EAEk Curevac farmazia-enpresaren txertoaren saiakuntza klinikoan parte hartuko du

Osakidetzaren Biodonostia eta Biocruces Bizkaia Osasun Ikerketa Institutuak aukeratu dituzte Curevac enpresa farmazeutiko alemanak covid-19ari aurre egiteko garatu eta sustatu duen txertoaren eraginkortasuna eta segurtasuna aztertuko duen saiakuntza klinikoan parte hartzeko.

Estatu mailan ikerketarako aukeratutako hiru zentroetatik bi jarriko ditu EAEk; hirugarrena Madrilgo erkidegokoa da. Saiakuntza kliniko handia izango da, mundu osoan 30.000 lagunek baino gehiagok hartuko baitute parte bertan; horietako 2.000 inguru EAEk jarriko ditu.

Curevac enpresa biofarmazeutiko alemanak immunitate-sistema estimulatzen duen RNA mezulariaren mekanismoan oinarritutako txertoa garatu du, hau da, Pfizer eta Moderna txertoek erabiltzen duten bera. Hala ere, Curevacek orain arte merkaturatu diren txertoak erabiltzeko dauden oztopo nagusietako bat gainditzen du; izan ere, txertoak mantentzeko eta prestatzeko baldintzek banaketarako logistika errazten dute.

Gainera, Europan ekoizten denez, gure esparruko herrialdeetan dosi gehien banatzeko konpromisoa hartu duen txertoetako bat da.

Parte-hartzea

Azterlanaren protokoloan adierazitako irizpideak betetzen dituzten EAEko 18 urtetik gorako pertsona guztiek izango dute saiakuntzan parte hartzeko aukera, hala nahi badute.

Saiakuntzak txertoaren bi dosi behar ditu, lehenengo eta bigarrenaren artean 28 eguneko tartea utzita. Parte-hartzaileak ausaz banatuko dituzte txertoa jasoko duten taldean eta plazeboa (inolako ondoriorik ez duen konposatu bat) jasoko duten kontrol taldean.

Parte-hartzaileei urtebete iraun dezakeen jarraipena egingo diete, bisita medikoen eta telefono deien bidez. Gainera, informazioa erregistratzeko modua erraztuko duen mugikorrerako aplikazio batean sartu ahalko dira. Edozein unetan eskatu ahalko dute saiakuntzatik ateratzea, eta txertoa edo plazeboa jaso zuten jakin ahalko dute.

Hirugarren eta seigarren hilabeteak iritsitakoan, bitarteko analisiak egingo dizkiete, eta, emaitzen arabera, baliteke txertoa erabiltzen hasteko baimena lehenago ematea, orain arte merkaturatu direnekin gertatu den bezala.

Datozen egunetan, beharrezko dokumentazio eta eskakizun guztiak prest daudenean, bi ikerketa-institutuek parte-hartzaileak errekrutatzeko prozesuak abiatuko dituzte. Behar bezala emango da horien berri.