Israelek eta Libanok su-etena adostu dute, Hezbollahk erasoak etetea baldintza jarrita, baina taldeak "umiliagarritzat" jo eta erasoekin jarraituko du

Israelgo eta Libanoko ordezkaritzak bilduta egon dira egunotan Washingtonen, eta, su-etena adostuta, altxa dira mahaitik. Hain zuzen ere, Hezbollah milizia xiitak Israelgo lurraldearen aurkako erasoak geldiarazteko eta herrialde arabiarreko hegoaldean dituen operazioak eteteko baldintzapean adostu dute su-etena.

AEBren bitartekaritzarekin, plan bat diseinatu dute Libanon "gune pilotuak" sortzeko, zeintzuetan Libanoko armadak izango duen kontrola, talde islamista baztertuta, adierazpen bateratu batean zehaztu dutenez.

Gainera, ekainaren 22an AEBko hiriburuan beste negoziazio-erronda bat egitekotan gelditu dira bi aldeak. 

Yechiel Leiter eta Nada Hamadeh, Israelek eta Libanok AEBn dituzten enbaxadoreak, AEBko Estatu Departamentuaren egoitzan bildu dira astearte eta asteazken honetan, aurtengo laugarren erronda, bake negoziazioen testuinguruan. Apirilaren 14an egin zuten aurrenekoa. 

Nabarmentzekoa da 1993tik Israelen eta Libanoren artean ez dela harreman diplomatikorik izan. Apirilekoa maila goreneko harremana izan zen.

Orain arte, kontaktuak baliagarriak izan dira pixkanaka-pixkanaka su-etena onartu eta zabaltzeko. Israelek, ordea, menia hautsi eta areagotu egin du Libanoko inbasioa, dioenez, Hezbollahk botatako jaurtigaiei erantzuteko, hura negoziazioen aurka dagoelakoan. 

Adierazpen bateratuan azaldu dutenez, asteazken honetan amaitutako erronda baliagarria izan da su-etena ezartzeko, baldintza batekin beti ere: "Hezbollahk erasoak bertan behera uztea" eta Litani ibaiaren eta Israelgo mugaren artean dituen "operatibo guztiak handik ateratzea". 

"AEBren laguntzarekin, bi aldeek adostu dute eremu pilotuak sortzea ahalik eta azkarren, zeintzuetan Libanoko Indar Armatuek kontrol esklusiboa izango baituten, Estatuarenak ez diren gainerako eragile guztiak bertatik aterata", azpimarratu dute, Hezbollahri erreferentzia eginez. 

"Neurri horiek bake eta segurtasun akordio integral baterantz aurrera egitea ahalbidetuko dute", ziurtatu dute, eta ekainaren 22an elkarrizketei berrekitea adostu dute, "akordio integral bat lortzeko asmoz".

Hezbollahk adierazi du elkarrizketa "umiliagarria" izan dela

Naim Qassem Libanoko Hezbollah talde xiitaren buruzagiak negoziazio "umiliagarriak" kritikatu ditu, eta su-etenak "integrala" izan behar duela defendatu du. Horrez gain, Israelen erasoei aurre egiten jarraituko dutela ziurtatu du.

"Zuzeneko negoziazio zentzugabe, umiliagarri eta lotsagarrien emaitza (...) da Washingtonen adierazpena. AEBk eta Israelek Libano Israel Handiaren proiektura azpiratzeko dituzten oinarrizko printzipioak deskribatzen ditu", salatu du talde xiitak.

"Ez dugu konpromisoa hartu erasoa eteteko, ezta horri ez erantzuteko ere. Erasoak irauten duen bitartean, gure indar guztiarekin aurre egingo diogu, eta erabakitzen dugun eta ahal dugun guztietan erasoko dugu", zabaldu du mezu batean.

"Agintariei dei egiten diegu zuzeneko negoziazioak izan beharko luketen gezur eta umiliazioekin amaitzeko, herri osoaren babesarekin indartu ahal izateko", gaineratu du Qassemek.

EBk 100 milioi euro gehiago eman dizkio Libanori

Testuinguru horretan, Europar Batasuneko Kontseiluak (EB) laguntza bat onartu du, 100 milioi eurokoa, Libanoko Indar Armatuen alde, haien defentsa-baliabideak indartu ditzaten. Bakeari Laguntzeko Europako Funtsak Libanoko Armadari ematen dion laugarren laguntza da, eta guztira 182 milioi euro bideratu ditu.

"Israelen eta Libanoren arteko su-etenak herrialdea amildegitik urruntzeko aukera eskaintzen du. 100 milioi euroko laguntza honek nabarmen indartuko du EBk Libanoko Indar Armatuei ematen dien babesa", adierazi du Kaja Kallas EBko diplomaziaren buruak.