Osakidetzak kargu hartu dio pediatra bati, hil hurren zegoen haur bat lanorduetatik kanpo artatzeagatik

"Faltan botatzen dugu" plataformak salatu duenez, Osakidetzak kargu hartu dio Gurutzetako Ospitaleko pediatra bati, lau asteetan zehar gaueko ordu txikietan hil hurren zegoen 4 urteko neskato bati zaintza aringarriak emateagatik, eta ospitalearen baliabideekin kalean egoteagatik". Neskatoa hil eta hurrengo egunean egin zion ohartarazpena Osakidetzak medikuari.

Kasu honetatik harago, Osakidetzak Padiatria arloko zaintza paliatiboak erabat abandonatuta dituela salatu du elkarteak; izan ere, gertakari horrek agerian uzten du, elkartearen arabera, zaintza aringarrien zerbitzuak Euskal Autonomia Erkidegoan duen "egoera kritikoa eta baliabiderik eza". 

Zehazki, salatu du Osakidetzak etxez etxeko arretarako talde bakarra duela Euskadi osoan, goizeko ordutegian —08:00etatik 15:00etara—, eta ez duela ematen 24 orduko arreta jarraitua. Elkarteak ekintza politiko eta sozial handiagoa eskatu du, egoera hobetze aldera.

Kasu zehatz batek piztu du salaketa. Lau urteko neskato bat eta bere familia hainbat astez etxean lagundu ostean, goizaldean, ordutegi ofizialetik kanpo, bisita egin zien zainketa aringarri pediatrikoen taldeak. Ez zen lehenengo aldia, baina orduko hartan, zuzendaritzak kargu hartu zien. Hala, neskatoa hil eta biharamunean azalpenak eskatu zizkieten, "ordutegitik kanpo ospitaleko baliabideak erabiltzeagatik".

"13 urtez ordutegitik kanpo laguntza ematen aritu ondotik, askotan babesik gabe", kargu hartu dioten medikua Osakidetzako arduradunekin "haserre, amorratuta eta etsita" agertu da.

"Ez zaio inori kargu hartu"

Alberto Martinez Osasun sailburuak Radio Euskadiko mikrofonoen aurrean ukatu egin du Osakidetzak pediatrari kargu hartu izana. 

Horren arabera, "erizaintzako ikuskaritzak prebentzioz jakinarazi zion medikuari auto bat hartzen bazuen, aldez aurretik abisatu behar zuela", baina, "segurtasun ohartarazpen bat besterik ez" zela izan nabarmendu du. 

Sailburuak onartu du Euskadi osorako etxez etxeko unitate zerbitzu bakarra dagoela zainketa aringarrien zerbitzu pediatrikoetan. Defendatu duenez, baina, iaz pediatriako 900 profesionalek jaso zuten zainketa aringarrien formakuntza, eta iritzio dio sare osoaren koordinazioa egokia dela.

Osasun Sailak ere ohar bat publikatu du gai honen kontura, eta ziurtatu du ez diola kargu hartu medikuari: "Erizaintzako kargu batek zenbait profesional ohartarazi zituen ospitaleko ibilgailu kororatibo bat aldez aurretik abisatu gabe eta lan-ordutegitik kanpo ibilgailu bat behar bezala erabiltzeko iradokizunera mugatzen dela, aldez aurretik jakinarazi gabe eta idatziz jasota utzi gabe".

"Prebentziozko informazioa da ibilgailu korporatibo baen erabileraren kudeaketan, langilearen segurtasun babeseko, edoizen gorabeheraren aurrean", gaineratu du.