Sindikatuen arabera, grebaren bigarren egunaren jarraipena % 75ekoa izan da; Hezkuntzaren arabera, % 47koa

ELA, CCOO, LAB eta Steilas sindikatuek nabarmendu dute Bizkaian, Gipuzkoan eta Araban unibertsitatez kanpoko hezkuntza publikoan egindako grebaren bigarren egunean "jarraipen zabala" izan dela, eta berriz ere % 75ean kokatu dute, asteazken honetako jarraipenarekin bezala.

Oraingo honetan, irakasleen kolektiboari ere zuzenduta zegoen greba, eta sindikatuek azpimarratu dute milaka irakaslek kaleak beteko dituztela ostegun honetan EAEko hiru hiriburuetan egingo diren manifestazioetan.

Bestalde, Hezkuntza Sailak adierazi du LAB, ELA, STEILAS eta CCOO sindikatuek unibertsitatez kanpoko irakaskuntza publikoan deitutako grebaren bigarren egunean, irakasleen jarraipena % 47koa izan dela.

Hezkuntza Sailak ohar baten bidez jakinarazi duenez, ikastetxe publikoetako zuzendaritzek emandako datuetan oinarrituta, ikastetxeen % 93k emandako informazioarekin, ikastetxe horietako irakasleen % 47k greba egin dute.

Sindikatuek Eusko Jaurlaritzak ezarritako "abusuzko" gutxieneko zerbitzuak salatu dituzte, eta adierazi dute bi greba egun hauetan irakasleek oso mezu argia helarazi diotela Hezkuntza Sailari: "15 urte daramatzate hitzarmena eta lan-baldintzak eguneratu gabe, eta nahikoa da".

"Lan-kargak arintzeko, enplegu publikoa sendotzeko eta bermatzeko, erosahalmena berreskuratzeko, lan-osasuna, euskara eta hezkidetza bermatzeko neurriak proposatzeko garaia da", adierazi dute.

Mitxel Lakuntza ELAren idazkari nagusiak langileen "aldarrikapenak serio hartzeko" eta "negoziatzeko" deia egin dio Begoña Pedrosa Hezkuntza sailburuari, eta zehaztu du ez dela "mahai batera esertzera bakarrik joatea", "edukia eramatea" baizik. Bestela, "greba-dinamikak sendotzea eragingo du", ohartarazi du.

Radio Euskadin egindako elkarrizketa batean, Lakuntzak unibertsitatez kanpoko hezkuntza publikoan deitutako grebaren lehen egunaren "arrakasta" nabarmendu du. Grebaren jarraipena % 75ekoa izan dela adierazi dute sindikatuek, eta Eusko Jaurlaritzak esan du "ia % 50era" hurbiltzen ari dela, "Jaurlaritzak Hezkuntzako greba batean onartutako jarraipen-zifra altuena".

ELAren buruzagiak salatu duenez, Hezkuntzako langileek "15 urte daramatzate hitzarmen blokeatu batekin". Aldi horretan, Sailak "alde bakarretik hartu ditu erabakiak", eta "erosteko ahalmenak % 20 egin du behera azken 10 urteetan, lan-kargen igo egin da, eta LEP prozesua amaitutakoan behin-behineko langileak % 33 izango dira".

Urteko bigarren greba eguna dute gaur Euskal Autonomia Erkidegoko Unibertsitatez kanpoko hezkuntza publikoan. Guztira, 12 eguneko greba zikloa izango da eta deialdiak irakasleei, sukalde eta garbiketako eta Haurreskolen Partzuergoko langileei eragiten die.

Atzo gertatu bezala, gaur ere irakasleak daude bigarren greba egun honetara deituta, 30.000 langile guztira.

LAB, STEILAS, ELA eta CCOO sindikatuek atzo zabaldutako datuen arabera, grebaren jarraipena % 75ekoa izan zen. Eusko Jaurlaritzaren Hezkuntza Sailak, bere aldetik, jarraipena apalagoa izan zela nabarmendu zuen, % 48koa, hain justu.

Gaurko grebaren ondotik, unibertsitatez kanpoko hezkuntza-sistema publikoko irakasleak otsailaren 26 eta 27an greba egitera deitu dituzte. Haurreskolen Partzuergoan, bestalde, urtarrilaren 28 eta 29an eta otsailaren 12 eta 13an izango dira deialdiak, eta sukalde eta garbiketan, urtarrilaren 30 eta 31n eta otsailaren 19 eta 20an. 

Aldarrikapenak

Mobilizazioen bidez, besteak beste, lan-kargak arintzeko, erretiroa aurreratzeko, erosahalmena berreskuratzeko, enplegua egonkortzeko eta bermatzeko, eta lan-osasuna, euskara eta berdintasuna bermatzeko neurriak hartu behar direla aldarrikatzen dute. Uste dute Hezkuntza Sailak hezkuntza publikoa indartu eta inbertsio publikoa handitu behar duela, beharginen lan-baldintzak hobetzeko eta "eskola publikoa erdigunean kokatzeko".

Sindikatuek gogorarazi dute grebara deitutako kolektiboen lan-hitzarmenak iraungita daudela, eta, zehazki, Haurreskolen Partzuergoko eta sukalde eta garbiketa langileen hitzarmenak 2009koak direla, eta irakasleenak, 2010koak.

Kolektiboei egokitutako aldarrikapen zehatzak dituzte, baina zazpi eskaera komun adostu dituzte, hala nola "gero eta handiagoak diren lan-kargak arintzeko neurri zehatzak, plantillak gaztetzeko egitasmoa aurrera eramatea erretiroa aurreratzeko, galdutako erosahalmena berreskuratzeko, enplegu publikoa egonkortzeko eta bermatzeko zentro publikoen fusioen eta itxieren aurrean".

Era berean, hezkuntza politikak martxan jartzea eskatzen dute, "hezkuntza-sistema publiko osoa euskalduntzeko, beharginen lan-osasuna zaindu eta bermatuko duten azterlan eta neurri adostuak ezartzeko eta berdintasun eta hezkidetza plan egonkorrak garatu ahal izateko baliabideak jartzeko".

Eusko Jaurlaritzak, bere aldetik, elkarrizketarako deia egin du eta negoziazioak zabalik daudela berretsi du. Azken orduetan Begoña Pedrosa Hezkuntza sailburuak berretsi du bere Saila "elkarrizketak izateko prest" dagoela eta mahai gainean "proposamenak" badaudela azpimarratu du. Nolanahi ere, negoziazio betean sindikatuek lanuzteak deitzeari ez dio egokia irizten.