Behin-behinean aske gelditu da Barakaldon sexu abusuak egiteaz akusatutako futbol entrenatzailea
Sexu abusuak egiteagatik Barakaldoko Pauldarrak futbol taldeko lau gaztek salatu duten entrenatzailea behin-behinean eta neurririk gabe aske uztea erabaki du epaileak.
Epaileak ikertu gisa deklaratu du gaur, ostirala, maiatzak 10, Barakaldoko epaitegietan. Halaber, Pauldarrak klubeko ordezkariak eta salaketa jarri zuten 14 eta 16 urte bitarteko lau neskak ere joan dira deklaratzera, euren legezko tutoreekin.
Ertzaintzak ikerketa abiatu du entrenatzaileak lau adingabeen sexu askatasunaren aurkako delitu bat egin duelakoan.
Futbol taldeak berak EITBri jakinarazi dionez, iragan asteko ostegunean lau neskatoek klubeko haurtzaroko arduradunarekin hitz egitea eskatu zuten eta orduan eman zuten gertatutakoaren berri. Klubak salaketaren berri eman zien familiei, eta taldetik aldendu zuten entrenatzailea, berehala.
Bizkaian, emakumezkoen kirolean ezaguna da Pauldarrak taldea. Ustezko erasotzaileak hamar bat urte zeramatzan taldean lanean.
Klubeko haurren babeserako arduradun Iñaki Alonsok komunikabideei azaldu die salaketa jarri duten lau neskatoak eta taldea bera "elkar babesten" egon direla hasieratik.
Arratsaldean, oharra zabaldu du klubak, sexu abusuak salatu dituzten lau adingabeei babesa adieraziz eta lehen unetik kasuaren ikerketan laguntzeko prest agertu dela berretsiz.
Halaber, bere "erantzukizun etiko eta legal bakarra egoera horiek prebenitzea, antzematea eta behar bezala erantzutea" dela esan du, eta horixe egiten ari dela nabarmendu du. "Prozesu osoan zehar neskak artatu ditugu, ustezko erasotzailea baztertu egin dugu prozesu judiziala argitu arte, eta eskuragarri dugun informazio guztia jakinarazi diogu familia bakoitzari", azaldu du klubak.
Udalak erasoak gaitzetsi ditu
Barakaldoko Udalak, bestalde, irmoki salatu ditu sexu abusuak, eta, behar izatekotan, auzian akusazio partikular gisa agertzeko prest azaldu da.
Ohar batean, Udalak esan du, tartean adingabeak daudenez, "sentsibilitate osoz" jokatuko dutela, salaketa jarri duten adingabeak babeste aldera.
Zentzu horretan, zehaztu du Udaleko alderdiei auziaren gaineko informazioa igorri dietela, Udalean duten protokoloaren nondik norakoak gogoratzeko.
Halaber, adingabeei eta horien familiei babes osoa adierazi diete. "Oso ausartak izan dira geratutakoa salatuta, legeak erasotzailea zigortu behar du eta", esan dute.
Bukatzeko, Udalak eskura dituen baliabide guztiak eskaini dizkiete gazteei, eta taldeari elkartasuna adierazi diote, "gertakariak bere irudiari eragin diezaiokeelako".
Zure interesekoa izan daiteke
Gizon bat atxilotu dute Iurretako paper fabrikan izandako sutean nahasita dagoelakoan
36 urteko gizona, enpresako langilea, atzo goizean atxilotu zuten, kalteak egitea egotzita, eta gaur eraman dute epailearen aurrera. Ikerketak irekita jarraitzen du.
Etxebizitza batetik erori den emakume baten heriotza ikertzen ari dira Iruñean
Gertakariak bart jazo dira, Sanduzelai auzoan. Udaltzaingoak gizon bat atxilotu du biktimarengandik urruntzeko zuen agindua urratzeagatik, eta ikerketa abiatu du erorketak eta urraketak zerikusirik duten argitzeko.
Basauriko hilketa matxistaren ustezko egilea espetxeratu dute, indarkeriaz egindako lapurreta bat egotzita
Bilboko Udaltzaingoak ostiral gauean atxilotu zuen, lapurtzeko asmoz bi gizon jotzea egotzita. Ordu batzuk lehenago, arratsaldean, beste pertsona batek haren kontrako salaketa jarri zuen, lesio larriak eragitea egotzita. Duela astebete pasatxo utzi zuen aske Bilboko Guardiako Epaitegiak.
Emakume baten gorpua aurkitu dute Zumaiako Itzurun hondartzan
Paseatzen ari zen pertsona batek aurkitu du hilotza, eta indarkeria zantzurik ez badu ere, Ertzaintzak ikerketa abiatu du gertatutakoa argitzeko.
Bi gizon atxilotu dituzte Tolosan pertsonen trafiko irregularra egotzita
Larunbat goizaldean, Ertzaintzaren patruila batek ibilgailu bat geldiarazi zuen, eta jabetu zen barruan sei pertsona zihoazela, bat maletategian. Gerora egiaztatu zutenez, bidaiariek dirua ordaindu zuten Irunera eta Parisera eramatearen truke. Gidaria eta maletategian zihoan gizasemea atxilotu, eta ertzain-etxera eraman zituzten, epailearen esku utzi aurretik egin beharreko izapideak betetzera.
Etxera itzuli dira Ordizian su hartu zuen eraikineko bizilagunak
Bi familia, baina, ezin izan dira etxera bueltatu, suak belztuta utzi baitu haien etxebizitza. Ilunpe tabernan ere kalte handiak eragin ditu suteak. Hoditeria bat hautsita dago lokal horretan, eta ura etengabe ari da jausten.
Primitivak hiru milioi eta erdi euro baino gehiago utzi ditu Bizkaian
Sariaren zenbatekoa bi zatik osatzen dute: 2.422.493,36 euro, kategoria bereziari dagozkionak, eta horiei 1.113.371,22 euro gehitu behar zaizkie, lehenengo kategoriakoak (sei asmatutakoak), aurreko zozketetan ez baitzegoen asmatzailerik kategoria horretan.
Gasteizko parrokiek aldi baterako estalpea eman diete asiloaren zain dauden Maliko migratzaileei
San Joakin eta Santa Ana parrokiak eta Elurretako Andre Mariarenak ateak ireki dizkiete 20 maliarri. Salburuako Auzo Elkarteari esker, beste 20 etorkinek gutxieneko zerbitzuak dituzte. Asilo eskaerak tramitatzeko hitzorduak lortzea eragozten dien blokeoa tarteko, 300 maliar baino gehiago igaro dira jada Gasteiztik iazko udaz geroztik.
Bilbon arma zuriz egindako eraso baten egilearen bila ari da Ertzaintza
Segurtasun Sailak jakinarazi duenez, 15:00ak aldera jakinarazi diote Ertzaintzari gizon bat zaurituta zegoela Bilbo Zaharrean. 33 urteko biktimak arma zuriz egindako zauriak zituen, eta Basurtuko Ospitalera eraman dute.
Amaitu dira pilaketak N-1 errepidean, Andoain parean
Bi kamioik eta auto batek ezbeharra izan dute 15:15ean, Donostiarako bidean. Ibilgailu astunek guraizearena egin dute, eta bidea trabatzen geratu dira. Ilara luzeak sortu dira, baina 18:45erako konponduta zeuden arazoak, eta zirkulazioa ohikoa zen.