Sanchezek bazkide parlamentarioak konbentzitu nahi ditu gaurko osoko bilkuran, ustelkeriaren aurkako neurri batzuk aurkeztuta

Espainiako Gobernuak onartu du asko duela jokoan gaur Pedro Sanchez Espainiako gobernuburuak ustelkeriaren aurkako neurriak iragartzeko Kongresuan egingo duen agerraldian. Hala ere, bazkide parlamentarioen babesari eustea espero du.

Sanchezek Ganberan agerraldi bikoitza egingo du, goizeko saioan neurri horiek aurkezteko, eta arratsaldean nazioarteko azken goi-bileren berri emateko.

Hitzordua PSOEren bazkide parlamentarioen eskakizunen artean iritsi da, Koldo-Cerdan auziaren ondotik, orain arte emandako erantzuna eskasa izan dela uste baitute. Sumar Gobernu koalizioko kideak ere neurri zorrotzak hartzea eskatu die sozialistei.

Horren aurrean, Pilar Alegria Espainiako Gobernuko bozeramaileak asteartean ziurtatu zuenez, neurri sorta "sendoa" aurkeztuko du Sanchezek, eta beste talde batzuek, besteak beste, Sumarrek planteatutako neurri gehienak bertan jasoko dira.

Ez zuen ezer zehaztu, baina Espainiako Gobernuko iturrien arabera, ustelkeria delituengatik ezarritako zigorrak gogortu egingo dira eta enpresa ustelek erakunde publikoekin berriro kontraturik ez egiteko bermeak areagotuko dira.

Konfiantza-galdea egongo da?

Gerardo Pisarello Sumar taldeko diputatuak ohartarazi duenez, presidentearen agerraldia "konfiantza-galde baten atarikoa" izan daiteke; Coalicion Canariak dagoeneko iragarri du eskatuko duela, eta Compromisek ez du aukerarik baztertzen.

EAJko iturriek adierazi dutenez, Sanchezi entzun arte itxarongo dute "karpeta ezberdinen bat" ireki behar duten ikusteko. Era berean, ERCko iturriek azalpenak itxaroteko eskatu dute, neurri zehatzak ezagutzeko.

Gabriel Rufian ERCk Kongresuan duen bozeramaileak espero du "desengainurik ez hartzea", eta ez dio erabilgarritasunik ikusten Espainiako gobernuburuari balizko konfiantza-galdea egiteari.

Ione Belarra Podemoseko buruak berriro baztertu du konfiantza-galdea eskatzea, bere ustez, irtenbidea alderdi-bitasunaren alternatiba eraikitzea delako.

Belarrak adierazi duenez, "neurri kosmetikoak" baino ez ditu espero, eta Sanchezek herriak behar duen birsorkuntza demokratikoaren buru izateko gaitasunik ez duela gaineratu du.

Bestalde, Patxi Lopez PSOEk Kongresuan duen bozeramailea ziur agertu da bazkide parlamentarioak "pozik" egongo direla Espainiako gobernuburuak ustelkeriaren aurka iragarriko dituen neurri "sendoekin".

PPren 50 galdera

Alberto Nuñez Feijoo Alderdi Popularreko buruzagiak 50 galdera egingo dizkio Sanchezi PSOEri eta bere Gobernuari eragiten dieten ustezko ustelkeria kasuei buruz, eta "gezurrak" alde batera uzteko eta "egiaren bat" kontatzeko eskatuko dio, PPko iturriek jakitera eman dutenez.

Besteak beste, "PSOEn finantziazio irregularrik ez dagoela ziurta dezakeen" eta "ezer ez dakienaren itxurak noiz arte egingo dituen" galdetuko dio Feijook Sanchezi.