"Alderdikeriagatik" etxebizitza akordiorik ez adostea deitoratu du Chivitek

Maria Chivite Nafarroako Gobernuko lehendakariak deitoratu egin du Presidenteen Biltzarrean etxebizitzaren inguruan akordiorik adostu ez izana, eta hori "alderdikeriari" egotzi dio.

Gaur Bartzelonan Presidenteen Biltzarraren ostean egindako prentsaurrekoan egin ditu adierazpen horiek Chivitek. Nafarroako Gobernuaren "interes nagusia etxebizitza arloan akordioak lortzea" zela esan du lehendakariak, eta "Presidenteen Biltzar osoa desitxuratu duen alderdikeria" salatu du.

Chivitek gogorarazi duenez, Pedro Sanchez presidenteak "etxebizitzaren inguruko itun bat proposatu zuen", eta itun horretan jasotako neurrietako bi, etxebizitza publikoak mugarik gabe blindatzea eta etxebizitza datuen behatoki publiko bat osatzea, Nafarroan egiten ari direla nabarmendu du. Nafarroa "dirua banatzeko asmo horretan sartu ez" arren, "etxebizitza arloko aurrekontua handitzeko" konpromisoa hartu du.

Era berean, Nafarroako lehendakariak azpimarratu du beharrezkoa dela "azpiegitura elektrikoak ugaritzea energia berriztagarriak garatu eta industriaren deskarbonizazioa bultzatzeko bidean aurrera egiten jarraitzeko; izan ere, hori egiteko gaitasuna duen azpiegiturarik ez badugu, nekez jarraituko dugu gure industriari jasangarritasunaren bide horretan laguntzen".

Bestalde, horren hitzetan, "atzerapen handia daramagu" azpiegituretan egindako inbertsioetan "urte askotan inbertitu ez delako", eta hori "egiaztatu" egin du," beste presidente batzuek ere horrela adierazi dutelako".

Hala ere, "joan den legealditik bultzada oso garrantzitsua" izan dela onartu du, bereziki AHTaren lanetan, eta Presidenteen Biltzarra "2030. urtea baino lehen Iruñera eramateko" eskatu du.

Ayusok sortutako polemikari buruz

Gainera, Isabel Diaz Ayuso Madrilgo presidentearen jokabidea kritikatu du Nafarroako Gobernuko lehendakariak, "borrokatzeko asmoz" joan baita Bartzelonara. "Ez du ulertzen herri anitza garela, anitza, eta hizkuntzak herri osoaren aberastasuna direla", aurpegiratu dio.

Diaz Ayuso bileratik atera da Imanol Pradales lehendakaria euskaraz hitz egiten hasi denean, baina "Espainia erreala ez da horrelakoa, anitza da", esan du Chivitek.

Nafarroako agintariak azpimarratu du beharrezkoa dela Espainiako Gobernuko presidentea eta erkidegoetako buruzagiak biltzen dituen Presidenteen Biltzarra "balioestea, lankidetza instituzionalerako organo goren" gisa, "elkarrizketarako, eztabaidatzeko, elkarguneak bilatzeko eta politika egokiak partekatzeko" baliagarria, eta Chivitek erantsi du bertaratzen direnek "zerbitzari publiko gisa akordioak lortzeko betebeharra" dutela.

Hori dela eta, nahigabea agertu du bileran organo horren "interesa eta funtsezko zeregina iraultzen saiatu direlako", lehenik eta behin gai-zerrendan "Espainiako Gobernuaren erantzukizuna ez diren gaiak" sartuz, eta, ondoren, "alderdien interesengatik konfrontazioa bilatuz".