AEBko hedabideen arabera, Trumpek dagoeneko onartu ditu Irani eraso egiteko egitasmoak

Donald Trump AEBko presidenteak Irani eraso egiteko egitasmoak onartu ditu, baina oraindik ez du azken erabakirik hartu, AEBko hainbat hedabideren arabera, tartean CBS News eta The Wall Street Journal.

CBSren arabera (goi-mailako inteligentzia iturri bat eta Defentsa Departamentuko funtzionario bat aipatzen ditu), Trumpek oniritzia eman dio aireko erasoekin Israeli laguntzeari.

Astearteko azken orduan, Trumpek goi aholkulariei esan zien azken erabakia atzeratzen ari zela, Teheranek bere programa nuklearra uzteko erabakiaren zain.

Etxe Zuriko goi funtzionario batek adierazi duenez, oraindik aukera asko daude mahai gainean jarrita, eta Trumpek "israeldarrek nola jokatzen duten" ikusten jarraitzen du.

Handi-mandiak zalantzan jarri ditu informazio horiek Truth Social sarean: "The Wall Street Journal egunkariak ez daki Iranen inguruan zer egiteko asmoa dudan!", idatzi du Trumpek.

AEBko presidenteak asteazkenean adierazi zuenez, oraindik ez du erabakirik hartu Iranen aurkako erasoei dagokionean. "Ideiak ditut, baina ez dut azken erabakirik hartu, egoera aldatu egiten delako", azaldu zuen Etxe Zuriko Bulego Obalean egindako agerraldian.

Hedabideei egindako adierazpenetan, AEBk Iranen esku hartzeko atea zabalik utzi zuen: "Baliteke hala egitea edo ez. Esan nahi dut, inork ez daki zer egingo dudan".

AEBko presidenteak G7ko goi-bilera utzi zuen astelehenean Kanadan, Etxe Zurira itzuli eta Segurtasun Nazionaleko Kontseiluarekin biltzeko, AEBk Israelen erasoekin bat egiten duen aztertzeko.

Asteartean, sare sozialen bidez, Errepublika Islamikoa "baldintzarik gabe errenditzea" exijitu zuen Trumpek, eta Ali Khamenei aiatola bere buruzagi gorena hiltzeko mehatxua ere egin zuen.