Gabonetan baimenduta egongo da erkidegoen arteko mugikortasuna senideengana joateko

Espainiako Gobernua eta erkidegoak adostasun batera iritsi dira Gabonetan koronabirusari aurre egiteko ezarri behar diren neurrien harira.

Lurralde arteko Kontseiluan adostutakoaren arabera, Gabonetan (abenduaren 23tik urtarrilaren 6ra) posible izango da erkidegoen arteko mugikortasuna justifikatutako arrazoiengatik (senide edo lagunena joateko, jatorrizko bizitokira bueltatzeko...), eta egun seinalatuetan (abenduak 24, 25 eta 31 eta urtarrilak 1) etxera itzultzeko ordutegia 01:30 arte luzatuko da, eta bilkuretan gehienez 10 pertsona elkartu ahalko dira (haurrak barne, eta gehienez bi familia bizikide). Guztiz galarazita egongo da aisialdirako edo turismorako erkidegoen arteko mugikortasuna.

Aholkuak

Dokumentuan erkidegoek adostu dituzten hainbat aholku ere agertzen dira, tartean jende pilaketak eragin ohi dituzten ekitaldi kulturalak, sozialak, Gabonetako kirol arlokoak (San Silvestre lasterketak, kabalgatak, desfileak…) ez egitea.

Era berean, norbanakoen prebentzio neurriak zorrotz bete behar direla gogorarazten dute: distantzia, musukoaren erabilera, aireztapena eta eskuen garbiketa, besteak beste. Ahal den neurrian bilkurak leku irekietan egitea ere gomendatu dute.

Halaber, zinemetan, antzokietan, auditorioetan, zirku-karpetan edo antzekoetan egiten diren Gabonetako jarduera tradizionalak kasuan kasuko autonomia erkidegoan edo hirian aurreikusitako edukiera errespetatuz egingo dira. Ahal denean, jarduerak aire zabalean egitea gomendatzen da, betiere segurtasun-distantzia betetzen dela bermatuz, bertaratutakoen arteko kontaktua minimizatzeko.

Espazio itxietako erlijio-zeremoniei dagokienez, autonomia-erkidego bakoitzean ezarritako edukiera-arauen arabera egiten jarraitu ahal izango da, baina kantak saihestea eta aldez aurretik grabatutako musika erabiltzea gomendatzen da. 

Ostalaritzari dagokionez, planak adierazten du edukierari eta prebentzioari buruzko arau berberekin jarraituko dutela, bai eta autonomia-erkidego bakoitzean indarrean dauden gainerako murrizketekin ere; hala ere, azpimarratzen da garrantzitsua dela barrualdeetan aireztapen mekaniko edo natural egokia bermatzea, bai eta maskara erabiltzeko beharra indartzea ere, jaten edo edaten ari ez denerako.

Beste gomendio batzuk

Gainera, Osasun Ministerioak eta autonomia erkidegoek erosketak aldez aurretik antolatzea gomendatzen diete herritarrei, kaleetan eta merkataritza-guneetan pilaketa handiak saihesteko. Era berean, saltokiek eta merkataritza-kaleek beren eskualdean aurreikusitako edukiera errespetatu beharko dute, segurtasuneko pertsonen arteko distantzia mantenduz.

Eguberrietan, dokumentuak nabarmentzen duenez, administrazio eskudunek garraio publikoaren ordutegien maiztasuna handitu behar dute, pilaketak saihesteko, aireztapen egokia bermatuz eta prebentzio-neurriak betez, besteak beste.

Azkenik, oporretan etxera itzultzen diren ikasleei gomendatzen zaie interakzio sozialak mugatu ditzatela eta prebentzio-neurriak 10 egun lehenago zorroztu ditzatela, behin etxean sartuta, kontaktuak mugatu ditzatela, bizikidetza-burbuila errespeta dezatela eta, batez ere, aire zabalean elkarreragin dezatela, barnealdean izan beharrean.

Jaurlaritza eta Nafarroako Gobernua, pozik

Gotzone Sagardui Eusko Jaurlaritzako Osasun sailburuak "ontzat" jo du Lurralde arteko Kontseiluan Gabonetan jarduera eta mugikortasuna kontrolatzeko neurriei buruz lortutako akordioa, eta jakinarazi du LABIren Batzorde Teknikoari eta Aholku Batzordeari helarazi diola, Euskadiko Babes Zibileko Planaren barruan hartu behar baitira EAEn neurri horiek aplikatzeko erabakiak.

Nafarroako Gobernuak ere txalotu egin du akordioa, izan ere, "Ministerioak erkidegoekin azken egunotan landutakoa jarraitzen du", Gabonetan erkidegoek, "mugakideek bereziki", "ahalik eta neurri komunenak" izan ditzaten.