Nazioartearen erreakzioak AEBk Venezuelan egindako erasoaren aurrean

AEBko Armadak Venezuelaren aurka egindako erasoa, Nicolas Maduro presidentearen atxiloketa barne, lurrikara eragin du nazioartean, eta argi ikusi dira Venezuelako Gobernuaren aliatuen jarrerak, jarrera anbiguoagoak eta aldekoak.

Venezuelaren herrialde aliatuen artean, Errusiako Gobernuak gaitzetsi egin du erasoa, eta "oinarririk gabeko aitzakiak baliatuta" egindako "eraso armatua" izan dela esan du.

"Etsaitasun ideologikoak arrakasta izan du pragmatismo enpresarialaren eta konfiantzazko harremanak eraikitzeko borondatearen aurrean", adierazi du Errusiako Atzerri Ministerioak.

"Egungo egoeran, funtsezkoa da, batez ere, indarkeriaren gorakada galaraztea eta elkarrizketaren bidez irtenbide bat topatzea. Gure ustez, elkarrizketaren bidez bilatu behar dituzte irtenbideak. Prozesu honetan laguntzeko prest gaude", gaineratu du Sergei Lavrovek zuzentzen duen ministerioak.

"Latinoamerikak 2014an deklaratu zen bake-eremua izaten jarraitu behar du. Eta Venezuelari bere patua zehazteko eskubidea bermatu behar zaio, kanpoko esku-hartze suntsitzailerik gabe, eta are gutxiago militarrik gabe", erantsi du.

Venezuelako agintariek eta Latinoamerikako beste herrialde batzuetako buruzagiek NBEko Segurtasun Kontseiluaren premiazko bilera deitzeko egindako eskaerarekin bat egin du Errusiak.

Iranek ere gaitzetsi egin du AEBk Venezuelaren aurka egindako eraso militarra, nazioarteko zuzenbidearen urraketa nabarmena dela esanez, eta nazioartearen berehalako erantzuna eskatu du hori geldiarazteko.

"AEBk Venezuelaren aurka egindako eraso militarra Nazio Batuen Gutunaren oinarrizko printzipioen eta nazioarteko zuzenbidearen oinarrizko arauen urraketa nabarmena da", salatu du Irango Atzerri Ministerioak ohar baten bidez.

Horren arabera, AEBren erasoa "Estatu burujabe baten aurkakoa" izan da, eta "eskualdeko eta nazioarteko bakea eta segurtasuna mehatxatzen ditu". Irango Gobernuak ohartarazi du nazioarteko sistema osoari eragiten diola erasoak, NBEren Gutunean oinarritutako ordena ahulduta geratuko delako.

Miguel Diaz-Canel Bermudez Kubako presidenteak ere AEBk Venezuelaren aurka egindako "eraso kriminala" salatu du, eta "gure #BakeGunea eraso bortitza jasaten ari da", esan du.

"#Kubak salatu eta PREMIAZ eskatzen du nazioartearen erreakzioa AEBk Venezuelari egindako eraso kriminalaren aurrean. Gure #BakeGunea eraso bortitza jasaten ari da. Estatu terrorismoa Venezuelako herri kementsuaren eta gure Amerikaren aurka", gaineratu du X sare sozialean duen kontuan.

Ildo beretsuan, "Kolonbiako Errepublikako Gobernuak kezka handiz begiratzen die azken orduetan Venezuelako Errepublika Bolivartarrean izandako leherketei eta aire jarduerari buruzko txostenei, baita eskualdean izandako tentsio igoerari ere", adierazi du Gustavo Petro Kolonbiako presidenteak X kontuan argitaratutako ohar batean.

Claudia Sheinbaum Mexikoko presidenteak, bere aldetik, adierazi du hainbat herrialdetako agintariak bere gobernuarekin harremanetan jarri direla Estatu Batuen esku-hartze militarraren ondoren, euren gaitzespena adierazteko, eskualdeko agiri bateratu bat prestatzeko.

Gabriel Boric Txileko presidenteak ere gertatutakoa "gogor gaitzetsi" du, eta "atzerriko estatu batek Venezuelako lurraldea zuzenean kontrolatu nahi duela" salatu du. "Aurrekari oso arriskutsua ezarri du", gaineratu du.

"Estatuen subiranotasuna eta lurralde-osotasuna errespetatzea marra gorria da, eta ez da inola ere gurutzatu behar (...) Gaur Venezuela da, bihar beste edozein herrialde izan daiteke ", adierazi du agintari aurrerakoiak Txileko Gobernuaren egoitza den La Moneda jauregian.

Espainiak deseskalatzera deitu du

Espainiako Kanpo Arazoetako, Europar Batasuneko eta Lankidetzako Ministerioak aurreratu du Venezuelako egoera gertutik jarraitzen ari dela, Europar Batasuneko kideekin eta eskualdeko herrialdeekin koordinatuta, eta "deseskalatze eta moderaziorako deia" egiten duela, "betiere nazioarteko zuzenbidea eta Nazio Batuen Gutunaren printzipioak errespetatuz".

Ildo horretan, Atzerri Ministerioaren arabera, "Espainia prest dago bere ofizio ona eskaintzeko egungo krisiari irtenbide baketsu eta negoziatua emateko".

Pedro Sanchez Espainiako Gobernuko presidenteak iluntzean publiko egin duen mezu batean argi utzi du ez dutela AEBren "esku hartzea" aitortuko, "nazioarteko zuzenbidea urratzen baitu eta eskualdea ziurgabetasunaren eta gerrazalekeriaren atakan murgiltzen baitu". 

X sare sozialean kaleratutako mezu batean, buruzagi sozialistak gogora ekarri du Espainiako Gobernuak ez zuela Maduroren "erregimena aitortu" 2024ko hauteskundeen ondotik. Hori horrela, agente guztiei eskatu die "herritarrengan pentsatzeko, Nazio Batuen Gutuna errespetatzeko eta trantsizio justu bat ezartzeko".

Macronek Venezuelaren "askapena" begi onez ikusi du

Emmanuel Macron Frantziako presidenteak Venezuelaren "askapena" goraipatu du: "Venezuelako herria Nicolas Maduroren diktaduratik aske dago gaur, eta ospatu besterik ezin dut egin. Boterea konfiskatzean eta oinarrizko askatasunak zapaltzean, Nicolas Madurok bere herriaren duintasunaren aurkako irain larria egin du ", adierazi du Macronek X sare sozialen argitaratutako mezu batean.

Macronen ustez, AEBen eraso honek trantsizio "baketsu, demokratiko eta Venezuelako herriaren borondatea errespetatzen duen" bati bide eman behar dio. "Nahi genuke 2024an aukeratutako Edmundo Gonzalez Urrutia presidenteak trantsizio hori ahalik eta azkarren ziurtatu ahal izatea", planteatu du.

Aurretik, Jean-Noël Barrot Frantziako Atzerri ministroak Maduro ezbaian jartzearekin batera, AEBen erasoa ere kritikatu du: "Nicolas Maduro atxilotzeko egindako operazio militarrak nazioarteko zuzenbidea urratzen du. Frantziak berresten du irtenbide politiko iraunkorrik ezin dela kanpotik inposatu eta herri subiranoek bakarrik erabakitzen dutela euren etorkizuna ", adierazi du Barrotek X kontuan argitaratutako mezu batean.

"Giorgia Meloni Italiako Gobernuko presidentea arretaz jarraitzen ari da Venezuelako egoera, eta Antonio Tajani Atzerri ministroarekin eta Nazioarteko Lankidetzako ministroarekin harremanetan dago etengabe, gure naziokideei buruzko informazioa lortzeko", zabaldu du Italiako Gobernuak ohar labur baten bidez.

Melonik, Trumpek Europar Batasunean duen aliatu handienetako bat denak, Edmundo Gonzalez Urrutia oposizioko burua aitortu zuen 2024an Venezuelako presidente hautatu gisa, eta "trantsizio demokratikoa" defendatu zuen, 2024ko uztailaren 28ko hauteskunde polemikoen ostean.

Bestalde, Espen Barth Eide Norvegiako Kanpo Arazoetako ministroak esku-hartzea kritikatu du, nazioarteko zuzenbidearekin bat ez datorrelako, eta trantsizio baketsua aldarrikatu du Hego Amerikako herrialdearentzat.

Erasoa ontzat eman dutenen artean, Javier Milei Argentinako presidentea. Pozik hartu du Maduroren atxiloketaren berri.