Mitxel Lakuntzaren arabera, CAFek Jerusalemen duen proiektua "ez da erabakigarria" enpresaren etorkizuna bermatzeko

Mitxel Lakuntza ELA sindikatuaren idazkari nagusiak CAFek Israelen duen tren-proiektua dela eta azpimarratu duenez, sindikatuak ez du uste, Eider Mendoza Gipuzkoako diptutatuak ez bezala, kontratu hori uzteak enpresaren etorkizuna kolokan jarriko lukeenik, besteak beste, enpresak badituelako beste kontratu handi batzuk, Belgikakoa, kasu; dena den, datuak mahai gainean jartzeko eskatu dio enpresari.

CAFek iragan astean azaldu zuen Jerusalemgo trenaren proiektuak giza-eskubideak errespetatu egiten dituela eta hainbat adituk egindako txosten batek sostengua ematen ziola. Horren haritik, Lakuntzak Euskadi Irratiko Faktorian asteazken goizean salatu duenez, “txosten hori da CAFek ilegalitate horretan aurrera egiteko jartzen duen argudio bakarra, baina CAFek badaki tren hori hasiertaik dela ilegala, eta jarraitzen dugu jakin gabe zeintzuk diren txosten hori egin duten adituak. Hori argitu beharko luke enpresak”.

Palestinarekiko elkartasunez eta Isrelen kontrako boikota eskatzeko, sindikatuek hilaren 15erako deitutako lanuzteak euskal ikuspegitik egin nahi izan dituztela defendatu du Lakuntzak, Estatu mailako sindikatuek egindako deialdietatik aparte (hilaren 13an egingo dituzte). Lakuntzaren iritziz, "bateragarriak ziren herria garen heinean ahots propioa izatea eta Palestinaren aldeko eta Israeli boikot egiteko deiak", baina LABek UGT eta CCOOk egindako deiekin bat egin ostean, ELAk ere horrekin bat egitearen alde egin du, "langileak ataka batean ez jartzeko". Hala ere ez du atsekabea ezkutatu, eta argi utzi du ELAren nahia zela "azken urteotan erkutsitakoaren bidetik ahots propioz aritzea, eta demostratzea euskal sistema sindikala ez dela Espainiakoaren azpisistema bat". 

EITB Focusek utzi dituen ondorio nagusien inguruan, eta, zehazki, Pedro Sanchezek Espainiako Gobernuan jarraitzeaz herritar gehienek erakutsitako nahiaz galdetuta, Lakuntzak nabarmendu du langilen eskubideen ikuspuntutik beti geratzen direla ageriago PPk eta Voxek osatutako gonbernu batek ekarriko lituzkeen arriskuak, baina, sindikatuaren arabera egungo Espainiako Gobernuak ere “gabezia dexente” ditu lan-eskubideen arloan eta arlo sozialean.  

EITB Focusen datuen arabera, Hego Euskal Herrian ere ultraeskuinak gora egingo du; Lakuntzak adierazi duenez, ordea, igota ere, ultraeskuinaren ordezkaritzak oso txikia izaten jarraitzen du Euskal Herrian. Hala ere, adierazi du kezka egon badagoela, eta ez direla jomugatik kendu behar eskuin muturrak ekar ditzakeen ideia eta jarrerak (arrazismoa, xenofobia eta matxismoa, esaterako). Horiei aurre egiteko, Euskal Herriak dituen indarguneei eustearen alde mintzatu da: “Memoria antifrankista eta antifaxista, batetik, eta zaindu eta elikatu behar den sare soziala, bestetik, Euskal Herria eragile sozialez eratutako herria” delako.