Trumpek ezarritako muga-zergei "erantzun bateratua" eman nahi die EBk

Antonio Costa Europako Kontseiluko presidenteak larunbat honetan jakitera eman duenez, Europako herrialdeen "erantzun bateratua" koordinatuko du Donald Trump buruzagi estatubatuarrak iragarri berri dituen muga-zergen aurrean. Hain zuzen ere, Groenlandiara tropak bidali zituzten eta uhartea anexionatzeko plana babesten ez duten zortzi herrialderi ezarri nahi dizkie Trumpek zerga ekonomiko horiek.

Costak adierazi duenez, Europak "oso jarrera irmoa izango du beti nazioarteko zuzenbidearen defentsan, edonon dela ere, eta, jakina, EBko estatu kideen lurraldetik hasita". Hala azpimarratu du EBk Mercosurrekin (Argentina, Brasil, Paraguai eta Uruguai) sinatutako merkataritza akordioaren harira kazetarien aurrean egindako agerraldian.

Ursula von der Leyen Europako Batzordeko presidenteak eta Antonio Costa Europako Kontseiluko presidenteak ohar bat partekatu dute sare sozialetan, eta bertan adierazi dutenez, "muga-zergek Atlantikoaz gaindiko harremanak ahulduko lituzkete eta beheranzko espiral arriskutsua eragin lezakete. Europak batuta, koordinatuta eta bere subiranotasunaren defentsarekin konprometituta jarraituko du".

Von der Leyenek eta Costak lurralde osotasuna eta subiranotasuna azpimarratu dituzte nazioarteko zuzenbidearen oinarrizko printzipio gisa, eta "Artikoko bakean eta segurtasunean duten interes transatlantiko partekatua" azpimarratu dute, "baita NATOren bidez ere".

"Danimarkako ariketa militarra, aldez aurretik koordinatua eta aliatuekin egina, Artikoan segurtasuna indartzeko beharrari erantzuten dio, eta ez dakar inolako mehatxurik inorentzat", ziurtatu dute. "Elkarrizketak funtsezkoa izaten jarraitzen du, eta Danimarkako Erresumaren eta AEBren artean hasitako prozesuan aurrera egiten jarraitzeko konpromisoa" berretsi dute bi agintariek.

Trumpek jakinarazi duenez, otsailaren 1etik aurrera, % 10eko muga-zergak izango dituzte Groenlandiara tropak bidali dituzten Europako zortzi herrialdetako produktu guztiek. Uhartean segurtasun falta dagoela iritzita hartu ditu neurri horiek buruzagi errepublikanoak.

AEBko presidenteak bere sare sozialetan adierazi duenez, gainera, % 25era igoko ditu muga-zergak ekainean, eta indarrean jarraituko dute Washingtonek "Groenlandia erabat eta osorik erosteko" akordioa itxi arte.

Zehazki, ondorengo herrialde hauei ezarriko lizkieke Trumpek muga-zerga horiek: Danimarka, Norvegia, Suedia, Frantzia, Alemania, Erresuma Batua, Herbehereak eta Finlandia.

Costak nabarmendu du berak eta Ursula von der Leyen Europako Batzordeko presidenteak une "historikoa eta oso garrantzitsua" bizi izan dutela larunbat honetan, munduko merkataritza libreko "eremu zabalena" sortu baitute. Bere ustez, EBren eta Mercosurren arteko merkataritza itunak mezu "oso argia" bidaltzen dio munduari: "Ez dira beharrezkoak herrialdeen arteko gatazkak, bakea eta lankidetza baizik".

"Funtsezkoa da nazioarteko zuzenbidea beti babestea, edonon dela ere. Errusiak Ukraina inbaditzen badu, altxatu egin behar dugu Ukrainan lurralde horren osotasuna eta subiranotasuna defendatzeko. Venezuelan giza eskubideak urratzen badira, altxatu egin behar gara Venezuelan giza eskubideak defendatzeko", esan du Costak.

Europako Kontseiluko presidenteak azpimarratu duenez, "oparotasuna nahi badugu, merkatuak ireki behar ditugu, eta ez itxi. Integrazio ekonomikorako eremuak sortu behar ditugu, eta ez muga-zergak handitu".