Albaresek "babesa eta elkartasuna" helarazi dizkio Ivan Illarramendiren sendiari

Jose Manuel Albares Espainiako Gobernuko Atzerri Gaietarako, Europar Batasuneko eta Lankidetzako jarduneko ministroa Hamasek bahitutakoen senideen talde batekin bildu da gaur arratsaldean Madrilen, tartean, Ivan Illarramendi bilbotarraren anaiarekin. Illarramendi bahituta dago urriaren 7tik, emaztearekin batera. Gazako Zerrendatik gertu dagoen kibbutz batean bizi dira biak.

Hamasen atentatu terroristaren "kaltetu guztiei babesa eta elkartasuna" helarazi die ministroak, eta bahitutako guztiak "baldintzarik gabe eta berehala askatzeko" eskatu du. Horren esanetan, Espainiako Gobernua eskura duen guztia egiten ari da bahitutakoak lehenbailehen aska ditzaten.

Pedro Sanchez Espainiako Gobernuko jarduneko presidenteak, bere aldetik, "sei hilabeteren buruan" Ekialde Hurbilerako bake konferentzia bat egitea proposatu du, Palestina eta Israelgo bi estatuen konponbidea gauzatzeko.

Sanchezek nazioarteko komunitate osoa inplikatu nahi du, eta bi estatuen "behin betiko" irtenbidea egia bihurtzea Israel eta Palestinarentzat. Puntu horretan, Israelek gehiengoaren bermea duela zehaztu du, eta, beraz, "onartu behar dena Palestinako herria da".

Bruselan egiten ari diren goi-bileraren atarian egindako adierazpenetan, 27ek jorratuko duten gai nagusietako bat dela esan du.

Oraingoz, nazioarteko bake konferentzia baten ideia ez dute defendatu Europa mailan, eta ez da goi-bileraren ondorioetan jaso, nahiz eta lehen zirriborroetan Egiptok antolatutako goi-bilera bezalako ekimen diplomatikoak aipatu zituzten.

Sumarrekin sinatutako gobernu akordioaren arabera, bi alderdiek Palestinako Estatua aitortzeko "apustua" egingo dute, "Diputatuen Kongresuak 2014ko azaroaren 18an emandako ebazpenaren arabera". Akordioa sinatu aurretik, Yolanda Diazen koalizioak baldintzarik gabeko eta alde bakarreko aitorpena eskatu zuen, EBn adostasuna lortu arte itxaron gabe.

Gaza sufritzen ari den indarkeriari dagokionez, jarduneko presidenteak adierazi du "su-etenaz" hitz egitearen aldekoa dela, baina baldintzak betetzen ez badira, "etenaldia" eskatu behar dutela "palestinarrek premiaz behar duten laguntza humanitario guztia bideratzeko". "Hedabideetan ikusten ari diren irudiak eta sufrimendua onartezinak dira", gaineratu du.

Sanchezek esan du Israelen defendatzeko eskubidea babesten duela orain aste pare bat Hamasek egin zituen erasoen aurrean. Hala ere, berriro azpimarratu du nazioarteko zuzenbide humanitarioa bete behar duela.

Azkenik, "ausarta" izateko eskatu dio EBri, irtenbide bat aurkitzeko konpromisoa hartzeko eta, "noski, sufritzen ari direnekin egoteko, Israelgo zibilekin baita Palestinako zibilekin ere".