Adingabeak osteagatik ikertuko dute Juana Rivas, baina ostiralean semea aitarekin utziko duela espero da

Granadako Auzitegiak Juana Rivasen bikotekide ohiak jarritako errekurtso bat onartu du eta, adingabekoak ostea egotzita, ikerketa zabaltzea agindu du. Bikotearen seme zaharrenak, ordea, kereila bat aurkeztu du aitaren eta psikologo baten aurka, anaia adingabearen borondatea derrigortzen saiatzeagatik.

Juana Rivas Maracenan (Granada) bizi da, eta bi urte eta erdiko kartzela-zigorra ezarri zioten bi semeak senar ohia duen Francesco Arcurirengandik urruntzeagatik. Ondoren, indultu partziala eman zioten. Arcurik zigor-arloko prozesua du zabalik Italian, semeei ustezko tratu txarrak emateagatik eta irailean epaituko dute, baina txikienaren zaintza bere esku dago.

Joan zen asteartean seme txikiena aitarekin utzi behar zuten Granadako familia elkargune batean, Italiako auzitegi baten agindua jarraituz, baina elkartze hori ostiralera, uztailaren 25era, atzeratu zen.

Ostegun honetan, Granadako Auzitegiak partzialki onartu du Francesco Arcurik jarritako kereila bat artxibatzeko erabakiaren aurkako errekurtso bat. Arcurik adin txikikoak lapurtzeagatik eta tratu txarrengatik jarri zuen Rivasen aurka kereila. Auzitegiak tratu txarren zatia ez du onartu, baina bai adingabeak lapurtzeari buruzkoa, Gabonetako etenaldiaren ondoren, seme gazteena ez zelako Italiara itzuli. Eta Rivas ikertzeko agindu du.

Bestetik, Rivas y Arcuriren seme zaharrenak , adin nagusikoa bera, kereila bat jarri du bere aitaren eta psikologo baten aurka, asteartean elkargunean anaia gaztearen borondatea hertsatzeko delitua egotzita. Kereilan azaltzen duenez, aitak anaiaren borondatea "makurrarazteko" eskatu zion profesionalari, "galdeketa gogor baten bidez, aitarekin itzultzeko aginduz, nahiz eta haurrak horretarako borondaterik ez duela adierazi zuen". Mutikoari "antsietatea eta ezinegona" sortu zizkiotela salatu du "negar egitera iritsi zen, eta bakean uzteko erregutzen zuen behin eta berriz".

Halaber, kereilan eskatzen du adingabea babesteko kautelazko neurriak presaz hartu daitezela, hala nola urruntze-agindua eta aitarekin joateko agindua etetea.

Puntu horretan, adin txikikoak 2025eko urtarrilean egin zuen deklarazio bat aipatzen du "aitak ematen dizkion tratu txar fisiko eta psikikoak” kontatuz. Horrez gainera, aipatzen du "hainbat agintariren aurrean sarritan" azaldu duela "amarekin eta anaiarekin Granadan bizitzeko borondatea".

Hala ere, oraingoz, ostiral honetan adingabea aitari entregatuko zaiola dago aurreikusita. Ildo horretan, Ana Redondo Berdintasun ministroak adingabearen osotasun fisikoa eta psikologikoa bermatzeko eskatu dio Loles Lopez Andaluziako Familia eta Berdintasun sailburuari. Ministroak "adingabearen interes gorenagatik oso kezkatuta" dagoela adierazi du, eta ingurune segurua, errespetuzkoa eta babeslea bermatzeko beharrezko neurri guztiak hartzeko eskatu du, “adingabearen osasun mentalean eta fisikoan eta haren eskubideekiko errespetu osoan” oinarrituta.

Bestalde, Sira Rego Gazteria eta Haurtzaro ministroak "gogor eta lazgarritzat " jo du asteartean entrega-gunean adingabearekin egon zen psikologoetako baten txostena. Txosten hori Fiskaltzari helarazi zaio, beharrezkoa bada esku har dezan.

Bien bitartean, Juanma Moreno Andaluziako Juntako presidenteak adierazi duenez, "Gobernuak, adingabea babestuko du une oro, bere eskumenen esparruan, baina ezin dugu Botere Judizialaren zereginetan sartu, eta elkarguneak ez dira zirku bihurtu behar".

Azkenik, Irene Montero Podemoseko idazkari politiko eta eurodiputatuaren hitzetan, Gobernuak adingabearen interes gorena bermatu behar du eta Italiara aitarekin itzultzea saihestu behar du Hagako Hitzarmenaren salbuespena aplikatuta. "Estatua da Danieli gertatzen zaionaren erantzulea", ohartarazi du.