Hutsik dauden etxebizitzak desjabetu ahalko dituzte Jaurlaritzak eta udalek
Euskal Autonomia Erkidegoko Etxebizitza Legearen artikulu gehienak babestu ditu Auzitegi Konstituzionalak, besteak beste, Eusko Jaurlaritzari eta udalei hutsik dauden eta “funtzio soziala” betetzen ez duten etxebizitzak desjabetzeko aukera ematen dien artikulua. Horretarako, etxebizitza kokatzen den zonan etxe sozialen eskaria egon behar du.
Auzitegi Konstituzionalaren epaiaren berri eman du gaur Eusko Jaurlaritzak. Mariano Rajoyren Gobernuak Etxebizitza Legea errekurritu zuen 2016an, eta Konstituzionalak zenbait artikulu bertan behera utzi zituen erabaki bat hartu bitartean.
Orain legearen artikulu gehienak babestu ditu Konstituzionalak, besteak beste, alokairu sozialaren merkatuan jartzeko, hutsik dauden etxebizitzak desjabetzeko aukera jasotzen duena.
Hala ere, bankuek, higiezinen enpresek zein aktiboak kudeatzeko konpainiek bultzatuta, hipoteka betearazteko prozesuan, etxegabetze prozeduretan murgilduta dauden etxebizitzak indarrez desjabetzeko artikulua Konstituzioaren aurkakoa dela ebatzi du Auzitegiak.
Epaiak erkidegoari esparrua erabateko segurtasun juridikoarekin arautzeko “eskumen osoa” aitortzen diola azpimarratu du Iñaki Arriola Etxebizitza sailburuak.
Etxebizitza bat hutsik dagoela erabaki baino lehen, espedientea zabaldu, jabeei azaltzeko aukera eman eta ondoren legearen baldintzak betetzen ote dituen zehaztu beharko dute erakundeek; azkenean kanon bat edo behartutako errenta bat ala aldi baterako desjabetzea aplikatu ahal izateko.
“Desjabetze oldea aurrera eramango dugunik ez du esan nahi horrek”, adierazi du sailburuak. Jabetza kentzea posible den etxebizitzen zerrenda bat egiten ari direla iragarri du Arriolak, baina egoera horretan egon daitezkeen etxeen kopururik ez du zehaztu.
Etxebizitza Legea 2015eko ekainean onartu zuen Eusko Legebiltzarrak. PSEren ekimenak EH Bilduren eta UPyDren babesa jaso zuen. PPk eta EAJk kontrako botoa eman zuten.
Zure interesekoa izan daiteke
Lehendakariak Euskadiren nazioarteko proiekzio kulturala bultzatuko du datorren astean Italiara egingo duen bidaian
Bidaiaren ardatz nagusia mundu mailan arte garaikidearen agertoki nagusietako bat den Veneziako Bienalaren baitan antolatu diren ekitaldietan parte hartzea izango da, 1976an bienalean izandako lehenengo euskal presentziaren 50. urteurrenean.
Andueza, polemikari buruz: "EAJk liskar artifiziala sortu zuen euskarari buruzko akordioa bertan behera utzi zuelako"
Hasi da hauteskunde kanpaina Andaluzian
Sevillan ekin die kanpainako ekitaldiei Alderdi Popularrak; Granadan, Alderdi Sozialistak. Moreno Bonilla PPko hautagai eta gaur egungo presidenteak gehiengo absolutua nahi du; ez du Vox nahi bere gobernuan. Jarraitzaileei botoa ematera joateko deia egin die, inkestek iragartzen duten gehiengo absolutua ziurra ez delakoan. Alderdi Sozialistaren hautagai Maria Jesus Monterok, berriz, inkestek iragartzen dizkioten emaitza txarrak irauli nahi ditu eta zerbitzu publikoen aldeko defentsan oinarritu du kanpaina.
Medikuen gatazkan esku hartzeko eskatu diote EH Bilduk eta PPk Osasun sailburuari
Medikuen grebaz aritu dira gaur, besteak beste, Eusko Legebiltzarrean. EH Bilduk medikuen lan-baldintzak hobetzeko mozioa eraman du ganberara, eta Rebeka Ubera koalizioko legebiltzarkideak Alberto Martinez Eusko Jaurlaritzako Osasun sailburuari eskatu dio, fitxa mugitu eta neurriak hartzeko aferan. Alderdi Popularreko Laura Garridok ere defendatu du Jaurlaritzak badituela eskuduntzak, medikuen egoera hobetzeko.
Koldo Garciak bere "errugabetasuna" defendatu du eta maskaren erosketan erabakitzeko ahalmenik ez zuela gaineratu du
Maskarak iruzurra eginda erosi ziren ala ez ikertzeko egiten ari diren epaiketan, Abalosen aholkulari izandakoak esan du ez duela gogoratzen esleipena egokitu zitzaion eskaintza Aldamak igorri ote zion.
Hauteskundeak, Andaluzian: zer du jokoan alderdi bakoitzak M17an?
Bihar abiatuko da hauteskunde kanpaina Andaluzian. Inkesta guztiek Juanma Moreno PPko hautagaia jotzen badute ere irabazle, ikusteko dago Voxen botoak beharko dituen ala ez gobernatzeko. PSOEk, berriz, Maria Jesus Montero hautagaiarekin indar erakustaldia egin nahi du, azken urteotan galdutako boto-emaileak berreskuratuz.
Atzerri Ministerioak Israelgo enbaxadako arduraduna deitu du Global Sumuden aurkako erasoagatik
Bien bitartean, EH Bilduk, Sumarrek, Podemosek, ERCk, BNGk eta Compromisek Albares ministroaren agerraldia Kongresuan eskatu dute, ontziak eta atxilotuak babesteko hartuko dituen neurriak azaldu ditzan.
Enplegu Publikoaren Legeari zuzenketak egiteko epea bukatuta, jarrerek elkarrengandik oso aldenduta jarraitzen dute
Azken orduetan, zuzenketak erregistratu eta beren jarrerak azaldu dituzte talde parlamentarioek, eta agerian geratu da zein urrun dagoen administrazioan euskararen etorkizunerako funtsezkotzat jotzen den legea erreformatzeko akordioa.
PPren ustez PSE-EE "plantak egiten dabil", eta kritikatu du euskara arloko politiketan "konplizea" dela
Laura Garridok EAJren eta EH Bilduren hizkuntza politikak babestea leporatu dio PSEri, eta enplegu publikoan euskarari buruz egindako erreformak kritikatu ditu.
PSE-EEk hizkuntza eskakizunei buruzko eztabaida gelditzea eskatu du, gero eta "polarizazio" handiagoa dagoelako
Sozialistek hizkuntza-indizeak legez blindatzea proposatu dute, arnasguneetan izan ezik, eta EAJren proposamenean "justifikaziorik gabeko gehiegikeriak" egon daitezkeela ohartarazi dute.