. 2023ko iraileko datuen aldean, 1.271 langabe gehiago (% 1,19 gehiago) daude EAEn; Nafarroan, iazko hilabete berean baino 306 langabe gehiago (% 1,04) zenbatu dituzte.

EAEn, hiru lurraldeetan egin du behera langabeen kopuruak, aurreko hileko datuekin alderatuta: 1.616 langabe gutxiago (% 2,57) daude Bizkaian, 1.413 gutxiago (% 4,73) Gipuzkoan, eta 338 gutxiago (% 1,83) Araban. Iazko uztaileko datuekin alderatuta, berriz, gora egin du langabeen kopuruak, 1.483 langabe gehiago (% 2,48) izan baitira Bizkaian, 560 gehiago Gipuzkoan (% 2,01) eta 772 gehiago (% 4,08) Araban.

Zerbitzuen sektorean jaitsi da batez ere langabezia, aurreko hilabetean baino 3.111 langabe gutxiago (% 3,92) zenbatu baitira EAEn. Gainerako sektoreetan jaitsiera nabarmen txikiagoa izan da: Industrian, 181 gutxiago (% 1,72); eraikuntzan, 103 gutxiago (% 1,72) eta nekazaritzan, 86 gutxiago (% 4,6).

Espainiako Estatuan, % 0,1 egin du behera langabeziak, aurreko hilabetean baino 3.164 pertsona gehiago baitaude lanik gabe. Hala ere, 2004tik irailean izandako igoerarik txikiena da eta 2007tik irailean izandako daturik onena, pandemiako urteak salbu. Gainera, Gizarte Segurantzak 8.805 afiliatu irabazi ditu.

Afiliazio eta kontratazio datuak

Afiliazioari dagokionez, Gizarte Segurantzako afiliatuen kopurua milioi bat pertsonatik gorakoa da berriro ere EAEn, abuztuan kopuru horretatik jaitsi ondoren. Espainiako Enplegu eta Gizarte Segurantza Ministerioak gaur zabaldutako datuen arabera, 1.007.609 afiliatu daude EAEn.

Abuztutik irailera, Gizarte Segurantzak 10.538 afiliatu irabazi ditu (% 1,06).

Iazko irailarekin alderatuta, 12.617 afiliatu gehiago daude EAEn (% 1,27).

Kontratazioari dagokionez, irailean 74.413 kontratu sinatu dituzte, horietatik 14.705 (% 25,66) mugagabeak.

Bestalde, 212 afiliatu galdu ditu Nafarroako Gizarte Segurantzak, baina iaz hilabete berean baino 3.694 gehiago dira. Gauzak horrela, guztira, 309.828 pertsona daude Gizarte Segurantzan izena emanda Nafarroan. 

Eusko Jaurlaritzaren eta Nafarroako Gobernuaren balorazioak

Mikel Torres Eusko Jaurlaritzako bigarren lehendakariorde eta Ekonomia eta Enplegu sailburua pozik mintzatu da langabeziak behera egin duelako EAEn, eta berriro ere milioi bat afiliaturen langa gainditu delako.

Datu horiek eskuan hartuta, enpleguaren errekuperazioa denboran luzatzea espero duela esan du Torresek. Horren arabera, Eusko Jaurlaritzak esku artean zituen aurreikuspenak baieztatzera datoz gaurko datuak, eta udako beherakadaren ondoren enpleguak gora egin du udazkenaren hasieran.

Amaitzeko, urte amaierarako eta datorren urtearen hasierako aurreikuspenak "baikorrak" direla iragarri du.

Bere aldetik, Nafarroako Gobernuak lan-merkatuak Foru Erkidegoan duen "egonkortasunean" jarri du azpimarra, langabeziak gora egin badu ere. Carmen Maeztu Eskubide Sozialetako, Ekonomia Sozialeko eta Enpleguko kontseilariak esan duenez, iraileko datuak "positiboak ez diren arren", duela urtebeteko datuekin alderatuta,afiliatuen kopurua nabarmen hazi dela da "garrantzitsua". Enplegua sortzeko joera "positiboa" dela gehitu du.