NATOrekin Groenlandiari buruzko aurreakordioa iragarri du Trumpek, eta muga-zergen mehatxua erretiratu du

NATOrekin Groenlandiari buruzko aurreakordioa itxi duela jakinarazi du Donald Trump AEBko presidenteak, Mark Rutte Ipar Atlantikoko Itunaren Erakundeko idazkari nagusiarekin bildu ondoren. Ondorioz, Europako zortzi herrialderi ezarritako muga-zergak erretiratu egingo dituela ere esan du buruzagi estatubatuarrak. 

Davosen (Suitza) egiten ari diren Munduko Ekonomia Foroaren testuinguruan elkartu dira bi mandatariok, gaur arratsaldean. "NATOko idazkari nagusiarekin bilera oso emankorra izan ondoren, Groenlandiarako eta Artiko osorako akordio baterako oinarriak adostu ditugu", idatzi du Trumpek Truth Social sare sozialean. Adostutakoa Estatu Batuentzako zein NATO osatzen duten herrialde guztientzako "oso onuragarria" izango dela ere gehitu du. 

Era berean, Davoseko Kongresuen Zentrotik atera denean, atarian zain zituen kazetariei esan die "benetan aparta" dela ituna. "Nahi genuen guztia daukagu", zehaztu du. 

Aurreratu du "laster" egingo dutela publiko hitzartutako testua. Bere hitzetan, "oso aurreratuta dago" eta  "xehetasunak" ixtea falta da. Indarrean noiz arte egongo den galdetuta, hau bere erantzuna: "Ez du eperik, betirako da". 

Indarrik erabili gabe

Rutterekin bildu aurretik, hitzaldia eman du ekonomia foroan, eta mundu osoko mandatarien aurrean berretsi du Groenlandia erosteko asmoari eusten diola, baina ez duela indarra erabiliko ziurtatu du.  "Ez dut indarra erabili beharrik", esan du.

Hala ere, agintari estatubatuarraren iritziz, AEB da "Groenlandia babesteko gai den herrialde bakarra". Hori dela eta, salerosketa ahalbideratzeko negoziazioak hastea eskatu du. Lurrak erosteak ez daukala "ezer txarrik" azpimarratu du, eta ziurtatu du operazioa ez dela NATOren kontrako mehatxua izango. "Aliantzaren segurtasun orokorra hobetuko du", esan du.

Trumpen hitzetan, Groenlandia AEBren "segurtasun nazionalerako gai erabakigarria" da. Azaldu du AEBk politika berberari eutsi izan diola ehunka urtez, "mehatxuak gure hemisferioan sartzea ekiditeko". 

Halaber, Danimarka "esker txarrekoa" dela esan du. "Bigarren Mundu Gerraren ostean uhartea guretzat izan behar zen", adierazi du. AEB "Danimarkaren alde borrokatu zen eta lurraldea itzuli zien", gaineratu du.

"Mirari ekonomikoa" AEBn

Etxeko ekonomia ere izan du hizpide AEBko presidenteak Davosen. Harro agertu da bere hitzaldia entzuten ari ziren enpresari eta politikarien aurrean. Bere bigarren agintaldiaren lehen urtea "mirari ekonomikoa" izan dela esan du.

Bere iritzian, AEBko ekonomia goraldian dago: "hazkundeak gora egin du, produktibitateak gora egin du, inbertsioek gora egin dute, diru-sarrerek gora egin dute eta garaitu egin dugu inflazioa".

Trumpek gogorarazi duenez, "sasiaditu ia guztiek" iragarri zuten haren planek munduan atzeraldia eragingo zutela, kontrolik gabeko inflazioarekin. "Oker zeudela erakutsi diegu. Guztiz kontrakoa gertatu  da", ziurtatu du.

Beste herrialde batzuen egoera guztiz kontrakoa dela iradoki du, eta Europa aipatu du. Haren aburuz, beste herrialde batzuek egoera hobetuko lukete AEBren ereduari jarraituko baliote. "Europako zenbait leku ezagutu ere ez dituguu egiten", esan du. "Europa maite dut eta aurrera egiten ikusi nahi dut, baina ez dabil bide onean", gaineratu du.