Chivitek berretsi du ez duela EH Bildurekin akordiorik adostuko: "Geroa eta Zurekin nahi ditut Gobernuan"

Nafarroako Gobernuko jarduneko presidente eta PSNren hautagai Maria Chivitek azpimarratu du ez duela EH Bildurekin akordiorik lortzeko inolako asmorik. Geroa Bairekin eta Zurekin Nafarroarekin osatu nahi du hurrengo legealdiko Gobernua Chivitek, gaurko bilera-sorta bukatu duenean komunikabideei adierazi dienez.

09:30ean egin du lehen hitzordua Uxue Barkosekin (Geroa Bai), eta bi ordu geroago bildu da Zurekin Nafarroa koalizioko Begoña Alfarorekin. Bi batzar horietan jorratutako kontuekin pozik geratu da Chivite.

Negoziazioen gaiari helduta, Chivitek argitu du oraindik ez duela Pedro Sanchez espainiar presidentearekin hitz egin, baina "Nafarroan Gobernua osatzeko, haren babesa daukat, baita herritarrena ere". Zehazki, zuzendaritzaren babesa duen galdetuta, erantzun du PSOEk jakin badakiela zein urrats ari den ematen PSN.

Ildo horretan, eta PSOEk urrats horiek babesten ote dituen galdetuta, Chivitek erantzun du ez duela kontrakorik esan: "Badakite zein pauso ematen ari garen, beste autonomia erkidego batzuetako pausoen jakitun diren bezala. Beraz, PSNko Antolakuntza idazkariak esan zuen moduan, Nafarroan erabakiko da".

Kazetarien aurrean egindako adierazpenetan Chivitek azaldu duenez, bazkide berdinekin eta orain artekoaren gobernu bertsua osatzeko borondatea helarazi die Geroa Bai eta Zurekin Nafarroa koalizioei, eta bi aldeen borondatea baiezkoa da. "Orain aurrera egitea dagokigu, lehen pausoa Nafarroako Parlamentuko gobernu organoetan eman behar da eta ondoren etorriko da gobernu akordioa", esan du.

Elkarrizketa erronda horretan EH Bildurekin hitz egiten ote duen galdetuta, Chivitek erantzun du hitzari eusten diotela, PSNk ez duela EH Bildurekin gobernua osatzeko asmorik eta bilerak bazkideekin izango direla. "Ez dugu gobernu akordiorik lortuko EH Bildurekin", eta gehitu du Geroa eta Zurekin nahi dituela Gobernuan. Edozein kasutan, nabarmendu du prest dagoela alderdi politiko guztiekin hitz egiteko, baita UPNko Esparzarekin ere, baina beti ere PSOEk nahi dituen ildoak zeintzuk diren argi izanda.

Parlamentuko Presidentetza eskatu dio Geroa Baik PSNri

Geroa Bairen Nafarroako Gobernurako hautagai Uxue Barkosek mezu argia helarazi dio gaur Maria Chivite sozialistari: Parlamentua zuzendu nahi du, Gobernuan bazkide direnen artean indarrak banatuta.

Nafarroako Parlamentuan egin dute lehen hitzordua ostegun honetan Chivitek eta Barkosek, eta, ondoren, komunikabideen aurrean agertu da Geroa Baiko hautagaia. Bere eskaera betez gero, Parlamentua nork zuzenduko lukeen galdetuta, esan du Geroa Baik hartu beharko lukeela erabakia, ez berak, baina Unai Hualdek lan "bikaina" egin duela gaineratu du.

Bestalde, Barkosek aurreratu du ekainaren 6an berriro bilduko direla. Gaurko hitzorduan, baina, "gobernu progresista eta plurala" osatzeko konpromisoa erakutsi dio PSNri.

"Lan asko dugu egiteko", esan du, "baina Gobernuak Parlamentura proposamenak ekartzea eta horiek aurrera ateratzea bilatuko du nire alderdiak".

Testuinguru horretan, "lehenbailehen" akordioak adosteko asmoa erakutsi du, bermerik gabeko itunik ez duela nahi azpimarratzeaz gain. "Ikusiko dugu Estatuko politikaren errealitateak noraino baldintzatzen duen, baina gauzak geroz eta azkarrago egin, hobe izango da herritarrentzat", erantsi du.

Udalen osaketak Gobernuaren negoziazioan izan dezakeen eraginari buruz, Barkosek adierazi du Geroa Baik alkatetza hartuko duen tokietan agertokia "erabat garbia" dela, baina Iruñeko egoerarekin kezkatuta dagoela.

Zurekin Nafarroak gobernutik "kudeatzea" eskatuko du, akordioak bere lehentasunak jasotzen baditu

Begoña Alfaro Zurekin Nafarroaren Nafarroako presidentegaiak iragarri duenez, akordio programatikoak beren lehentasunak jasotzen baditu gobernu barrutik "kudeatzea" eskatuko dute.

Bilera amaieran Alfaro "baikor" mintzatu da, baina "lanean" jarraitu beharra dagoela erantsi du. Horren esanetan, lehenik eta behin Nafarroako Parlamentuko Presidentetza negoziatuko da, eta ondoren etorriko da Nafarroako Gobernuari buruzko akordioa, baina udalak albo batera utzita. "Elkarrizketen parte izan nahi dugu, Zurekin Nafarroa ez da anaia nagusiek zer erabakitzen dutenaren zain egongo", gaineratu du. 

Chivitek eta Barkosek ekainaren 6rako hitz egiten jarraitzeko hitzordua jarri badute ere, Zurekin Nafarroak ez du hurrengo bilerarako datarik zehaztu eta litekeena omen da telefonoz izatea.