9 urteko espetxe-zigorra berretsi diote 15 urteko alabari sexu-erasoak egin zizkion gizonari

Nafarroako Justizia Auzitegi Nagusiak berretsi egin du 15 urteko alabari sexu-erasoa egin zion gizon bati apirilean Probintzia Entzutegiko Lehen Sekzioak ezarritako 9 urteko kartzela-zigorra.

Epaiak jasotzen duenez (Auzitegi Gorenean errekurritu daiteke), Auzitegi Nagusiko Arlo Zibileko eta Penaleko Salak berretsi egiten du, ahaidetasunagatiko nagusitasun-inguruabar astungarriarekin, adingabeari sexu-eraso jarraitua egiteagatik ezarritako espetxe-zigorra. Gainera, 10.000 euroko kalte-ordaina ordaindu beharko dio biktimari kalte moralagatik.

Auzipetua ezin izango da neskarengandik 300 metro baino gutxiagora hurbildu, ezta salatzailearekin harremanetan jarri ere 10 urtez. Gainera, behin espetxe-zigorra beteta, beste 10 urte egin beharko ditu zaintzapeko askatasunean. 

Frogatutzat eman denez, auzipetua bere emaztearekin, 2008an jaiotako alabarekin eta haren anai-arrebekin bizi zen familiaren etxebizitzan.

2023. urtearen hasieratik, akusatuak hainbat ukitu egin zizkion adingabeari, zeinak "arrarotzat jo baitzituen", epaian adierazten denez. Abuztuan eta urrian, gizonak bi sexu-eraso egin zizkion adingabeari.

Auzitegiak ezarritako kondena errekurritu zuen defentsak Nafarroako Auzitegi Nagusian, eta absoluzioa eskatu zuen. Fiskaltzak eta akusazio partikularrak, berriz, ebazpena berrestearen alde egin zuten. 

Amak ez zion sinetsi 

Auzitegi Nagusiak bere epaian azaldu duenez, Entzutegiak biktimaren deklarazioan eta adituek egindako froga psikologikoan oinarritu zuen kondena, baita lekukoen deklarazioetan ere, zeintzuek inputazioak berretsi baitzituzten.

Ildo horretan, Salak adingabearen testigantza "sinesgarria, fidagarria eta koherentea" dela dio, baita "oso zehatza" ere.

Gainera, adingabearen bertsioa berretsi egin zen ikasten ari zen institutuko zuzendariaren ondokoaren adierazpenekin. Neskak hari kontatu zizkion, aurrenekoz eta idatziz, jasandako sexu-abusuak. Ondoren, zentroko zuzendariak eta Adingabeen Behaketa eta Harrera Zentroko langile batek ere izan zuten gertaera horien berri.

Epaiketan amak ere deklaratu zuen, eta alabaren aurkako jarrera hartu zuen. Adierazi zuen berak ez zuela bere senarraren (neskaren aitaren) jokabide desegokirik ikusi eta ez duela uste hark kontatutakoa gertatu zirenik. Bere esanetan, alabak "libre egoteko" eta "Interneteko jokoetan jolastu ahal izateko" salatu zuen.

Defentsak esan zuen neskak helburu jakinengatik egin zuela salaketa, izan aitak gailu elektronikoak eta jarduteko askatasuna ken ez ziezazkion (gurasoen balio erlijioso zorrotzek mugatutakoa), izan adingabeak Espainian bizitzen jarraitzeko nahia ezarri nahi zuelako, gurasoek jatorrizko herrialdera itzultzeko hartutako erabakiaren aurrean.

Salak uste du "salaketak helburu horiekin egin zituenik esateko oinarririk ez" dagoela, eta epailearen ustez adingabearen deklarazioa nahikoa da gizonari leporatzen zaizkion karguak frogatutzat jotzeko.