EAJk eserleku bat galduko luke Kongresuan, eta EH Bilduk eta PSEk bana irabazi, Soziometroaren arabera

EAJk, EH Bilduk eta PSE-EEk 5na eserleku lortuko dituzte Diputatuen Kongresuan Euskal Autonomia Erkidegotik, uztailaren 23ko hauteskunde orokorretan, Eusko Jaurlaritzak argitaratutako azken Soziometroaren arabera. Inkesta beraren arabera, PPk 2 lortuko lituzke, eta Sumarrek, 1. Vox berriro geratuko omen da ordezkaririk gabe EAEtik.

Horrela, Euzko Alderdi Jeltzaleak eserleku bat galduko luke. 6 izatetik 5 izatera igaroko litzateke.

Euskal Herria Bilduk gora egingo luke, eta EAEko 4 ordezkari izatetik 5 izatera pasatuko litzateke.

Alderdi Sozialistak ere gora egingo luke: 4tik 5era.

Alderdi Popularrak ere aurreko hauteskundeetan baino eserleku bat gehiago lortuko luke: diputatu bakarra izatetik 2 izatera igaroko litzateke.

Sumar koalizioak, berriz, ordezkari 1 izango luke, Podemos-IUk aurreko hauteskundeetan baino bi gutxiago.

Arabako barrutian, PSE-EE izango litzateke boto gehien jasoko lukeen alderdia, Soziometroak emandako boto-asmoaren % 24,8rekin (2019an baino bi puntu gehiago). EAJ izango litzateke bigarrena Araban, botoen % 21,7 eskuratuta (duela lau urte baino bi puntu gutxiago). Hirugarren postuan EH Bildu legoke, botoen % 19,9rekin (ia lau puntu gehiago). PP laugarren indarra izango litzateke, % 18,1ekin (hiru puntu gehiago).

Boto-asmo horrekin, lau alderdiek eserleku bana lortuko lukete Araban. Horrela, PPk ordezkari arabar bat eramango luke Kongresura, Podemos-IUren kaltetan, Arabako ordezkaritza galduko lukeelako.

Bizkaiari dagokionez, EAJ izango litzateke boto gehien jasoko lukeen alderdia, Soziometroaren boto-asmoaren % 29 eskuratuta; hala ere, 2019an lortutako portzentajearen atzetik egongo litzateke, 6 puntu galduta. Jeltzaleek eserleku bat galduko lukete Bizkaian, eta 3tik 2ra jaitsiko lirateke.

Bigarren, EH Bildu egongo litzateke, % 22,8rekin (ia 8 puntu gehiago). Koalizio subiranista ordezkari 1 izatetik 2 izatera pasako litzateke.

PSE-EEk, hirugarren postuan, botoen % 21,8 lortuko luke (ia 3 puntu gehiago) eta 2 diputatu lortuko lituzke, PPk eta Sumar ia berdinduta leudeke boto asmoan: PPk % 10,3 eta ezkerreko koalizioak % 10,2. Horrela, bi aukerek eserleku bana lortuko lukete.

Gipuzkoan, EH Bildu izango litzateke indar bozkatuena, boto-asmoaren % 31,8rekin, 6 puntu igo ondoren. PSE-EE bigarren postura igoko litzateke, % 24,5ekin (6 puntu gehiago), eta EAJ hirugarren postura jaitsiko litzateke, % 22,8rekin (duela lau urte baino 8 puntu gutxiago).

Ordezkari kopuruari dagokionez, hiru alderdiek bina eserleku lortuko lituzkete. Horrela, Sumar ordezkaritzarik gabe geratuko litzateke Gipuzkoan; Podemos-IUk eserleku bat lortu zuen 2019an.