Pertsona bat hil da azken orduetan Nafarroan eta 101 kasu atzeman dituzte

Nafarroan behera egin dute kasuek azken egunean, eta 101 kasutara iritsi dira, Foru Gobernuak jakitera eman dituen datuen arabera. Bezperan, 139 kasu hauteman ziren, horietatik 37, Erriberako sasoikako langileen artean hautemandako agerraldi batekin lotutakoak.

Atzokoan 1.372 proba egin ziren eta horietatik % 7,4k emaitza positiboa eman zuten. 

Auzoz auzo eta udalerrika, Tutera Mendebaldea da kutsatutakoen zerrendaren buru gaur, 15 kasurekin; ondoren, Iruñeko Arrotxapea (8) eta II. Zabalgunea (6) daude. Burlatan, Mendabian eta Iruñeko Alde Zaharrean bost kasu erregistratu dira.

Atzo izandako positiboek duela astebetekoak gainditu dituzte, 92 kasu zenbatu baitzituzten orduan; hala ere, duela bi asteko 147 kasuen azpitik jarraitzen dute.

Erietxetako azken datuen arabera, beste 5 pertsona ospitaleratu zituzten atzo. Guztira, 76 pertsona daude ospitalean, eta horietatik, 25 ZIUn. Halaber, covid-19agatik pertsona bat hil da azken orduetan; beraz, Nafarroan, 1.229 pertsona hil dira koronabirusaren ondorioz.

Txertaketari dagokionez, 5.628 dosi eman zituzten asteazkenean; beraz, Nafarroan 928.820 dosi eman dituzte guztira eta 475.481 lagunek dute jarraibidea osatuta. 

Agerraldia sasoikako langileen artean

Nafarroako hegoaldeko sasoikako langileen artean izandako agerraldi batek 37 positibo utzi ditu aste honetan, Foru Gobernuak emandako datuen arabera.

37 kasu horiek 85 pertsonaren artean egindako baheketa batean atzeman dituzte, Javier Remirez Gobernuko presidenteorde eta bozeramaileak prentsaurrekoan azaldu duenez, eta agerraldi honi egotzi dio astearteko datuetan izandako gorakada, 139ra iritsi baitziren kutsatzeak, aurreko egunetako zifrak bikoiztuz.

Erriberako sasoikako langileen lan-eremu bateko agerraldiaren berri izan ostean egindako jarraipen- eta trazabilitate-lanari esker, kasu horiek detektatu ahal izan dira, eta Remirezen arabera, "puntuala" da egoera.