Ortuzarrek botoa mobilizatzeko eskatu, eta EH Bildu bere benetako asmoak "ezkutatzen" ari dela iradoki du

EAJk autogobernua indartzeko itun bat proposatu du Aberri Egunean, Europan "izen ona" izango duen nazioa izateko eta horrela trantsizio ekologikoa, digitala eta soziala burura eramateko. Horixe adierazi du Andoni Ortuzar EAJren Euzkadi Buru Batzarreko presidenteak Bilboko Plaza Barrian egin duen ekitaldian. "Autogobernu maila nahikoa" behar da erronka horiei ekiteko, trantsizio horiek gauzatzen ez badira "nik ez dakit nongo periferiako auzo ezezaguna" izateko arriskuan geratuko baita Euskadi, bere hitzetan.

EAJ, 2024ko apirilaren 21ean pentsatuta baino, 2036ko apirilaren 21era begira ari dela esan du Ortuzarrek, baina ez du ahaztu nahi izan 21 egun barru Eusko Legebiltzarrerako egingo diren hauteskundeen garrantzia, ezta hurbil direla ere: "Gauza oso estu dago, baina irabazi egingo dugu. Kontua da nola eta zenbateko aldearekin. Eta hor, alderdikide maiteok, alderdizaleok, bete-betean zaudete zuek. Hauteskundeak irabazi behar ditugu, baina ondo, eroso… argi eta garbi".

Ortuzarren esanetan, "ez dago jokoan EAJ EH Bildu baino gehiago den edo EH Bildu EAJ baino gehiago den; hori sinplekeria baino ez da. Jokoan dagoena da lehen esan ditudan trantsizio horiei Euskadik zer erantzun emango dien. Zer gobernu izango duen, Legebiltzarrean zer indar izango duen, aurrerabide eta ongizate hori bermatzeko. Eta, benetan, ez da berdina gobernu bat edo beste, ez da berdina alderdi bat edo beste".

EH Bilduren inguruan esan duenez, "anbiguotasunaren atzetik dabil, ezkutuka, boto bakar bat ez galtzeko". "Ez ote dute ezkutuko agenda bat izango, euren benetako asmoak jasotzen dituen agenda, gobernura iristean martxan jarriko dutena, Gipuzkoan gertatu bezala?", galdetu du buruzagi jeltzaleak.

Ongizaterako agenda baten sorkuntza defendatu du Pradalesek

Imanol Pradales lehendakarigaiak, bere aldetik, ongizatea bermatzeko agenda bat izatea defendatu du lehenengo ardatz gisa "gure gizarteak gaur egun dituen eskari sozialak eguneratzeko, konpontzeko eta hobetzeko", etxebizitza, Osakidetza, segurtasuna, hezkuntza, kalitatezko enplegua, zaintza sistema, demografiaren erronka eta transformazio energetikoa gogor ekarrita.

Bigarren ardatza agenda global berri bat garatzea da, horren arabera, "munduan eragina duten sareetan parte hartzeko".

Azkenik, hirugarren ardatza agenda humanista litzateke, "belaunaldien arteko gero eta arrakala handiagoari, lan-merkatuan enplegu on eta txarren arteko dualtasunari, genero-arrakalari, digitalari, hiri-arloaren eta landa-arloaren arteko arrakalari, trantsizio ekologiko bidegabe baten arriskuei edo eremu publikoaren eta pribatuaren arteko desberdintasunei aurre egiteko".

Bestalde, azpimarratu du EAJrekin "ongizatean eta nazio gisa haztea" edo EH Bildurekin "karramarroen moduan atzera joatea" erabaki beharko dutela boto-emaileek hilaren 21eko hitzorduan. "Euskadirentzat etorkizun hobeago ala kaskarrago bat nahi duten hautatu beharko dute", ziurtatu du.

Urkullu: "Euskadi gaur nazio garatuagoa da"

Txalo-zaparrada bero eta hunkigarria jaso du Iñigo Urkulluk Eusko Jaurlaritzaren lehendakari gisa bizi izan duen azken Aberri Egunean. "Eskerrik asko euskal gizarteari urte hauetan guztietan eskainitako konfiantzagatik. Eskerrik asko herritar bakoitzari, egindako ekarpenagatik eta ahaleginagatik. Eskerrik asko Euzko Alderdi Jeltzalearen familiari eman diguzuen babesagatik", esan du.

Apirilaren 21eko hauteskundeetan botoa EAJri emateko deia egin du, azken legegintzaldiei esker "Euskadi gaur nazio garatuagoa" delako, "autogobernu maila handiagoa eta hobea" duelako, "zerbitzu publiko gehiago eta hobeak" dituelako eta "berdintasun tasa eta bizikidetza inoiz baino hobeak" dituelako, besteak beste.

Oihane Agirregoitia Europako Hauteskundeetarako zerrendaburu jeltzaleak eta Beatriz Berlanga EGIren Aberri idazkariak ere hartu dute hitza Bilboko Plaza Barrian egindako ekitaldian.