Beroak ez du atsedenik emango asteburuan: 30 ºC inguruko tenperaturak espero dira

Beroak jarraipena izango du asteburuan Euskal Herrian, eta 30 ºC inguruko tenperaturak espero dira. Larunbatean, goiza eguzkitsua izango da, baina behe-hodeiak ager daitezke arratsaldean, eta zaparradaren bat utz dezakete, bereziki kostaldean. Hori dela eta, alerta laranja ezarri dute tenperatura altuengatik Araban, Nafarroan eta Ipar Euskal Herrian; Bizkaian eta Gipuzkoan, aldiz, abisu horia egongo da indarrean, kostaldean tenperatura freskoagoak izango baitira.

Tenperatura maximoak 37 ºC ingurukoak izango dira barnealdean, eta 28 ºC-koak kostaldean, Euskalmet euskal meteorologia agentziak egindako iragarpenaren arabera. Hori dela eta, abisu horia ezarri dute Euskal Autonomia Erkidegoan baso-sute arriskuagatik gaurko eta biharko. Dena dela, iparraldeko haizea gailenduko da arratsaldean, eta beroa arintzen lagunduko du.

Bilbon eta Donostian, adibidez, 28 ºC inguru espero dira, Gasteizen 37 ºC, Iruñean 39 ºC eta Baionan 28 ºC. Beste udalerri batzuetan ere antzeko maximoak izango dira: Arrasaten 34 ºC-koak eta Guardian 39 ºC-koak.  

Igandean, eguraldiak ildo beretik jarraituko du, eta alerta laranja izango da indarrean; izan ere, Ebro ibaiaren ardatzean, 39 ºC gradu izango dira, eta trantsizio-eremuan, 38 ºC , 12:00etatik 20:00etara. Gainera, abisu horia egongo da indarrean isurialde atlantikoko barnealdean (maximoak 35 gradu ingurukoak izan daitezke) eta kostaldean (27 gradu ingurukoak).

Arratsaldean, bero-hodeiak garatuko dira EAEn, eta ekaitzen batek jo dezake barnealdeko zenbait lekutan. Egunaren amaieran, behe-hodeiak agertuko dira isurialde atlantikoan. Haize aldakor eta ahula ibiliko da goizean, iparraldetik finkatuz joango da eta indartu egingo da arratsaldean.

Hala, 28 ºC-ko maximoak espero dira Donostian eta Bilbon, 37 ºC-koak Gasteizen, 39 ºC-koak Iruñean eta 28 ºC-koak Baionan.

Astelehenean, ordea, eguraldia zeharo aldatuko da eta tenperatura asko jaitsiko da. Ipar parteko leku askotan, balio altuenak 25 ºC-tik beherakoak izango dira, eta beroa eramangarriagoa izango da hegoaldean, maximoak ez baitira 30 ºC-tik gora helduko.

Tenperaturak behera egiteaz gain, baliteke goizean euria egitea, bereziki isurialde atlantikoan, eta zaparradak edo trumoi-ekaitzak edonon bota ditzake arratsaldean eta gauean. Iparraldeko eta ipar-mendebaldeko haizea ibiliko da,  eta apur bat indartuko da arratsaldean.