Trumpek Zelenski jaso du Ukrainan bakea bilatzeko bilera erabakigarria baino lehen

Donald Trump AEBko presidenteak Volodimir Zelenski bere homologo ukraniarra hartu du astelehen honetan Etxe Zurian, Errusiak 2022an hasitako gerrari amaiera emateko bilera erabakigarria egin baino lehen, Kievi babesa emateko Washingtonera joan diren Europago zenbait buruzagiren begiradapean.

Alkandora eta jaka beltzak jantzita, Trumpek Zelenskiri harrera egin dio Etxe Zuriaren Mendebaldeko Hegalean, eta aurretik iritsi diren gainerako buruzagi europarrak Hegoaldeko Arkupetik sartu dira.

"Gaur dena ondo badoa", bi agintarien eta Vladimir Putin Errusiako presidentearen arteko goi-bilera bat egin daitekeela ziurtatu du Trumpek, Ukrainan bakea lortzen saiatzeko.

Bilera hau mugarri izan daiteke Ukrainako gerran. Trump eta Vladimir Putinen arteko Alaskako goi-bilera izan eta 48 ordu eskasera iritsi da bilera. Su-eten soil batetik haratago doan bake akordio bat lortzeko aukerak aztertzeko balioko du, eta Ursula von der Leyen Europako Batzordeko presidenteak, Europako beste buruzagi batzuek eta Mark Rutte NATOko idazkari nagusiak ere parte hartuko dute, Zelenskik hala eskatuta.

Azken egunotan, Moskuren eta Kieven arteko zuzeneko itun baten beharra publikoki defendatu du Trumpek, eta Kremlinen proposamenak helarazi dizkie Zelenskiri eta Europako hainbat buruzagiri. Horien artean, Errusiak Donetsk eta Luhansk eskualdeak eskatzen ditu, gerrari amaiera emateko ezinbesteko baldintza gisa.

AEBko presidenteak behin eta berriz esan du su-etena ez dela nahikoa, eta nahiago du behin betiko bakea lortzeko bidean aurrera egin. Hurrengo urratsa Zelenski eta Putinekin hiru aldeko goi-bilera bat egitea izango litzateke.

Moskurentzat, Donetsk eta Luhansk entregatzeaz gain, negoziazioan  daude beste eskualde batzuen etorkizuneko estatusa, hala nola Jerson eta Zaporiyia, baita Krimea ere, errusierarekin eta mendebaldeko zigorrekin lotutako beste eskaera batzuekin batera. 

Kievek, aldiz, behin eta berriz errefusatu du edozein lurralde ematea, eta segurtasun berme sendoak eskatzen jarraitzen du, Europar Batasunean eta NATOnsartzeko eskubide subiranoaz gain.

Lurraldeekin batera, negoziazioen beste gakoa segurtasun bermeak dira, alegia, nork bidaliko dituen tropak behin gerra amaituta bakeari eusteko. Trumpen gobernuak dio AEBk ere parte har dezakeela indar horretan, NATOko aliatuekin batera.

Zelenski Europako eta Baltikoko kideekin harremanetan egon da asteburuan, eta EBko hainbat gobernuren babesarekin iritsiko da Washingtonera, bakea ezin dela aldebakarreko kontzesioen kontura lortu lelopean. Hala ere, zenbait agintarik, Friedrich Merz Alemaniako kantzilerrak kasu, onartu dute akordio azkar eta egonkor batek su-eten hauskor bat baino gehiago balio dezakeela.

Europako hainbat buruzagirekin Washingtonen bildu da Zelenski Trumpekin elkartu aurretik, tartean Emmanuel Macron Frantziako presidentea, Merz bera, Georgia Meloni Italiako lehen ministroa eta Alexander Stubb Finlandiako presidentea.

Europako Kontseiluko presidenteak bideokonferentzia bidezko bilera deitu du biharko, Trumpen eta Zelenskiren arteko bileraren berri emateko Europako agintariei.

Errusiaren erasoak batzarraren atarian

Putinek indar mezu bat bidali dio Ukrainari bart gauean. Negoziazioen atarian, bonbardaketa gogorra egin du Kharkiv hirian.  Gutxienez 7 lagun hil ditu Errusiak, tartean familia bereko lau kide.

Erasoa zibilen eraikinen kontrakoa izan da, misilak eta dronak erabiliz.