Nazioarteko pertsona ospetsuek ETAren amaiera ziurtatuko dute gaur, Kanbon
Nazioarteko pertsona ospetsuek, besteak beste, Gerry Adams Sinn Feineko presidente ohiak eta Jonathan Powell Tony Blair lehen ministro ohiaren aholkularia zenak, ziurtatuko dute gaur ETAren amaiera Kanbon (Lapurdi). 12:00etatik aurrera, Arnaga etxean bilduko dira. Gonbidatuak heltzen ari dira.
'Euskal Herriko Gatazkaren Konponbidean aurrera egiteko Nazioarteko Bileran' 89 gonbidatuk parte hartuko dute. Adierazpenaren irakurketa 13:00etan izatea espero da. Brian Currin, Raymond Kendall eta Alberto Spektorowsky Harremanetarako Nazioarteko Taldeko kideek, Anais Funosas Bake Bideko presidenteak eta Agus Hernan Foro Sozial Iraunkorreko koordinatzaileak hitza hartuko dute.
Emakume gazte batek irakurriko du 'Arnagako Adierazpena', "Euskal Herriko etorkizun berriaren ordezkari bezala".
ETAren bukaerari sinesgarritasuna eta erakundearen azken adierazpenari bermea emateko asmoa du ekitaldiak. EAJ, EH Bildu eta Podemos Euskadiren ordezkariak bertan izango dira, baita sindikatuak eta gizarte eragileak ere.
Nazioarteko beste agintari batzuk ere ekitaldian egotea espero dute, Cuauhtemoc Cardenas Mexikoko PDR alderdiaren sortzaile eta hiru aldiz presidentegaia esaterako, prozesuko iturriek jakitera eman dutenez.
Ekitaldia Aieteko Konferentziaren (2011ko urriaren 17 egin zuten Donostian) antzera diseinatu dute. Horrela, ekitaldia Brian Currin Hegoafrikako abokatuak zuzendutako Harremanetarako Nazioarteko Taldeak, Foro Sozial Iraunkorrak eta Bake Bidea elkarteak antolatu dute.
Currinek biktimen, bizikidetzaren eta presoen gaiak konpontzea eskatu zuen ostegunean, ETAren desegitearen berri izan ondoren. Currin Loiuko aireportura heldu zen ostegunean, Kanbora joateko gero. Bilboko aireportura heltzean, ETAren azken agiria izan zuen hizpide Currinek. "Irtenbide bat eman beharreko zenbait kontu daude oraindik", adierazi zuen ETBn.
"Landu beharreko indarkeriaren ondorioak geratzen dira, biktima, elkarbizitza eta presoekin lotutako arazoak, esaterako. Ondorio horiek guztiak oso garrantzitsuak dira", erantsi zuen.
Aieteko Konferentzian, 2011n, parte hartu zuten guztiak gonbidatu dituzte antolatzaileek, ETAren desagerpen prozesua maila bereko ekitaldi batekin ixteko saiakeran, baina azkenean Donostiako bileran egon zen agintari esanguratsu bat, Kofi Annan NBEko idazkari nagusi ohia, Kanbon izango ez dela ematen du .
Arnaga etxea (Kanbo, Lapurdi). Argazkia: EFE
Gonbidatuak
Ipar Euskal Herriko buruzagi politikoak, aldiz, bertan egongo dira, Jean Rene Etchegaray Baionako alkatea buru. 2016ko apirilaren 8an armagabetze ekitaldia babestu zuen Etchegarayk.
Gonbita zuhurtziaz hartu zuten Eusko Jaurlaritzak eta Nafarroako Gobernuak, eta ez dute Kanbora ordezkaririk bidaliko. EAJk, baina, goi mailako ordezkaritza bidaliko du ekitaldira: Andoni Ortuzar Euzkadi Buru Batzarreko (EBB) presidentea, Joseba Aurrekoetxea Antolakuntza idazkaria eta Pako Aizmendi Ipar Buru Batzarreko (IBB) presidentea.
Joseba Egibar Gipuzkoa Buru Batzarreko (GBB) presidentea ere gonbidatu dute antolatzaileek, "gatazka konpontzeko aldez aurretiko saiakeretan parte hartzeagatik", Lizarrako Akordioaren negoziazioan.
EH Bilduk Arnaldo Otegi buruzagia, Maddalen Iriarte legebiltzarkidea eta Aldolfo Araiz eta Bakartxo Ruiz Nafarroako parlamentariak bidaliko ditu.
Henri Dunant Fundazioko ordezkariak (ETArekin izandako elkarrizketa prozesuan parte hartu zuen), Jesus Eguiguren buruzagi sozialista ohia, Harremanetarako Nazioarteko Taldeko eta Egiaztatzaileen Taldeko kideak (armagabetzean parte hartu zuten iaz) ere izango dira bertan.
Kotte Ezenarro Hendaiako alkatea, Max Brisson LRko (Les Republicains) senataria, Frederique Espagnac PSko senataria, Florence Lasserre eta Vincent Bru Modemeko diputatuak eta Alain Iriart Hiriburuko alkatea ere topagunean izango dira.
Eugenio Etxebeste Antxon ETAko kide ohia eta Rafa Diez Usabiaga LABeko idazkari nagusi ohia gonbidatuen artean daude.
12:00etatik aurrera, Arnaga etxean bilduko dira. Edmond Rostand idazleak, Cyrano de Bergerac-en egileak, 1903an eraiki zuen Arnaga etxea. Bilera bukatu ondoren, azken adierazpen bat irakurriko dute nazioarteko agintariek. Cardenasek agiria gaztelaniaz irakurtzea espero da.
Azken agiri horren xehetasunik ez dute jakinarazi, baina testua ETAren amaierari sinesgarritasuna eta bermea ematen saiatuko omen da.
Gerry Adams Sinn Feineko presidente ohiaren iritsiera. Irudia: EiTB
Zure interesekoa izan daiteke
Begoña Gomezek pasaportea eman du epaitegian, epaileak eskatuta
Epaileak kautelazko neurri gisa kendu dio, bere aurkako ahozko epaiketa ireki baitu, lau delitu posiblerengatik, negozioetako ustelkeria barne.
EAJk eta EH Bilduk akordioa lortu dute enplegu publikoaren legearen erreforma aurrera ateratzeko
EH Bilduk abstentzioa emango du bihar, osteguna, Legebiltzarrean. Modu horretara, EAJk bultzatutako legearen aldaketa onartzea ahalbidetuko du. Horrez gainera, hiru urteko epean, legearen aplikazioari eta eraginkortasunari jarraipen bateratua egitea ere adostu dute bi taldeek.
Feijook hauteskundeak deitzeko eskatu dio beste behin Sanchezi: "Zu zara ustelen arteko lotura politikoa"
Euren agerraldietan, EH Bildu eta EAJ kritiko agertu dira Espainiako Gobernuarekin, eta legealdiari zentzua emateko eskatu diote Pedro Sanchez presidenteari.
Sanchezen esanetan, ustelak ezin dira zigorgabe geratu, "edonor izanda ere"
Espainiako Gobernuko presidenteak errespetua agertu du asteazken honetan Auzitegi Gorenak Jose Luis Abalos ministro ohiaren aurka emandako epaiari, eta ziurtatu du "inoiz ez" zuela izan Gobernuko eta alderdiko zenbait kideri eragiten dieten praktika ustelen berri, eta jakin izan balu, ez lituzkeela onartuko.
Moncloak azpimarratu du batzuek "huts egin" diotela Sanchezi eta ez duela dimisioa eman beharrik
Astelehen honetan, Alberto Nuñez Feijoo PPko buruzagiak Espainiako Gobernuko presidentearen dimisioa eskatu zuen berriro ere, Auzitegi Gorenak Abalosi 24 urteko kartzela-zigorra ezarri ostean.
Froga batzuen abal judiziala egiaztatzen ez bada, kasua baliogabea izatea planteatu du Zapaterok
Espainiako Gobernuko presidente ohiak hainbat idatzi igorri dizkio epaileari, Plus Ultra airelinearen erreskatearen inguruko eraginen trafikoko sare baten ustezko buruzagi moduan ikertu gisa deklaratu ostean.
Pradales: "Asko dago egiteko; bide orriak euskal agendan sakontzea dakar"
Lehendakariak agintaldiaren lehen erdiaren balantzea egin du Ajuria Enean, ekitaldi instituzional batean. Bere hitzaldian, Euskadin lantzen den egonkortasuna nabarmendu du, "oso ezegonkorra" den testuinguru globalean aurrerapena, ongizatea eta autogobernua bermatzeko faktore erabakigarri gisa.
Sanchezek 6.200 milioi euroko inbertsioa iragarri du dependentziaren alorrean
Neurriak 1,6 milioi pertsonari eragingo die, eta diru-laguntzak handitzea ekarriko du. Dekretu bidez onartuko du Espainiako Gobernuak.
EAJk onartu egin du Espainiako Gobernuarekin harremana izan duela Tubos Reunidosen egoera bideratzeko, baina adierazi du Leire auziarekin ez duela loturarik
Alderdi jeltzalearen esanetan, Arabako enpresaren egoeraz arduratzeko egindako bilerak konpainia estrategikoei laguntzeko egindako lanaren parte izan ziren. Bestalde, PPk galdetu du PSOErekin zuten harreman horrek "baldintzatzen" ote duen "Pedro Sanchezi laguntzen jarraitzea".
Otsoaren ehizari bide ematen dion txostenak autonomia-erkidego gehienen babesa jaso du
Kataluniak bakarrik bozkatu du kontra, eta Euskadi eta Gaztela-Mantxa abstenitu egin dira. Trantsizio Ekologikorako eta Erronka Demografikorako Ministerioa ere proposamenaren aurka agertu da.