12:30etik aurrera egingo dituzte bilkurak Donostiako Boulevardean, Venezuelak Bilbon duen kontsulatuaren aurrean eta Iruñeko Udaletxe plazan. Ordu erdi geroago, Gasteizko Andre Maria Zuriaren plazan elkartuko dira.
AEB-REN ERASOA VENEZUELAN
Deialdia sare sozialen bidez zabaldu dute. Igande honetan egingo dituzte protestak, 12:30etik aurrera, Donostiako Boulevardean, Venezuelak Bilbon duen kontsulatuaren aurrean eta Iruñeko Udaletxe plazan. Ordu erdi geroago, Gasteizko Andre Maria Zuriaren plazan elkartuko dira.
Txinako Atzerri Gaietarako Ministerioak oharra kaleratu du, AEBk Nicolas Maduro Venezuelako presidentea eta haren emazte Cilia Flores atxilotu izana salatzeko. Horiek "berehala akatzea" eskatu du Txinak, eta gatazkari "irtenbide negoziatu" bat ematea exijitu du, "elkarrizketaren bidez".
Nicolas Maduro Venezuelako presidentea Guantanamotik eraman du Boeing 757 hegazkin batek larunbat honetan New Yorken, eta bertan, Cilia Flores emaztearekin batera, agerraldia egin beharko du datozen egunetan auzitegi federal baten aurrean, narkoterrorismoa leporatu ondoren.
Nicolas Maduro Venezuelako presidentea ondorengo orduetan iritsiko omen da New Yorkera, eta Metropolitan Detention Centerrera (MDC) eramango dute, Brooklyn barrutiko espetxe federal batera, CNN telebista kate estatubatuarraren arabera.
Iturri propioak aipatuz, telebistak iragarri du Madurok astelehenean egingo duela agerraldia New Yorkeko Hegoaldeko Barrutiko (SDNY) auzitegi batean.
Delcy Rodriguez Venezuelako presidenteordeak agerraldia egin du Donald Trumpenaren ondotik. Nicolas Maduro, "herrialdearen presidente bakarra", eta horren emaztea "berehala aske uzteko" galdegin du.
Halaber, lasaitasunerako eta batasunerako deia egin du berriro, eta nabarmendu du Venezuela ez dela "inoiz izango beste inoren kolonia".
Pedro Sanchez Espainiako Gobernuko presidenteak argi utzi du ez dutela AEBren "esku hartzea" aitortuko, "nazioarteko zuzenbidea urratzen baitu eta eskualdea ziurgabetasunaren eta gerrazalekeriaren atakan murgiltzen baitu".
X sare sozialean kaleratutako mezu batean, buruzagi sozialistak gogora ekarri du Espainiako Gobernuak ez zuela Maduroren "erregimena aitortu" 2024ko hauteskundeen ondotik. Hori horrela, agente guztiei eskatu die "herritarrengan pentsatzeko, Nazio Batuen Gutuna errespetatzeko eta trantsizio justu bat ezartzeko".
Ehunka pertsona kalera atera dira gaur arratsaldean Bilbon, Donostian eta Gasteizen AEBk Venezuelaren kontra egindako erasoa salatzeko. Jardun koordinatzaileak deituta egin dituzte protestok "Prozesu bolivartarraren defentsan, Venezuela tinko!" lelopean.
Biharko, igandearekin, bilkura gehiago deitu ditu (12:30erako) Hegoak plataforma internazionalistak EAEko hiriburuetan eta Iruñean.
Trumpek iragarri du AEBko petrolio konpainiek "milaka milioi dolar" inbertituko dituztela Venezuelako azpiegituratan; izan ere, horren aburuz, "oso egoera txarrean" daude. Argudiatu duenez, Venezuelako petrolioaren negozioa "erabateko porrota" izan da azken urteotan. "Ez ziren ia ezer ere ateratzen ari", deitoratu du.
Kazetarien galderei erantzunda, AEBko presidenteak adierazi du Venezuela zuzentzeko pertsona jakin batzuk aukeratzen ari direla. "Laster jakingo duzue nortzuk diren", gaineratu du.
Kazetariek Maria Corina Machado talde horretan egongo ote den itaundu diote Trumpi. Honek ezetz esan du: "Oso zaila litzateke berarentzat buruzagitza hartzea. Venezuelan ez du babesik, ezta jendearen errespeturik ere".
Donald Trump AEBko presidenteak agerraldia egin du arratsaldean Nicolas Maduro Venezuelako presidentea atxilotu ostean. Bart gaueko erasoaren berri eman du lehenik, eta azpimarratu AEBko Armadak "eraso ikusgarria" egin duela Caracasko "bihotzean" Maduro eta emaztea "Justiziaren aurrera eramateko".
Nabarmendu du bart gauekoa II. Mundu Gerratik egindako eraso "ikusgarriena" izan dela, eta erantsi beste herrialdeentzat, Kubarentzat edo Kolonbiarentzat berbarako, "abisua" dela.
Gainera, jakinarazi du AEBk Venezuelaren kontrola hartuko duela "trantsizio egoki eta seguru bat" izan arte.
AEB-REN ERASOA VENEZUELAN
AEBko presidenteak zabaldutako irudi batean, Venezuelako presidentea eskuak lotuta, entzungailuak jarrita eta betaurreko ilun batzuk jantzita ikus daiteke.
Mar-a-Lagon 17:00etarako deituta duen agerraldiaren atarian, elkarrizketa eskaini dio Donald Trumpek FoxNews telebista kateari. Bertan esan du "aztertu" behar dutela Maria Corina Machado Venezuelako oposizioaren burua presidente gisa babestu ala ez.
"Presidenteorde bat dute Venezuela, jakina denez. Ez dakit zer motako hauteskundeak izan ziren horiek, baina badakigu Madurorenak lotsagarriak izan zirela", erantsi du. Trumpen hitzetan, "jendeak ez du (Maduro) estimu handitan".
Maria Corina Machado Venezuelako oposizioaren burua eta Bakearen Nobel saridunak pozez hartu du Maduroren atxiloketa eta "askatasunaren ordua" heldu dela azpimarratu. "Irteera negoziatu bat onartzeari uko egin ostean (Madurok), AEBko Gobernuak legea betearazteko promesa bete du. Herriaren subiranotasuna eta subiranotasun nazionala gure herrialdean nagusi izateko ordua da", nabarmendu du.
"Ordena berrezarri, preso politikoak aske utzi eta aparteko herrialde bat eraikiko" duela hitzeman du Machadok, eta Venezuelan daudenei "prest" egoteko deia egin die. "Laster sare sozialen bidez jakinaraziko dizuegu zertarako", azaldu du bestelako azalpenik eman gabe.
Antonio Guterres NBEren idazkari nagusiak adierazi du "biziki kezkatuta" dagoela "Venezuelan tentsioak gora egin" duela eta. Ohartarazi duenez, azken orduetako gertakariek "ondorio kezkagarriak" izan ditzakete.
"Idazkari nagusia kezka bizian dago nazioarteko zuzenbidearen arauak bete ez direlako", azaldu du Guterresen bozeramaileak, xehetasun gehiago eman barik.
Hori horrela, alde guztiei "elkarrizketa inklusibo" baten alde egiteko deia egin die, "giza eskubideak eta Zuzenbide Estatua errespetatuta".
Nicolas Maduro Venezuelako presidentea eta Cilia Fores horren emaztea USS Iwo Jima ontzi militarrean dituzte, eta New Yorkera bidean daude, Donald Trump AEBko presidenteak jakinarazi duenez.
"New Yorkera bidean doaz. Bertan auzipetu dituzte. Itsasontzi militarrera eraman dituzte, eta New York dute helmuga. Helikopteroz eraman dituzte. Bidaia ona izango zutelakoan nago", esan du Trumpek Fox News telebista katean egin dioten elkarrizketa batean.
Euskal Herriko Kontseilu Sozialistak (EHKS) elkarretaratzeak deitu ditu gaurko Euskal Herriko hiriburu nagusietan "Venezuelako herri langilearekin elkartasuna adierazteko eta AEBk herrialde horren aurka aurrera daramaten eraso inperialista salatzeko". Hego Euskal Herrian 19:00etan izango dira bilkurak, Bilboko plaza biribilean, Gasteizko Posta plazan, Donostiako Boulevardean eta Iruñeko Udaletxe plazan. Baionakoa 17:30ean egingo dute, Reduit plazan
Imanol Pradales lehendakariak adierazi du "gertutik, etengabe eta kezkaz" jarraitzen ari direla Venezuelako egoera, "historikoki errotutako euskal komunitate ugaria baitago bertan". Pradalesek mezua kaleratu du X sare sozialean duen profilean eta, Europar Batasunak adierazitako jarrerarekin bat eginda, eskatu du "nazioarteko legedia eta Nazio Batuen gutuna errespetatzea" eta "multilateralismoa, elkarrizketa eta diplomaziaren defentsa" aldarrikatu ditu bakerako eta gatazkak konpontzeko bide gisa.
Lehendakariak uste du nazioarteko zuzenbidea berme guztiekin errespetatu behar dela, "demokrazia eta askatasuna herrialdera itzultzea ahalbidetuko duen trantsizio erreala ziurtatzeko. Venezuelarren oinarrizko eskubide eta askatasun guztiak babestuko dituen demokrazia, bai eta haien jardun askea eta subiranotasun osoa ere".
Azkenik, gogora ekarri du bi euskal herritar Venezuelako kartzela batean dituztela, "gutxieneko berme judizialik gabe".
EAJ "kezkatuta" azaldu da AEBk Venezuelaren kontra egin duen erasoaren ondotik, eta "nazioarteko legedia errespetatzeko" eskatu dio Trumpen gobernuari. Halaber, adierazi du espero duela venezuelarrek "erregimen demokratiko bat izateko trantsizio politikoa" egiteko aukera izatea.
Gogorrago mintzatu da EH Bildu eta AEBk "Venezuelako Errepublika Bolibartarrari eraso" diola salatu du; "nazioarteko eskubidearen printzipio guztiak urratu dituzte", erantsi du. Ildo beretik, Arnaldo Otegi koalizio subiranistaren koordinatzaile nagusiak "irmo gaitzetsi" ditu gertatutakoak eta "Venezuela herri burujabearen kontrako esku hartze inperialistatzat" jo ditu.
PSE-EEk ez du oraingoz adierazpenik egin eta EAEko PP Alberto Nuñez Feijooren erreakzioa zabaltzera mugatu da.
Podemos Euskadik "irmo gaitzetsi" du AEBk Venezuelari egindako erasoa, eta "giza eskubideen zein demokraziaren defentsaren" kontrakoa dela nabarmendu du. "Inperialismo klasikoaren adierazpen bat da", azpimarratu du. Ezkerreko taldearen arabera, "indarkeria ezin da tresna politikotzat hartu eta ezin dira erasoak justifikatu. Bakea eta subiranotasuna ez dira negoziagarriak".
Pam Bondi AEBko fiskal nagusiak iragarri du Nicolas Maduro eta Cilia Flores emaztea "auzipetu" egin dituztela New Yorkeko hegoaldeko barrutian". Zehaztu duenez, lau kargu egotzi dizkiote Venezuelako presidenteari: "narkoterrorismoa egiteko konspiratzea, kokaina inportatzeko konspirazioa egitea, metrailadoreak eta gailu suntsitzaileak edukitzea eta AEBren kontra erabiltzeko metrailadoreak eta gailu suntsitzaileak izateko konspiratzea”.
Donald Trump AEBko presidenteak Truth Social sare sozialean duen profilean iragarri duenez, Maduro atxilotzeko operazioa "arrakastatsua" izan da. Xehetasun gehiago emateko agerraldia eskainiko du Mar-a-Lagoko (Florida) bertan 11:00ak direnean (17:00etan, Euskal Herrian).
Diosdado Cabello Venezuelako Barne ministroak agerraldia egin du AEBk Maduro eta horren emaztea atxilotu ostean. AEBren erasoak "sarraskia" izan direla salatu du, baina lasaitasunerako deia egin die herritarrei.
"Lasaitasunerako deia egin nahi dut. Izan konfiantza gure lidergoan, agintari politiko eta militarren zuzendaritzan. Lasaitasun osoa, ez diezazkiegun gauzak erraztu etsaiei", aldarrikatu du.
Venezuelako fiskalak salatu du AEBk Maduro "bahitu" duela eta berehala aske uzteko eskatu du.
EBk "neurriz jokatzea" eskatu du. Kontrara, Milei Argentinako presidenteak Maduro atxilotu izana ospatu du.
AEB-REN ERASOA VENEZUELAN
Errusiak "oinarririk gabeko aitzakiak baliatuta" egindako "eraso armatua" izan dela salatu du, Espainiak "deseskalatzea eta moderazioa" eskatu ditu, eta Frantziak Edmundo Gonzalez izatea presidente berria. Latinoamerikan muturreko iritziak eragin ditu AEBen operazioak.
Nicolas Maduro atxilotuta du AEBko Gobernuak eta bertan epaituko dutela jakinarazi du, zein delitu egozten dioten argitu ez badu ere. Mike Lee Utahko senatari errepublikanoak X sarearen bidez egin du iragarpena, Marco Rubio Estatu idazkariak berak hala jakinarazita.
Nazio Batuen Erakundeari (NBE) urgentziazko bilera eskatu dio Venezuelak, AEBren "erasoen" ondotik
Delcy Rodriguez Venezuelako presidenteordeak aitortu du ez dakiela non dauden Nicolas Maduro eta Cilia Flores emaztea. Hala, "bizirik dauden froga bat" eskatu dio AEBren gobernua.
Mezu berean, Venezuelaren kontrako "maila handiko erasoa" berretsi du Trumpek, eta Maduro AEBko indar bereziek harrapatu dutela zehaztu.
Donald Trump Truth sare sozialean jakinarazi duenez, Nicolas Maduro "atxiki eta Venezuelatik kanpo eraman dute", emaztearekin batera.
Nicolas Maduro presidenteak AEBren "eraso militar larria" salatu du, eta Venezuelak bere burua defendatzeko eskubidea duela berretsi du.
AEBk Venezuelari eraso dio gaur goizaldean. Herrialdeko hainbat gune bonbardatu dituzte, tartean Caracas hiriburua.
