Eskola publikoko irakasleek eskola ordu gehiago eman beharko dituzte

Euskal Autonomia Erkidegoko irakaskuntza publikoko irakasleek eskola ordu gehiago eman beharko dituzte, Auzitegi Konstituzionalak atzera bota ostean Eusko Jaurlaritzak PPk "Hezkuntzako gastu publikoa arrazionalizatzeko" onartutako dekretuaren aurka jarritako helegitea.

2012an Espainiako Gobernuak onartutako araudiaren arabera, DBHko eta Batxilergoko irakasleek gutxienez 20 eskola ordu eman beharko dituzte eta Haur eta Lehen Hezkuntzako irakasleek, ostera, 25 ordu. Hala ere, Eusko Jaurlaritzak ez zuen dekretu hori aplikatu Espainiako Gobernuak haren eskumenak urratu zituela argudiatuta eta helegitea aurkeztu zuen.

Auzitegi Konstituzionalak atzera bota du orain Eusko Jaurlaritzak jarritako helegitea eta ontzat eman du Espainiako Gobernuaren dekretua. Hori dela eta, EAEko Hezkuntza publikoko irakasleek orain arte baino bizpahiru eskola ordu gehiago eman beharko dituzte astero. Izan ere, orain arte 17 eskola ordu ematen dituzte DBHn eta Batxilergoan eta 23, berriz, Haur eta Lehen Hezkuntzan. Neurriak 23.000 irakasle ingururi eragingo die.

Dagoeneko argitaratu dute Konstituzionalaren erabakia Estatuko Aldizkari Ofizialean. Bestalde, Eusko Jaurlaritzako Hezkuntza sailetik epaia aztertzen ari direla adierazi dute.