Montororen abokatu-bulegoak dirua desbideratzeko "sozietate sare" bat sortu ote zuen ikertzen ari da epailea

Cristobal Montoro ministro ohia inputatu duen epailea Equipo Economico abokatu-bulegoko bazkideek ustezko delitu jarduerarekin lortutako funtsak desbideratzeko "sozietate sare" bat sortu ote zuten ikertzen ari da. Guardia Zibilak eta Mossoek uste dute, izan ere, "gas enpresei mesede egiteaz haratago" jo zuela bulego horrek.

Montoro Espainiako Gobernuko Ogasun ministro izan zen 2000 eta 2004 artean Jose Maria Aznarrekin, eta 2011 eta 2018 artean Mariano Rajoyrekin. Joan den ostegunean baja eman zuen PPko afiliatu gisa, bera eta bere taldea inputatuta zaudela jakin zenean. Hzin zuzen ere, 2018an ikerketa ireki zuen Tarragonako 2, instrukzio epaitegiak euren kontra funtzionario-eroskeria, iruzurra, prebarikazioa, influentzia-trafikoa, negoziazio debekatuak, negozioetako ustelkeria eta dokumentuak faltsutzea egotzita, eta orain jakin da berria.

Epaileak eskatuta 2019ko ekainean Mossoek egindako txosten baten arabera, 2009 eta 2015 artean Equipo Economico abokatu-bulegoak 3,9 milioi euro fakturatu zizkion Abengoa taldeari, 293 424 euro Ferroviali 2012 eta 2014 artean, eta 1,8 milioi euro Madrid Network-i 2008 eta 2011 artean.

Epailearen arabera, ikerketak agerian utzi du denbora epean bat egiten dutela sektore elektrikoko enpresei eta energia berriztagarriei hobekuntza fiskalak ekarri zizkieten lege berriek eta enpresa horiek Equipo Economicori egindako ordainketek. Jokoaren sektorea ere gehitu behar dela praktika horietan diote Esquadra Mossoek.

Ustez onura fiskalen edo onura legalen truke legez kontra lortutako dirua Espainiatik kanpo egon zitekeela ohartarazi zuen, berriz, Guardia Zibilak 2023an; Europako hainbat herrialdetan, Irlandan eta Luxenburgon, esate baterako.

Kolonbiatik, Panamatik, Estatu Batuetatik eta Erresuma Batutik etorritako dirua sartu zutela ere nabarmentzen zuen Guardia Zibilaren txostenak.

Horren arabera, Equipo Economicoko bazkideek "beren bulegoari estuki lotutako eta haren mendeko egitura sozietario bat kontrolatuko lukete", eta kontu nagusitik diru kopuru handiak jaso zituzten horietan. Gainera, funtsak desbideratzeko eta zuritzeko beste "sozietate sare" bat  ere izango lukete.

Nomina "oso handiak"

Beste txosten batean, 2019an Esquadra Mossoek egindako batean zehazki, esaten da legez kanpoko ustezko operazioengatik lortutako dirua banatzeko, bazkideek nomina "oso handiak" jasotzen zituztela, eta, gainera, "tartean jarritako sozietateen" bidez fakturatzen zutela.

Ogasunaren beraren txosten bat erabilita, Guardia Zibilak dio Equipo Economico bulegoko zortzi bazkideek eta ondoren jarraitu zion Global Aflteli enpresak (hemen jada ez dago Montoro bazkideen artean) 32,4 milioi euro banatu zituela soldatetan 2008 eta 2019 artean: kasu batean 11 milioiko ordainsaria jaso zuen bazkide batek, 6tik gora beste batek eta 5 milioitik gora beste bik.

Halaber, Guardia Zibilak zalantzan jarri du Montoro enpresa horietatik "deslotuta" ote dagoen. Montoro bazkide fundatzaile, presidente eta Equipo Economicoko kontseilari izan zen 2008ko apirilera arte. Orduan, bere akzio paketea ikertutako beste bati eskualdatu zion baina kontrola izaten jarraitzen zuela susmatzen dute ikertzaileek. Hainbat zantzu daude horretarako. Tartean, partaidetza benetako balioaren azpitik saldu izana.

Montorok Zerga Agentziaren datu babestuak lortu zituen politikari eta pertsona ezagunei buruz: Rato, Pujol, Rafa Nadal, Esperanza Aguirre..

Bestalde, Cristobal Montorok Zerga Administrazioko Estatu Agentziaren (ZAEA) informazio babestua lortu zuen politikari eta pertsona ezagunei buruz, Espainiako Gobernuko Ogasun ministro zenean (2011-18), egozten zaion kasuaren sumarioan ageri denez.

Transkribatutako mezuetan Rodrigo Rato, Esperanza Aguirre, 'J.Pique', Rafa Nadal kirolaria, Gurtel auzia, Pujol kasua eta Isabel II.a kanalari buruzko informazioa dago, besteak beste.

Gainera, Rafa Nadalen eta Esperanza Aguirreren kasuetan, mezuek biei egindako ikuskapen fiskalak aipatzen dituzte.   

Ustelkeriaren eta kriminalitate antolatuaren aurkako Fiskaltzak, Zerga Agentziarekin lankidetzan, mezu elektronikoak egiaztatu ditu legez babestutako informazioaren tratamenduari dagokionez, bai eta funtzionario publikoen erabakietan esku hartzeari dagokionez ere.

Fiskaltzaren arabera, babestutako informazio garrantzitsua ematen zioten, ‘aromero' izeneko posta elektronikoko kontu korporatibo baten bidez. Mezuak "ministroari" zuzenduta zeuden.

Mezuok berretsiko lukete aromero@minhap.es helbide elektronikoa Cristobal Montoro orduko Ogasun ministroari zegokiola; ez bakarrik "ministro" aipatzeagatik.  

Fiskaltzarentzat garrantzitsua da, halaber, Ministerioaren postontzi korporatiboa erabiltzea; mezuetan islatutako gaiak "baieztatuko lukeelako hartzaile horrek informazioa jasotzen zuela ministerio horren inguruabarrei dagozkion gaiei buruz".