Errenterian Ciudadanosen mitin batean protesta egin zuten 23 lagun auzipetu dituzte

2019ko apirilaren 14an Ciudadanosek Errenterian (Gipuzkoa) egindako mitinaren aurkako protesten instrukzioa egiten ari den epaileak 23 pertsona auzipetu ditu, ordena publikoaren aurkako eta hauteskunde delituak leporatzeko zantzuak egon daitezkeela iritzita.

Zehazki, instrukzioa behin-behinean amaitutzat ematen duen autoak Hauteskunde Araubide Orokorrari buruzko Lege Organikoaren 146. eta 147. artikuluetan araututako hauteskunde-delituak aipatzen ditu; lehenengoak, sei hilabetetik hiru urte arteko espetxe-zigorra edo hamabi hilabetetik 24 hilabete arteko isuna ezartzen du, eta bigarrenak, berriz, hiru hilabetetik hamabi hilabete arteko kartzela-zigorra edo sei hilabetetik 24 hilabete arteko isuna.

Donostiako 4 zenbakiko Instrukzio Epaitegiak ireki zuen auzia, Gipuzkoako Fiskaltzak ikerketa abiatu ostean, alderdi laranjak eta Albert Rivera orduko presidenteak jarritako salaketaren ondorioz. Ciudadanosek, alderdiaren kontra jarritako pankartak erakusten zituzten bideoak eta argazkiak aurkeztu zituen froga gisa, baita egun horretan hainbat hedabidek zabaldutako hainbat irudi eta informazio ere. Horrez gain, sare sozialetan zabaldutako mezuak eta erabiltzaileen kontuak jaso zituzten salaketan.

Egun hartan, Errenteriako Foruen plaza inguratu zuten pertsona batzuk alderdiaren kontra oihuka hasi ziren. Besteak beste, "faxistak kanpora, koldarrak, nazkagarriak eta putakumeak" oihukatu zute, eta metxeroak, txanponak eta arrautzak bota zituzten inguruko balkoietatik.

Epailearen ustez, bere jokabideek ekitaldia "normaltasunez" garatzea saihestu zuten, eta horrek mitinean parte hartu zutenen "hauteskunde eskubideen urraketa larria" ekarri zuen, kontuan hartuta, gainera, ustez ikertutako pertsona bakoitzaren parte-hartzea "jendetzaren babesarekin egin zela, ardura pertsonala saihesteko, eta, beraz, jokabidea zabalduz".

Autoaren arabera, "herriko kaleetan ekitaldia ikusteko eta bertaratutakoei harrera egiteko jende andana bildu zenez, Poliziak beste lekuetatik bertaratutako agenteekin osatutako segurtasun dispositibo batean esku hartu behar izan zuen, istiluak saihesteko eta herritarrak kontrolatu eta geldiarazteko".

Horrela, idatziaren arabera, "ikertutako pertsona guztiek boikotaren deialdiari erantzun zioten, ez zuten ekitaldia egitea nahi, eta, beraz, kalean jendartean zeudela, oihuak eta irainak eginez, ekitaldia normaltasunez ez egitea lortu zuten, eta Ertzaintzako agenteen jarduna behartu zuten, larderiazko eta aurkako giroa zela eta. Hala, ordena publikoa asaldatu zuten".

Horrez gain, "hauteskunde-kanpainan politikan parte hartzeko eskubideak urratu zituzten, inguruan larderia erabiliz, eta hori euren jokabideekin bultzatu zuten, bertaratutakoen ideologia mespretxatzeko asmoz", azpimarratu du testuak.

Autoak dioenez, "ikertuetako inork ez du ukatu Ertzaintzak identifikatu zituen lekuetan zeudela, eta, oro har, haien jokabideak eta egindako adierazpenak onartu dituzte, baina jokabide hori erantzukizun indibidualekotzat hartu dute, beste batzuekin koordinatutako edozein ekintza alde batera utzita, eta protesta bat-bateko zerbait balitz bezala, aurreikusi eta prestatu gabe".