Espainiako Gobernuak preso politikoak berehala aske uzteko eskatu dio Venezuelako Gobernuari

Delcy Rodriguez buru duen Venezuelako Gobernuarekin harremanetan egongo dela azpimarratu du Europar Batasunak, aurrez Nicolas Madurorekin egin bezala, "bere interesak eta printzipioak babesteko". 

"Orain arte Madurorekin egin duguna egiten jarraituko dugu Rodriguezekin", adierazi du Anitta Hipper Europako Batzordeko bozeramaileak eguneroko prentsaurrekoan. 

Vente Venezuela Maria Corina Machado buru duen oposizioko taldeak herrialdeko preso politikoak aske uztea eskatu du, AEBk Nicolas Maduro atxilotzea ahalbidetu duen operazioaren ondoren. 

"Preso politiko zibilak eta militarrak bidegabe atxiki dituztenek berehala askatu beharko lituzkete", adierazi du Vente Venezuela mugimenduak. Giza eskubideen aldeko tokiko talde baten arabera, 863 dira.

NBE beldur da Giza eskubideek Venezuelan okerrera egin dezaketela ohartarazi du astearte honetan Nazio Batuen Erakundeko Giza Eskubideetarako Goi Mandatariaren Bulegoak. 

Horren arabera, Venezuelako agintariek larunbatetik ezarritako larrialdi egoerak, defentsa nazionalerako beharrezkoak diren ondasunak konfiskatzeak eta biltzeko eta protestatzeko eskubidea mugatzeak  giza eskubideak urratzen ditu. 

Hori dela eta, nazioarteko zuzenbidea eta giza eskubideak errespetatzen direla bermatzeko eskatu die AEBko eta Venezuelako agintariei eta nazioarteko komunitateari.

Europako Parlamentuko ezkerreko 36 eurodiputatuk gutuna igorri diete Ursula von der Leyen Europako Batzordeko presidenteari eta Kaja Kallas Europako Batasuneko diplomaziaburuari, AEBk Venezuelan egindako erasoaren aurrean isilik ez gelditzeko eta erantzun "irmo eta argia" emateko eskatuz. 

Ezkerreko taldetako europarlamentariak dira gutuna sinatu dutenak, tartean EH Bilduko Pernando Barrenak. Horrez gain, ERC (Diana Riba i Giner), Podemos (Irene Montero eta Isabel Serra), Sumar (Estrella Galan eta Jaume Assens Llodra), BNG (Ana Miranda Paz), Compromis (Vicent Marza i Ibañez), eta Sinn Fein (Lynn Boylan eta Kathleen Funchion) alderdietako ordezkariak daude. 

Mao Ning Txinako Atzerri Ministerioko bozeramaileak astearte honetan eskaini duen prentsaurrekoan salatu duenez, Ameriketako Estatu Batuek "modu larrian bortxatu dute nazioarteko legedia". Horren esanetan, herrialde bakar batek ere ezin ditu bere barne arauak nazioarteko legediaren gainetik jarri. 

Donald Trump Ameriketako Estatu Batuetako presidenteak bart berretsi du hauteskunderik ez dela izango Venezuelan datozen 30 egunetan. 

Lehentasuna herrialdea konpontzea dela esan du NBC News telebista kateari eskaini dion ekarrizketan. 

Donald Trumpek bart adierazi duenez, AEBko Estatu eta Defentsa idazkaria (Marco Rubio eta Pete Hegseth, hurrenez hurren) eta Stephen Miller segurtasun eta migrazio gaietako aholkularia arduratuko dira Venezuelako trantsizioaren koordinazioaz. Halaber, Delcy Rodriguez Venezuelako presidente izendatu berria AEBrekin "elkarlanean" ari dela ziurtatu du Trumpek. 

Edozein kasutan, Trumpek NBC News telebista kateari eskainitako elkarrizketan azpimarratu du berak izango duela azken hitza Venezuelari buruzko erabakietan.

Alfredo Romero Foro Penal Giza Eskubideen GKEko presidenteak amnistia orokorraren beharra defendatu du, Nicolas Maduroren atxiloketaren osteko keinu gisa. Taldearen arabera, 863 preso daude arrazoi politikoengatik espetxeratuta Venezuelan.

"Preso politikoen askatasunerako amnistia orokor bat keinu garrantzitsua izango litzateke gaur egun Venezuelako herritarrak bateratzeko, jakina, gizateriaren aurkako krimenengatik zigorgabetasuna bermatu gabe", adierazi du Romerok X sare sozialean argitaratutako mezu batean.

Joan den ostiralean, Foro Penalak jakinarazi zuen "44 preso politiko askatu zituztela" (42 gizon eta 2 emakume), eta abenduaren 29an beste 61 askatzeren berri ere eman zuen.

Chris Wright Estatu Batuetako Energia idazkaria bere herrialdeko petrolio sektoreko exekutiboekin bilduko da aste honetan, Venezuelako petrolio industria nola berpiztu aztertzeko, hainbat hedabidek jakinarazi dutenez.

Bilera Goldman Sachs inbertsio banku taldeak Miamin energia sektoreari buruz antolatutako hitzaldi baten barruan egingo da.

Sinposioan AEBetako petrolio-enpresa nagusietako zuzendariak izango dira.

Venezuelak munduko petrolio erreserba frogatu handienak ditu, 300 – 303 mila milioi upel inguru, hau da, ezagutzen diren erreserba globalen bosten bat.

Venezuelako Kazetarien Elkargo Nazionalak (CNP) salatu duenez, gutxienez zortzi kazetari eta prentsako langile atxilotu dituzte, gehienak  Asanblea Nazionalaren 2026-2031 legegintzaldi berriaren ekitaldia zein kaleko ekintza paraleloak jarraitzen ari zirela.

X sarean duen kontuan, CNPk zehaztu du jada hiru atxilotu askatu dituztel eta gainontzekoak ere "berehala aske uzteko" eskatu dute.

Prentsako Langileen Sindikatu Nazionalak (SNTP) berriz, adierazi du ezin dela "trantsizio demokratiko baterantz aurrera egin jazarpen politikoak, zentsurak, espetxeratze arbitrarioak eta oinarrizko eskubideen urraketa sistematikoak irauten duten bitartean".

Hala, gogorarazi dute  "bidegabe eta arbitrarioki" atxilotu zituzten 23 kazetari eta prentsako langilek preso jarraitzen dutela.

Chevron petrolio enpresa estatubatuarrak % 5 egin du gora astelehen honetan Wall Streeten, Donald Trump AEBko presidenteak Venezuela zuzentzeko eta petrolio industria suspertzeko asmoa duela esan ostean.

Burtsa itxi baino pare bat ordu lehenago, Chevronek % 5,73 egin du gora, ConocoPhillipsek % 3,54 eta ExxonMobilek % 2,32.

Bitartean, SLBk, petrolio eta gas hobietan zerbitzuak ematen dituen teknologia batek, ia % 12 egin du gora.

Trantsizio politikoa egin arte Venezuela zuzentzeko ardura hartuko duela adierazi du Trumpek, eta AEBko petrolio konpainia handiek "milaka milioi dolar" inbertituko dituztela ere bai.

Plataforma Unitario Demokratikoak (PUD), Maria Corina Machado eta Edmundo Gonzalez Urrutia babesten dituen Venezuelako oposizioko koalizio nagusiak, "legez kanpokotzat" jo du Asanblea Nazional berria.

Asanblea Nazionala 2026-2031 aldirako ezarri da, eta gehiengo chavista da nagusi.

Ameriketako Estatu Batuetako Estatu Departamentuak baieztatu berri duenez, Caracasen enbaxada berriz irekitzeko "beharrezko prestakuntzak" egiten ari dira, Nicolas Maduro Venezuelako presidentea jada bertan ez dagoela.

"Trump presidenteak esan zuen bezala, beharrezko prestakuntzak egiten ari gara erabaki hori hartuz gero berriro irekitzea ahalbidetzeko", azaldu du Estatu Departamentuko bozeramaile batek.

Nazio Batuen Segurtasun Kontseiluaren ezohiko bilkuran, Vasili Nebenzia Errusiako ordezkariak azpimarratu du ez dagoela justifikaziorik AEBk Caracasen egindako oparazioarentzat.

Nebenziak ironiaz esan du "munduko ordena" liberala erakusten duela "bere distira osoan", eta ziurtatu du "atlantista sutsuenak ere izutzen" dituela, eta Washingtonen eta Caracasen arteko edozein gatazka elkarrizketaren bidez konpondu behar dela ere esan du.

Ildo beretik mintzatu da Txina ere. Geng Shuang ordezkariak salatu du Washingtonek "zapaldu" egin dituela "Venezuelaren subiranotasuna, haren segurtasuna eta eskubide eta interes legitimoak", eta azpimarratu du Trumpek agindutako ekintzak "larriki" urratzen dituela berdintasun subiranoaren printzipioak, barne arazoetan esku ez hartzea, eta nazioarteko eztabaiden konponbide baketsua.

"Ezin da munduko polizia izan, eta ezin da estatu bakar bat ere nazioarteko epaile bihurtu", azpimarratu du, Maduroren Gobernuari eta Venezuelako herriari babesa erakustearekin batera.

Gaurko lehen deklarazioaren ondoren, Estatu Batuetan irekitako prozesu penalaren hurrengo urratsa markatzen du data berriak.

Venezuelako Parlamentuak 2026-2031 legegintzaldia inauguratu du astelehen honetan, chavismoak kontrolatuta eta oposizioko aurpegi batzuk itzulita.

Eguerdi aldera, Asanblea Nazionalak (AN, Parlamentua) hasiera eman dio inaugurazio saioari, chavismoko pertsona indartsuen presentziarekin, hala nola Jorge Rodriguez, aurreko denboraldian Ganberako presidente izandakoa, eta Nicolas Maduro Guerra, Maduroren semea, hirugarren aldi baterako diputatu karguaren zina egin duena.

Henrique Capriles eta Stalin Gonzalez oposiziogileak ere bertan daude, 2025eko maiatzeko eskualdeko hauteskundeetara joatean oposizio nagusitik bereizi zirenak, eta hautetsi atera zirenak.

Nicolas Maduro Guerra diputatuak, Nicolas Maduro presidentearen semeak, Delcy Rodriguez presidenteorde exekutiboari "baldintzarik gabeko babesa" emango diola iragarri du astelehen honetan.

"Nicolas eta Cilia bahitu zituzten, baina ez zuten bahitu aske izatea erabaki duen herri baten kontzientzia. Zuri, Delcy Eloína, nire baldintzarik gabeko laguntza ematen dizut dagokizun zeregin gogorrarekin. Kontatu nirekin, kontatu nire familiarekin, kontatu gure irmotasuna gaur dagokizun erantzukizun honen aurrean urrats zuzenak emateko", esan du Maduro Guerrak 2026-2031 legealdiaren hasiera ekitaldian.

AEBk ukatu egin du astelehen honetan, NBEren Segurtasun Kontseiluan, "Venezuelaren aurka" gerran egotea, eta baztertu egin du Nicolas Maduro presidentearen atxiloketak eta trantsizio politikoa egin arte herrialdea gobernatzeko hartutako erabakiak okupazioa dakarrenik.

"Ez dago Venezuelaren eta bere herriaren aurkako gerrarik" esan du Mike Waltz AEBko enbaxadoreak: "Maduro ez da soilik narkotrafikatzaile bat, presidente ez-legitimoa ere bazen. Ez zen estatuburu bat ".

"Etengabe azpimarratu dut beharrezkoa dela guztiek Nazioarteko Zuzenbidea erabat errespetatzea, baita Nazio Batuen Gutunak ere, nazioarteko bakea eta segurtasuna mantentzeko oinarria baita", adierazi du Antonio Guterres NBEko idazkari nagusiak, Segurtasun Kontseiluaren premiazko bilkuran.

"Oso kezkatuta nago, Nazioarteko Zuzenbidearen arauak ez baitira errespetatu urtarrilaren 3ko ekintza militarrean", gaineratu du Nazio Batuen Erakundeko idazkari nagusiak.

NBEko buruzagiak gogorarazi duenez, erakundearen sorrerako Gutunak "debekatu egiten du mehatxua eta indarra erabiltzea lurralde baten osotasunaren zein edozein estaturen independentzia politikoaren aurka", eta, beraz, ohartarazi du nazioarteko bakea eta segurtasuna mantentzea haren "xedapen guztiak" betetzearen menpe daudela.

Venezuelan "trantsizio demokratikoa" egin ahal izateko Maria Corina Machado eta Edmundo Gonzalez Urrutia oposizioko buruzagien parte hartzea ezinbestekoa dela nabarmendu du Europako Batzordeak. 

"Trantsizioak Edmundo Gonzalez eta Maria Corina Machado barne hartu behar ditu", adierazi du Anita Hipper EBko bozeramailean astelehen honetan eskaini duen prentsaurrekoan. 

Nicolas Maduro Venezuelako presidentea agintetik kentzeko AEBk erabilitako "metodoak" ez du Frantziaren babesik eta onespenik, Emmanuel Macron Frantziako presidenteak gaurko Ministroen Kontseiluaren bileran adierazi duenez.  

"Nazioarteko zuzenbidea eta herrien askatasuna defendatzen ditugu. Erabilitako metodoak ez du Frantziaren babesik ezta onespenik ere ", adierazi du Maud Bregeon Frantziako Gobernuko bozeramaileak hedabideen aurrean. 

Jens Frederik Nielsen Groenlandiako lehen ministroak errespetua eskatu dio Donald Trump AEBko presidenteari, eta berarekin negoziatzeko prest agertu bada ere Trumpen anexio plana baztertu du.

"Elkarrizketarako prest gaude, baina kanal egokien bidez eta Nazioarteko Zuzenbidea errespetatuz egin behar da", adierazi du Nielsenek sare sozialetan argitaratutako iruzkin batean. 

Cuca Gamarra PPko zuzendaritza batzordeko kideak onartu duenez, "zalantzak" egon badaude Ameriketako Estatu Batuek Nicolas Maduro atxilotzeko Venezuelan egindako operazioak nazioarteko zuzenbidea urratzen ote duen. Hala ere, Maduroren atxiloketa babestu du, ez ordea Delcy Rodriguez presidenteordeak haren kargua hartzea. Horren ordez, trantsizioa gidatu behar dutenak Edmundo Gonzalez eta Maria Corina Machado izan behar direla defendatu du. 

Jose Manuel Albares Espainiako Atzerri ministroak azpimarratu du ezin dela aldaketa indarrez inposatu, eta Venezuelari egindako erasoa "aurrekari" arriskutsutzat jo du. Egoera horren aurrean printzipio demokratikoak aldarrikatu ditu. 

"Gu Delcy Rodriguezen Gobernuarekin hitz egiteko prest gaude eta Venezuelako oposizioarekin ere hitz egiten jarraituko dugu",  Ser irrati katean egin dioten elkarrizketan.  

Nicolas Ernesto Madurok, Nicolas Maduro Venezuelako presidentearen semeak, Ameriketako Estatu Batuen operazioaren aurka mobilizatzeko deia egin die venezuelarrei eta bere aita "onik eta salbu" itzularazteko deia egin du. 

"Ondo gaude, lasai gaude. Kalean ikusiko gaituzte, herri honen ondoan ", esan du. Mobilizazioei begira, Chavezen banderak altxatzea eta ahultasun zantzu oro pertzepzio oro baztertzea eskatu du. "Ez gaituzte ahul ikusiko", azpimarratu du.

Astelehen honetan Europako burtsak ireki aurretik petrolio upelaren prezioa 60,42 dolarrekoa zen, ia %0,6 behera eginda, Ameriketako Estatu Batuek Venezuelan egindako operazio militarraren testuinguruan. 

Venezuelako Gobernuak omenaldia egin die pasa den larunbatean Nicolas Maduro presidentea eta Cilia Flores haren emaztea atxilotzeko operazioan hildako 32 kubatarrei. 

Ameriketako Estatu Batuek pasa den larunbatean Venezuelan egindako operazioan 80 pertsona hil zituztela azpimarratu du The New York Times egunkariak, Venezuelako iturriak aipatuz. AEBko funtzionarioen arabera, hainbat soldadu estatubatuar zauritu ziren, baina Trumpek ez du zaurituen kopuruari buruzko informazioarik eman nahi izan. 

Donald Trump AEBko presidenteak ez du baztertzen pasa den larunbatean Maduro atxilotzeko Venezuelan egindako operazioaren antzeko beste misio bat Kolonbian egitea: "Ondo iruditzen zait".

Kolonbiaz gain, Kuban ere jarri du begirada Trumpek. Ildo horretan, Venezuelaren laguntzarik gabe, Kuba "erortzear" dagoela uste du agintari estatubatuarrak.

Europar Batasunak (EB) Venezuelan trantsizio baketsu bat eraikitzeko deia egin du igandea gauean, "subiranotasuna errespetatuz", eta "lasaitasuna eta moderazioa" eskatu ditu.

"EBk behin baino gehiagotan adierazi du Nicolas Madurok ez duela demokratikoki aukeratutako presidente baten legitimitaterik, eta herrialdean demokraziarako trantsizio baketsu baten alde egin du, Venezuelak gidatuta eta haren subiranotasuna errespetatuz", adierazi du Kaja Kallas Europako goi ordezkariak ohar batean, 26 estatu kideren babesarekin (denak, Hungaria izan ezik).

"Venezuelako herriak bere etorkizuna erabakitzeko duen eskubidea errespetatu behar da", gaineratu du, eta "eragile guztiei lasaitasunerako eta moderaziorako deia" egin die, "eskalada saihesteko eta krisiari irtenbide baketsua bermatzeko".

Chavismoak deituta, "manifestazio handi bat" egingo dute gaur Caracas hiriburuan Nicolas Maduro Venezuelako presidentea eta haren emaztea aske uzteko eskatzeko.

Venezuelako Alderdi Sozialista Batuak (PSUV, gazteleraz) egindako deialdiaren arabera, hiriburuko kale nagusietan barrena ibiliko da martxa. Ofizialismoaren kargudun nagusiak espero dituzte bertan.

Marco Rubio AEBko Estatu idazkariak uste du aurrerantzean "lankidetza hobea" izango dutela Venezuelako Gobernuarekin, Maduro kartzelatuta. NBC telebista katean egin dioten elkarrizketa batean azaldu duenez, Washington trantsizio prozesu bat lantzen ari da, eta zehaztu du "bizpahiru astetan" garatuko dela.

Gaur-gaurkoz hiru dira Venezuelako Gobernuaren zutabeak: Delcy Rodriguez presidenteordea (Gorenak haren esku utzi du behin-behineko Presidentetza), Vladimir Padrino eta Diosdado Cabello Defentsa eta Barne ministroak. 

"Betetze maila handiagoa eta lankidetza hobea espero dugu orain. Beste pertsona batzuk daude aparatu militar eta polizialaren ardura dutenak. Hautua egin beharko dute. Nicolas Maduroren bidetik urrunduko direlakoan gaude. Hartara, trantsizio oso bat egin ahalko dugu", azaldu du.

Venezuelako oposizioko buruzagiak ahotan, Rubiok esan du "zoritxarrez" Venezuelako oposizioaren gehiena herrialdetik kanpora dago. "Epe laburrean konpondu behar diren gaiak ditugu esku artean", gaineratu du. 

Brasilgo Gobernuak Latinoamerika eta Karibeko Estatuen Komunitatearen (gazteleraz, CELAC) bilera deitu du arratsalderako, urgentziaz. Latinoamerikako eta Karibeko 33 herrialdek osatzen dute CELAC, eta tartean daude, besteak beste, Argentina, Brasil, Mexiko, Kolonbia, Venezuela, Kuba, Txile, Peru, Ekuador edo Dominikar Errepublika. 

"Latinoamerika eta Karibeko Estatuen Komunitatearen ministerio bilera deitu dugu urtarrilaren 4rako, Brasilian 14:00ak direnean (18:00etan, Euskal Herrian), jakinarazi du Maria Laura de Rocha Brasilgo Atzerri gaietarako ministroaren ordezkoak. 

Radio Euskadiko "Crónica de Euskadi fin de semana" saioan elkarrizketa egin diote gaur Arantxa Gonzalez Laya Espainiako Gobernuko Atzerri gaietako ministroa izandakoari. Horren ustez, atzo Venezuelan gertatutakoa "aurrekari izugarria" da, eta ohartarazi du Karibeko herrialdean jazotakoa berdin-berdin gerta litekeela beste herrialde batzuetan, Ukrainan, Taiwanen edo Groenlandian, kasu. Hala, aurreikusi du "2026a urte zaila" izango dela.

Gainera, Donald Trumpen agerraldia hizpide, esan du "ez zuela bakar baten ere demokrazia aipatu", eta oso kezkagarria egin zaio. 

Amnistia Internazionalaren arabera, Nicolas Maduro Venezuelako presidentea eta haren emaztea harrapatzeko operazio militarrak Nazioarteko Zuzenbidea urratu du "ziurrena", eta Venezuelako herritarren giza eskubideen gaineko kezka areagotzen du. 

Taldeak ohar bidez kezka adierazi du operazioak Hego Amerikako herrialdearen gatazka areagotu dezakeela eta, giza eskubideak kinka larrian jarrita. 

Txinako Atzerri Gaietarako Ministerioak oharra kaleratu du, AEBk Nicolas Maduro Venezuelako presidentea eta haren emazte Cilia Flores atxilotu izana salatzeko. Horiek "berehala akatzea" eskatu du Txinak, eta gatazkari "irtenbide negoziatu" bat ematea exijitu du, "elkarrizketaren bidez". 

Nicolas Maduro Venezuelako presidentea Guantanamotik eraman du Boeing 757 hegazkin batek larunbat honetan New Yorken, eta bertan, Cilia Flores emaztearekin batera, agerraldia egin beharko du datozen egunetan auzitegi federal baten aurrean, narkoterrorismoa leporatu ondoren.

Nicolas Maduro Venezuelako presidentea ondorengo orduetan iritsiko omen da New Yorkera, eta Metropolitan Detention Centerrera (MDC) eramango dute, Brooklyn barrutiko espetxe federal batera, CNN telebista kate estatubatuarraren arabera.

Iturri propioak aipatuz, telebistak iragarri du Madurok astelehenean egingo duela agerraldia New Yorkeko Hegoaldeko Barrutiko (SDNY) auzitegi batean.

Delcy Rodriguez Venezuelako presidenteordeak agerraldia egin du Donald Trumpenaren ondotik. Nicolas Maduro, "herrialdearen presidente bakarra", eta horren emaztea "berehala aske uzteko" galdegin du.

Halaber, lasaitasunerako eta batasunerako deia egin du berriro, eta nabarmendu du Venezuela ez dela "inoiz izango beste inoren kolonia". 

Ehunka pertsona kalera atera dira gaur arratsaldean Bilbon, Donostian eta Gasteizen AEBk Venezuelaren kontra egindako erasoa salatzeko. Jardun koordinatzaileak deituta egin dituzte protestok "Prozesu bolivartarraren defentsan, Venezuela tinko!" lelopean.

Biharko, igandearekin, bilkura gehiago deitu ditu (12:30erako) Hegoak plataforma internazionalistak EAEko hiriburuetan eta Iruñean. 

Trumpek iragarri du AEBko petrolio konpainiek "milaka milioi dolar" inbertituko dituztela Venezuelako azpiegituratan; izan ere, horren aburuz, "oso egoera txarrean" daude.  Argudiatu duenez, Venezuelako petrolioaren negozioa "erabateko porrota" izan da azken urteotan. "Ez ziren ia ezer ere ateratzen ari", deitoratu du. 

Kazetarien galderei erantzunda, AEBko presidenteak adierazi du Venezuela zuzentzeko pertsona jakin batzuk aukeratzen ari direla. "Laster jakingo duzue nortzuk diren", gaineratu du.

Kazetariek Maria Corina Machado talde horretan egongo ote den itaundu diote Trumpi. Honek ezetz esan du: "Oso zaila litzateke berarentzat buruzagitza hartzea. Venezuelan ez du babesik, ezta jendearen errespeturik ere". 

Donald Trump AEBko presidenteak agerraldia egin du arratsaldean Nicolas Maduro Venezuelako presidentea atxilotu ostean. Bart gaueko erasoaren berri eman du lehenik, eta azpimarratu AEBko Armadak "eraso ikusgarria" egin duela Caracasko "bihotzean" Maduro eta emaztea "Justiziaren aurrera eramateko". 

Nabarmendu du bart gauekoa II. Mundu Gerratik egindako eraso "ikusgarriena" izan dela, eta erantsi beste herrialdeentzat, Kubarentzat edo Kolonbiarentzat berbarako, "abisua" dela. 

Gainera, jakinarazi du AEBk Venezuelaren kontrola hartuko duela "trantsizio egoki eta seguru bat" izan arte. 

Mar-a-Lagon 17:00etarako deituta duen agerraldiaren atarian, elkarrizketa eskaini dio Donald Trumpek FoxNews telebista kateari. Bertan esan du "aztertu" behar dutela Maria Corina Machado Venezuelako oposizioaren burua presidente gisa babestu ala ez. 

"Presidenteorde bat dute Venezuela, jakina denez. Ez dakit zer motako hauteskundeak izan ziren horiek, baina badakigu Madurorenak lotsagarriak izan zirela", erantsi du. Trumpen hitzetan, "jendeak ez du (Maduro) estimu handitan". 

Nicolas Maduro Venezuelako presidentea eta Cilia Fores horren emaztea USS Iwo Jima ontzi militarrean dituzte, eta New Yorkera bidean daude, Donald Trump AEBko presidenteak jakinarazi duenez.

"New Yorkera bidean doaz. Bertan auzipetu dituzte. Itsasontzi militarrera eraman dituzte, eta New York dute helmuga. Helikopteroz eraman dituzte. Bidaia ona izango zutelakoan nago", esan du Trumpek Fox News telebista katean egin dioten elkarrizketa batean.

Euskal Herriko Kontseilu Sozialistak (EHKS) elkarretaratzeak deitu ditu gaurko Euskal Herriko hiriburu nagusietan "Venezuelako herri langilearekin elkartasuna adierazteko eta AEBk herrialde horren aurka aurrera daramaten eraso inperialista salatzeko". Hego Euskal Herrian 19:00etan izango dira bilkurak, Bilboko plaza biribilean, Gasteizko Posta plazan, Donostiako Boulevardean eta Iruñeko Udaletxe plazan. Baionakoa 17:30ean egingo dute, Reduit plazan

Imanol Pradales lehendakariak adierazi du "gertutik, etengabe eta kezkaz" jarraitzen ari direla Venezuelako egoera, "historikoki errotutako euskal komunitate ugaria baitago bertan". Pradalesek mezua kaleratu du X sare sozialean duen profilean eta, Europar Batasunak adierazitako jarrerarekin bat eginda, eskatu du "nazioarteko legedia eta Nazio Batuen gutuna errespetatzea" eta "multilateralismoa, elkarrizketa eta diplomaziaren defentsa" aldarrikatu ditu bakerako eta gatazkak konpontzeko bide gisa. 

Lehendakariak uste du nazioarteko zuzenbidea berme guztiekin errespetatu behar dela, "demokrazia eta askatasuna herrialdera itzultzea ahalbidetuko duen trantsizio erreala ziurtatzeko. Venezuelarren oinarrizko eskubide eta askatasun guztiak babestuko dituen demokrazia, bai eta haien jardun askea eta subiranotasun osoa ere".

Azkenik, gogora ekarri du bi euskal herritar Venezuelako kartzela batean dituztela, "gutxieneko berme judizialik gabe".

EAJ "kezkatuta" azaldu da AEBk Venezuelaren kontra egin duen erasoaren ondotik, eta "nazioarteko legedia errespetatzeko" eskatu dio Trumpen gobernuari. Halaber, adierazi du espero duela venezuelarrek "erregimen demokratiko bat izateko trantsizio politikoa" egiteko aukera izatea.

Gogorrago mintzatu da EH Bildu eta AEBk "Venezuelako Errepublika Bolibartarrari eraso" diola salatu du; "nazioarteko eskubidearen printzipio guztiak urratu dituzte", erantsi du. Ildo beretik, Arnaldo Otegi koalizio subiranistaren koordinatzaile nagusiak "irmo gaitzetsi" ditu gertatutakoak eta "Venezuela herri burujabearen kontrako esku hartze inperialistatzat" jo ditu. 

PSE-EEk ez du oraingoz adierazpenik egin eta EAEko PP Alberto Nuñez Feijooren erreakzioa zabaltzera mugatu da.

Podemos Euskadik "irmo gaitzetsi" du AEBk Venezuelari egindako erasoa, eta "giza eskubideen zein demokraziaren defentsaren" kontrakoa dela nabarmendu du. "Inperialismo klasikoaren adierazpen bat da", azpimarratu du. Ezkerreko taldearen arabera, "indarkeria ezin da tresna politikotzat hartu eta ezin dira erasoak justifikatu. Bakea eta subiranotasuna ez dira negoziagarriak". 

Donald Trump AEBko presidenteak Truth Social sare sozialean duen profilean iragarri duenez, Maduro atxilotzeko operazioa "arrakastatsua" izan da. Xehetasun gehiago emateko agerraldia eskainiko du Mar-a-Lagoko (Florida) bertan 11:00ak direnean (17:00etan, Euskal Herrian). 

Diosdado Cabello Venezuelako Barne ministroak agerraldia egin du AEBk Maduro eta horren emaztea atxilotu ostean. AEBren erasoak "sarraskia" izan direla salatu du, baina lasaitasunerako deia egin die herritarrei. 

"Lasaitasunerako deia egin nahi dut. Izan konfiantza gure lidergoan, agintari politiko eta militarren zuzendaritzan. Lasaitasun osoa, ez diezazkiegun gauzak erraztu etsaiei", aldarrikatu du.  

Venezuelako fiskalak salatu du AEBk Maduro "bahitu" duela eta berehala aske uzteko eskatu du.  

Nazio Batuen Erakundeari (NBE) urgentziazko bilera eskatu dio Venezuelak, AEBren "erasoen" ondotik

Delcy Rodriguez Venezuelako presidenteordeak aitortu du ez dakiela non dauden Nicolas Maduro eta Cilia Flores emaztea. Hala, "bizirik dauden froga bat" eskatu dio AEBren gobernua.

Mezu berean, Venezuelaren kontrako "maila handiko erasoa" berretsi du Trumpek, eta Maduro AEBko indar bereziek harrapatu dutela zehaztu.

Nicolas Maduro presidenteak AEBren "eraso militar larria" salatu du, eta Venezuelak bere burua defendatzeko eskubidea duela berretsi du.