Rajoyk eta Riverak Kataluniako egoera aztertu dute Moncloa jauregian

Mariano Rajoy Espainiako Gobernuko presidentea eta Albert Rivera Ciudadanoseko buruzagia bildu dira gaur, Moncloa jauregian, abenduaren 21eko hauteskundeen ondoren Kataluniako egoera aztertzeko.

Bilerak ordu eta erdiko iraupena izan du eta Kataluniako hauteskundeak egin eta astebete geroago gertatu da. Hauteskundeetan Ciudadanosek garaipena lortu zuen 36 eserleku eskuratuta, baina independentistek gehiengo absolutua erdietsi zuten.

Testuinguru honetan, Ines Arrimadas alderdi laranjako zerrendaburuak gobernua osatzeko saiakerari uko egin dio. Alderdi Popularrak erabaki hori gogor kritikatu du. PPCk muturreko galanta hartu zuen hauteskundeetan; izan ere, 11 diputatu izatetik lau izatera pasa da.

Erabateko adostasuna

Kataluniako Gobernu berriak Konstituzioa eta “lege demokratikoak” bete behar dituela uste dute Rajoyk eta Riverak, “bizikidetza eta normaltasun demokratikoa berreskuratzeko” helburuarekin.

Bestalde, Kataluniako Exekutibo berria osatu arte Konstituzioaren 155. artikulua aplikatzen jarraitzea defendatu dute bi buruzagiek, “kataluniar guztien zerbitzu publikoak bermatzeko”, Ciudadanosek jakitera eman duenez.